6
Solomon Thuhilhmi
(1Kum 8:12-21)
1 Solomon in thungenin:
“ Topa, meingo le
khuathim sungah
um tung ti ci;
2 Atu na ca in, a mawi zetmi
Biakinn sa zo ing,
Topa, kumkhua
na umnak tukin,” ti hi.
3 Israel mi hempoh mahlai ah ding haw hi. Kumpipa cu amu lam hekin amu ca in Pathian muicu ngen hi.
4 Solomon in, “ Topa Israel Pathian cu thangphat hi tahen. Ka pa David lakah thutepnak bawlin,Ref 6:4-9 2Sam 7:1-13; 1Khang 17:1-12;
5 ‘Ka mihingte Izipt ngam pen ka tultik ni pepanin, tuni tian, Israel ngamsung ilai khuapi hei ah hihen, keimah na biaknak tukin tin, biakinn saknak tuk mun teng mang hi, ka mihing hotu tuk vangin kuamah teng ma laih ing.
6 Mahnaven atu-in, keimah na biaknak mun tukin Jerusalem teng ing, ka mihingte uktu tukin David nangmah teng ing hi, a tihmi hempoh cu kim khawng zo hi.’ ”
7 Ka pa in, Topa Israel Pathian biaknak tukin biakinn sak tum hi;
8 mahnaven Topa in, ‘Biakinn sak na tupmi cu thilphazet hi.
9 Mahnaven nangin sa tukma ci. Na capa, na sungsuak capa in, ka biakinn cu sa tuk hi,’ ti hi.
10 “Atu-in, Topa in, mah a thutepmi cu kimtik zo hi. Ka pa i ai-in keimah Israel kumpi dekin, Topa Israel Pathian biaknak tukin biakinn cu sa khawng zo toh ing.
11 Topa in Biakinn sungah Israel mite tuah thutiamnak bawlin, mah thutep ngatnak suangpeek tei umnak Thutiam Kuang cu koih zo ing,” ti hi.
Solomon Thungetnak
(1Kum 8:22-53)
12 Solomon cu mipi muhin hawh a, biaklandawh mai ah dingin, baanzak thungen hi.
13 Solomon in, daal cabuai niamno bawlin inntual laizangah koih hi. Mah daal cabuai cu a sau lam pi liat, a zal lam pi liat, a sanlam cu pi nga hi. Mah cabuai humah kaito in, mipi muhah a khukdinin, a khut van lamah zakin thungen hi.
14 “Maw, Topa Israel Pathian, lei le vanah nangmah bang Pathian dang um haw ma. Na thupiakmi thintak zetin, a zui haw tale na mihing tei humah na thutepnak kimtikin, na ihnak langtik ci.
15 Ka pa David lak a, na thutepnak cu khotikin, tuni in pa khatno hei pel ha ngawlin kim khawng hi.
16 Mah hangin maw, Topa, Israel Pathian, ka pa bangin na Daan zui in komno a ngai haw tale, a casuan pa kha khatin Israel kumpi dek leleng haw tuk hi, tin ka pa i nel a, na thutepmi kimtik zalin hi.Ref 6:16 1Kum 2:4;
17 Topa aw, Israel i Pathian, na sila David lak a, na tepmi hempoh cu pa khat hei pel ha ngawlin kimtik zalin hi.
18 “Mahnaven, maw Pathian aw, leihum mihing tei lakah um thei ngangai ni cim? Van i van sawlawn hei ah va ma vecin, ka sakmi Biakinn ah itin kaw na thawl theih tuk?Ref 6:18 2Khang 2:6;
19 Topa ka Pathian, kei na sila i thungetnak le ka kutnak hi hu theihsak zalin hi. Na lak a, ka ngetmi le ka aunak hi hu ngai zalin hi.
20 Hi biakinn hi a sun le zanin cinsak zalin hi. ‘Kei na biaknak mun tuk uh hi,’ na tihnak hi Biakinn lam hekin thu ka nget ten hu theihsak zalin hi.Ref 6:20 Daan 12:11;
21 Biakinn lam hekin ka thungetnak le na mihing Israel tei thungetnak hi theihsak zalin hi. Na umnak vancung pen za ing, ka sualnak uh ngaidam zalin hi.
22 “Mi pa khatin, midang humah bawl sualmi nei hi tin, sual nawnin, a sual ngawlnak thu siatcamnak tuah thutepnak bawl tukin hi Biakinn, na biaklandawh mai ah a henpih haw ten,
23 Maw, Topa vancung pen hu ngai inna, na mihing tei thu cu hu sonsak zalin hi. A mawh mi cu a mawhnak bangin dantat inna, a sual ngawlte cu suakcatikin hi.
24 “Na humah a sual haw hangin na mihing Israel mite cu, a ngal haw ten neh haw a, a sual haw sikkikin, ngaihdam ngenin, hi Biakinn ah thu a nget haw ten,
25 van pen hu ngai zalin hi. Na mihing tei sualnak cu ngaidam inna, a lak haw le a pu le pa tei lakah na piakmi ngamah puikik zalin hi.
26 “Na mihing tei na humah a sual haw hangin van nguah na zuktik ngawl ten, sualsikin, hi Biakinn lam hekin, thu a nget haw ten,
27 maw, Topa, vancung pen ngai inna, Israel mi na mihing tei sualnak cu ngaidam zalin hi. A dikmi bawl tukin nangmah in zilh inna, na mihing tei lakah a kumkhua amuta hi tukin, na piakmi, hi ngamah van nguahzutik zalin hi.
28 “Hi ngam sungah paam maw, natsia maw hengin, ahimata, a ankungte huihsia in maw, khaau in maw siatsuah khawngin le na mihingte a ngal haw ten a do haw ten hei hihen, hizulin, a nat khawng haw ten hei in hihen,
29 a thungetnak haw hu ngaihsak zalin hi. Na mihing Israel miten a lung haw a bing leita hangin hi Biakinn lam hekin, thu a nget ten,
30 hu ngaihsak zalin hi. Mihing tei lungmu le ngaihsutnak cu nangmah bekin thei ci. A ngamtat haw zo in, a thu haw sonsak zalin hi.
31 Ka pu le pa tei humah na piakmi leingamah a nunsung haw hempoh nangmah kihca in, na thu ngai haw tuk hi.
32 Israel mi hi ngawl, minam dang pa kha khatin lam khawlapi ah a ummi hi naven, na huham, na ngilnak le na thil bawl theih daante a theih hangin hungin, Biakinn lam hekin, thu a nget ten,
33 a thungetnak cu hu theihsak zalin hi. Vancung na umnak pen hu ngai inna, a ngetmi cu bawlsak zalin, na mi Israel miten thei in, nang a kihcak haw bangin, leihum mihing hempoh ten thei haw tuk a, nangmah cu kihca bok haw tuk hi. Hi ka sakmi biakinn hi nangmah biaknak tuk mun hi tih thei haw tuk hi.
34 “Na mihingte cu ngaldo tukin thu na piak ten, a hawhnak haw mun le ngam hempoh ah hi na tenmi khuapi le nangmah biaknak tukin ka sakmi Biakinn lam hekin, na lakah thu a nget haw ten,
35 a thungetnak haw cu hu ngai zalin; vancung pen thei inna, nehnak hu pia in hi.
36 “Na mihingte cu na humah sual khawng haw, kuamah a sual ngawl umleh haw ma toh, na thinukin, a ngal haw ten nehin, manin ngam khawlapi ah a pui haw ten,
37 na mihing tei thungetnak cu ngai zalin hi. A saltannak haw ngam pen sikkikin, na lakah thungenin, a sualnak le a phatngawlnakte a phuang haw tale, maw, Topa a thungetnak haw hu theih sak zalin hi.
38 Mah ngam pen lungmu tak le thungai pi in, a sual haw sikin, ka pu le pa uh lak a, na piakmi hi ngam le na tenmi hi khuapi, nangmah biaknak tukin ka sakmi hi Biakinn lam hekin, na lakah thu a ngen haw tale,
39 a thungetnak haw cu hu theih sak zalin hi. Na umnak vancung pen ngai in hehpih inna, a sualnak haw cu ngaidam zalin hi.
40 “Maw ka Pathian, atu-in, na mitin mu inna, hilai mun pen ka thungetnak hi ngai sak zalin hi.
41 Topa Pathian, atu-in tho inna, ngilnak langtiktu Thutiam Kuang tuah Biakinn sungah tum inna, kumkhua in um leleng zalin hi. Thiampi tei nadehnak hempoh ah muicu pia inna, a hum hawah na phatnak hangin, na mihingte cu lungdam thatui lelengin, um haw hen.Ref 6:41-42 Saam 132:8-10;
42 Maw, Topa Pathian, sathau na thih zo mi kumpi hi lawl zal pahsun. Na sila David lak a, na ihnak cu thei leleng zal aw maw,” tin thungen hi.