34
Judah Kumpi Josiah
(2Kum 22:1-2)
1 Josiah cu Judah kumpi a deh ten kum liat hi, Jerusalem pen kum sawm thum le khum khat sung uk hi.Ref 34:1 Jer 3:6;
2 Topa i mai ah a pha mi bawlin, Topa lungdamtik hi. A pu le pa, David kumpi nungzui in, Pathian i thupiakmi hempoh komno in zui hi.
Josiah In Dawi Biaknak Vawk
3 Josiah cu kumpi a deh kum liatnak, khangno a hih laih pepan a pu le pa kumpi David i Pathian bia pan hi. Kum li nungten dawi a biaknak haw munte, Asherah milim le milim dangte cu siatsuah khawng hi.
4 A thupiak bangin a mihing ten Baal a biaknak haw tuk biaklandawhte cu siatsuah khawng haw, a el a namtui halnak biaklandawhte sepkeh khawngin, Asherah milim le adang milimte cu a ngawivam khawng haw nungten a vam cu biakpiaknak a bawltu tei khanah theh haw hi.Ref 34:4 2Kum 21:3; 2Khang 33:3;
5 dawibia thiampi tei nguh cu a dawi biaknak biaklandawh humah halin, Judah le Jerusalem cu Josiah in thiangtho lehtik hi.Ref 34:5 1Kum 13:2;
6 Manasseh ngam, Efraim ngam le Simeon ngamsung mun tihkim le khua tihkimah saklam pen Naftali tianin bawl khawng hi.
7 Saklam ngamsung khua tihkimah biaklandawhte siatsuahleh hi, Asherah zukte phuk khawng hi, milimte ngawivam khawngin, namtui halnak biaklandawhte vang sepkeh khawng hi. Mah nungten Jerusalem ah kikleh hi.
Daan Laibu Mu Haw
(2Kum 22:3-20)
8 Kumpi Josiah in, Judah ngam a uk sawng kum sawm le kum liat kum, a ngamsung le Topa i Biakinn sung a, dawi biaknak a thianthohtik nungten, Josiah in Topa Pathian i Biakinn lemleh tukin mihing pa thum: Azaliah i capa Shafan, Jerusalem uktu bawi Maaseiah le bawi upa pa khat Joahaz i capa Joah dehvo pia hi.
9 Levi mi Biakinn cingtu ten Efraim mi, Manasseh mi, Saklam Ngam mite, Judah mi, Benjamin mi le Jerusalem khuasung mitei lak pen Biakinn ah sum a cawi haw mi khawm haw a, Thiampi Sang Hilkiah lakah hawhpih haw hi.
10 Mah sumpai cu Biakinn lemlehnak hotu tei lakah pia haw a,
11 inn satu le khutzung thiamte nilawh pia in, mah hum pen suang leinak le Judah kumpi i zulzaunak hangin a sia mi innte leplehnak tukin a kulmi thingte leinakin mang haw hi.
12 Mah nadektute cu midikcang le muantakzet mite haw hi. A hotute cu mi pa li: Levi mi Merari hinnam Jahath le Obadiah, Levi mi Kohath hinnam Zekhariah le Meshullam haw hi. Levi mi cu a venghawng la thiam ngeh haw hi.
13 Adang Levi mitei van puatu tel khawng haw in, nadeh dadang cingtu vang hi haw; adang Levi mite cu sungta, cazi le kongka cingtute haw hi.
14 Van koihnak khan pen sumpai a suah haw laihin, Hilkiah in Moses lak a, Pathian piakmi Daan, Topa i Daan Laibu khul ngah hi.
15 Hilkiah in, “Hi Biakinn sungah Daan laibu khul ing,” tin Shafan hilh hi. Hilkiah in mah laibu cu Shafan pia in,
16 Shafan in kumpipa i lakah hawhpih hi. Shafan in kumpipa lakah, “Na thupiakmi bangin ihempoh bawl khawng ung.
17 Biakinn sung a, koihmi sumpaite vang suahin, nadektu le a hotu tei lakah pia ung,” ti hi.
18 “Hilkiah i piakmi laibu hilai hah um,” ti hi. Kumpipa i lakah ngingzet sial hi.
19 Kumpipa in, a zak ten a khawngai in, a puan botkek hi.
20 Thiampi Sang Hilkiah, Shafan i capa Ahikam, Mikaiah i capa Abdon, laingantu Shafan le kumpi cingtu Asaiah samin, a lak hawah hi bangin thupia hi.
21 “Hawh unna, keimah le Israel le Judah ngam sungah a tang laihmi tei ca in Topa siampih un. Hi laibu i zilhmi hi cangcianno in thei un. Hi Laibu in bawl tuk a tihmi a pu le pa uhten bawl ngawlin Topa i thu a ngaih haw ngawl hangin a humah Topa thinuk,” ti hi.
22 Kumpipa i thupiak bangin Hilkiah le a ngualcamte cu Jerusalem khua thak a um numei profet Huldah a tih haw tawk tukin hawh haw hi. Hasrah i tupa, Tikvah i capa Shallum cu Huldah i pasal hi a, Biakinn puante cingtu hi. A tawh haw mi thute cu Huldah hilh haw hi.
23 Huldah in, “Kumpipa i lakah kik unna,
24 Topa in, ‘Kumpipa i lakah na sial uhmi laibu sung a, ngatmi thusia tamsiatnak bangin Jerusalem le mipite cu bawlsia tung hi.
25 Kei cu lawlin, pathian dang lakah biakpiaknak bawl haw hi, hi bangin a bawlmi hangin a hum hawah ka thinuk ing. Jerusalem hum a, ka thinuknak cu dai thei tukma hi.
26 Kumpi ama ca tukin, Topa, Israel Pathian Keimah in hi bangin hilh ing: Hi laibu sung a, ngatmi thu ngai in,
27 Jerusalem ka mihingte ka bawlsiat tuk thu na zak ten na puan botkekin, kap le sikkikin, na lungmu a nem hangin na thungetnak za zo ing.
28 Jerusalem ka bawlsiatnak cu mu man tukma ci. Mengdenin, na hun botik tung,’ tin na ti un,” tin hilh hi. Mah thu tuah Hilkiah le a ngualcamte cu kumpi Josiah lakah kikleh haw hi.
Topa i Thuzui Tukin Thutiam
(2Kum 23:1-20)
29 Kumpi Josiah in, Judah le Jerusalem hotute sam khawngin,
30 munkhatin thiampite le Levi mite le Jerusalem khua sung mite tuah mi ca-ngah, mihau ti ngawlin Biakinn ah a venghawngin hawh haw hi. Biakinn sungah amuh haw mi thutiam laibu cu a venghawngin nging zetin, a mai hawah kumpipa in sial hi.
31 Josiah cu a kumpi khuam elah dingin, mah laibu sung a, um mi bangin, thutepnak sungah a tep haw mite bawlsuak tukin hihen, Topa i thu ngai tukin, Topa i lakah thutepnak bawl hi.
32 Mah thutepnak bawl tukin Jerusalem ah a ummi hempoh le Benjamin mite cu thutiamnak bawltik hi. Jerusalem miten a pu le pa tei Pathian lakah a thutepmi hempoh cu zui haw hi.
33 Kumpi Josiah in Israel ngamsung a, ummi ningdelhhuai milimte cu siatsuah khawng hi. A nunsungin mipi ten a pu le pa tei Topa Pathian a zui haw cu zamsan haw ma toh hi.