19
Profet In Jehoshafat Thuhilhnak
1 Judah kumpi Jehoshafat cu himdamno in, Jerusalem khua a innah kikleh hi.
2 Hanani capa profet Jehu cu kumpi Jehoshafat tawk tukin hawhin, a lakah, “Mipha ngawlte bop le Topa a huatu tei lakah tel khak lih hi pha hi tin ngaisung cim? Hiti bangin na bawl hangin nangma humah Topa i thinuknak hengtik ci.
3 Mahnaven a phatnak vang cu um bok; midang tei biakmi Asherah milimte vawk khawngin, Topa i deihnak zei leleng ci,” tin hilhhawl hi.
Jehoshafat i Bawlphat Lehnak
4 Jehoshafat cu Jerusalem khuapi ah um naven a ngamsung hangtabel, Beersheba pen saktabel Efraim mualhum ngamngi tiang khualzin lelengin, a mihingte cu a pu le pa tei Pathian Topa i lakah hekkikleh tukin sosuah pepel hi.
5 Judah ngamsung a khuapi tihkimah thukhentute koihin,
6 a lak hawah, “Thusonin thu na khen uhten ngallingzet un; thu na khen uhten nangmu thuneih nuamnak tuah thukhen hi ma uh ci; Topa i thuneihnak tuah khen hi uh ci; thu na khen uhten Amah cu nangmu lakah um hi.
7 Topa kihca unna, ngallingno in nadek un; itahim titale Topa in mizolnak, mi deidatnak le nawhthuh eih theite cu deih hihim ma hi,” tin thucahta pepel hi.
8 Jerusalem khua hei ah kumpi Jehoshafat in thukhentu tukin Levi mi, thiampite le khuasung upa minthangte koihin, Topa i Daan a palcat haw ten le khuasung mite taza a cuaidun haw ten thukhentute haw hi.
9 A lak hawah, “Na dehvo uh cu Topa kihca thahin, komno in le deidatnak nei ngawlno in dek un.
10 Khua dadang pen na unau uhte, pa khat le pa khat a thahdun khak sual haw ten hei hihen, Topa i Daan le thupiakmi a palcatnak haw thu ah hihen, na lak uhah a hen haw ten, Topa humah sualnak a neih haw ngawlnak tukin ngalling zetin, a dehvo ten cu hilh ciang un hi. Mahti bangin, na bawl uh ahimata nangmuh le na unaupih uhten, Topa i thinuknak nase zetin thuak tuk uh ci. Na dehvo uh komno in, na bawl uh ahi tale na hum uhah sualnak um tukma hi.
11 Biaknak lam thu hempoh pen Thiampi Sang Amariah cu thuneitubel hi tuk a; khuasung mitei thu ah Judah ngamuktu bawi Ishmael capa Zebadiah cu thuneitubel hi tuk hi. Thukhentu tei thukhenmi bawlsuak tukin dehvo a neitu cu Levi mite hi haw tuk hi. Ngalpha zetin dek unna, hi ka cahmi thu bangin bawl un; Topa cu midik tei lamah panpih zal hen,” ti hi.