35
Josiah In Kaltan Puai Bawl
(2Kum 23:21-23)
1 Kumpi Josiah in Topa i min thangphatnakin, kaltan puai cu Jerusalem khua ah bawl hi; ha masabel ni sawm le ni li ni-in, mah puai cu bawlin, ngante ngo haw hi.
2 Thiampi tei lakah biakinn ah a nadeh haw tukmi pia in, komno in deksuak tukin so hi.
3 Topa i lakah thianthohtikmi, Israel mi zilhtu Levi mite vang thucahin, “David capa kumpi Solomon i sakmi Biakinn sungah Thutiam Kuang cu koih un. Hi Thutiam Kuang cu munkhat pen mundangah pua ngawltohin, Topa na Pathian uh le ama mihing Israel tei na bek dek un hi.
4 David Kumpi le a capa kumpi Solomon in dehvo a piak bangin biakinn ah na innkua tek uhin, dehvo na la un.Ref 35:4 2Khang 8:14;
5 Israel mi lak pen innkua pa kha khat bop tuk a kul tale bawm theitu hi tukin zuam un.
6 Noh ten kaltan puainak tuk tuu le keelte ngo un hi. Topa in Moses lakah a piakmi Daan bangin na u le nau uh Israel tei a zui bok hawnak tukin nohte cu thiangtho in um unna, biakpiaknakte cu tuangtim un,” ti hi.
7 Kumpi Josiah in Kaltan Puai hun a mipi tei ca in, ama ngan hon lak pen tuu le tuuno, keelno a venghawngin thawng sawm thum pia hi; khuicang vang thawng thum pia hi.
8 A khutnuai bawite vangin mipi ten thiampite le Levi miteita tukin pia bok haw hi. Biakinn cingtu upate: Thiampi Sang Hilkiah, Zekhariah le Jehiel ten mah puai hun ten biakpiaknak bawl tukin thiampi tei lakah tuuno le keelno thawng nih le za luk, khuicang za thum pia hi.
9 Levi mi hotute: Konaniah, Shemaiah le a unau Nethanel, Hashabiah, Jeiel le Jozabad ten tuuno le keelno thawng nga, khuicang za nga cu Levi tei biakpiaknak tukin pia haw hi.
10 Kaltan Puai bawlnak tukin ihempoh a vaihawm ceng haw ten kumpipa i thupiak bangin thiampi le Levi mite cu a nadehnak mun tenah um haw hi.
11 Tuu le keelte a ngawh haw ten Levi miten a phaw cu hawkin, a thi cu thiampi ten biaklandawhah theh haw hi.
12 Moses Daan sung bangin halkang biakpiaknak a bawl theih hawnak tukin ngancik cu innkua tekin, mipite sem haw hi.
13 A daan bangin Kaltan Puai biakpiaknak cik cu Levi miten mei ah emin, biakpiaknak thiangtho cu beel, thik beel le suankang ngengpi tuah huanin, mipi tei lakah man lang zetin sem haw hi.Ref 35:13 Suah 12:8-9;
14 Mahceng ten Levi miten amu ca le Aaron casuan, thiampi tei ca in, cik sem haw hi; itahim titale halkang biakpiaknak le a thupiakmite a halnak hawah thiampite cu taklam khuathim tianin, man hihim haw ma.
15 Asaf hinnam lasatute cu kumpi David i thupiaknak bangin a nadehnak mun tekah um haw hi. Asaf hinnamte, Heman le kumpi profet Jeduthun le Biakinn kongka cingtute cu a nadehnak haw pen mundangah hawhlih kulma hi; itahim titale amu ca in, Levi miten ihempoh vaihawm sak haw hi.Ref 35:15 1Khang 25:1;
16 Mah hangin kumpi Josiah i thupiak bangin Kaltan Puai cannak le biaklandawh hum a, halkang biakpiaknak a piakmite le mah ni a Topa biaknak ihempoh cu cangkim zetin bawl khawng haw hi.
17 Mahlai ah a tel Israel mi hempohin Kaltan Puai le Naman hel ngawl Cangho Puai cu ni salih sung bawl haw hi.Ref 35:17 Suah 12:1-20;
18 Profet Samuel khan nungten Kaltan Puai cu hi bangin bawl awng haw ma. Israel kumpi dangte hei in, Kaltan Puai cu kumpi Josiah in thiampite, Levi mite, Judah mi, Israel mi le Jerusalem khuasungte tuah a bawlmi bangin bawl awng haw ma.
19 Josiah kumpi a deh kum sawm le kum liat kumin, hi Kaltan Puai cu bawl haw hi.
Kumpi Josiah Uknak Bo
20 Kumpi Josiah in, Topa i Biakinn ca in hiti bang nate a deh nungten Izipt kumpi Neko in, Eufrates Ngun mawk a, um Karkhemish ah ngaldo tukin a ngalkapte tuah tul haw hi. Mahmi cu Josiah in kham tukin tum hi.
21 Neko in Josiah lakah thucahin, “Maw Judah kumpi pa, hi ka ngaldomi hi dondak kha pahsun, nang tuah imah sengdun kha ma hi, nang do tukin hung mang. Ka ngalte do tuk bekin, hung ing, Pathian in manlang zetin hawhtik hi. Pathian cu ka lamah tang hi. Amah cu do nuam pahsun, na do tale nangmah siatsuah kha tuk hi,” ti hi.
22 Josiah in ngai nuam ngawlin do tum leleng hi; theihtup tuk ngawlin bawlduncopin, ngaldonakah hawh hi. Kumpi Neko mangin, Pathian i thuhilhmi cu ngai nuam ngawlin Megiddo Munlawnah ngaldo tukin hawh hi.
23 A dodun haw ten Izipt thalcangin, kumpi Josiah cu kha hi. A sila pa i lakah, “Keimah taipihin! Nase zetin kha haw,” ti hi.
24 A cipuh leng pen cawi in, a cipuh leng a pa nihnakah koihin, Jerusalem ah kihpih haw hi. Mahlai ah thi in kumpi khanah vui haw hi. Judah mi le Jerusalem miten a thih cu cangin kap haw hi.
25 Profet Jeremiah in kumpi Josiah kahnak la phuahin, a kumpi haw a kah haw ten lasatu ten numei hihen, pano hihen mah kah la tuah kah haw hi. Mahti bangin mithi kah la cu Israel tei dan bangin suak a, mah la cu kah la laibu sungah um hi.
26 Josiah in Topa cu a muannak Daan a zuinak,
27 a uknak a pat pepan a tawp tian a bawlmi hempoh le ama tangthu cu Israel le Judah Kumpi Tangthu Laibu sungah cangkimno in ngan haw hi.