20
Edom Do Haw
1 Hun a ngei nungten Moab ngalkap le Ammon ngalkap ten, amuh pantu Meunim mite tuah Judah ngam do haw hi.
2 Kumpi Jehoshafat lakah a mi hahte heng haw a, “Edom ngam pen ngalkap tampi hengin Tuipi Thi ngalkhat lam pen do tum haw hi. Hazazon Tamar khua vang la zo haw hi,” tin hilh haw hi. (Hazazon Tamar cu Engedi tih vangin sam haw hi.)
3 Jehoshafat cu thinsu in Topa i lampui tukin thungen hi. A ngam sungmi hempoh ancang tukin thupia hi.
4 Judah ngam khua tihkim pen Jerusalem ah Topa i lampuinak ngen tukin hung haw hi.
5 Jerusalem khuasung mite tuah Biakinn tual thakah tawkdun khawm haw hi. Kumpi Jehoshafat cu a mai hawah dingin,
6 nging zetin thungen hi: “ Topa aw, ka pu le pa tei Pathian, na umnak van pen leihum hinnam hempoh nangmah in uk khawngin, cahnak le huham hempoh nangmata hi haw in, nang a langpang theitu kuamah um haw ma hi.
7 Nangmah cu ka Pathian uh ci. Na mi Israel miten hih ngam a henleh ten hilai ah a ummi hinnamte cu hawlvawkin, na mihing Abraham i casuan tei lakah hi ngam cu kumkhua a muta tukin pia ci.Ref 20:7 Isa 41:8; James 2:23;
8 Hih ngam sungah umin, nangmah upatnak Biakinn sa haw hi.
9 Haksat vansannak a phunkim, ngaldo siatsuahnak, natsia le paam a lak hawah a hen ten, hih Biakinn mai ah dingin bia haw hi, a ngetnak haw mun pen a bawl haw mi hi. Na lakah thu a nget haw ten ngai in pan mek ci.
10 “ Topa aw, atu-in Ammon mi, Moab mi le Edom miten do haw hi. Ka pu le pa uhte Izipt ngam pen a tul haw laihin, hi ngamte bang thah tuk phal ma ci, mah hangin ka pu le pa uhten a ngam haw cu kimin, siatsuah haw ma hi.Ref 20:10 Daan 2:4-19;
11 Mah bang hi na pi in, atu-in, a lulhleh tum daan haw hi zo hemin keimuh piaksa haw ngam pen hawlvawk tum haw hi.
12 Maw Pathian aw, ka Pathian uh cu Nangmah hi ci! Keimuh dotu ngalkap hizah tei mai ah phe zo hihim ma ung, mah hangin nangmah in bawlsia in hi; ka bawl theih imah uh umleh ma toh; nangma bop tuk bek muang ung,” ti hi.
13 Judah mi hempoh a zi le a canaute tuah Biakinn tualah ding haw hi.
14 Topa i hawvang cu mipi tei lak a, um Levi mipa pa khat lakah heng hi. Amah cu Zekhariah capa Jahaziel hi. Zekhariah cu Benaiah capa hi; Benaiah cu Jeiel capa hi; Jeiel cu Mattaniah capa hi. Mattaniah cu Levi miphun Asaf hinnam hi.
15 Jahaziel in, “Maw kumpipa le Judah mi le Jerusalem mite, Topa in, Na ngal uhte a tam haw hangin lau pahsuh un, na thin uh vang nau pahsuh hen. Ngaldonak cu noh tei thu kha ma hi, Pathian leitek hi,Ref 20:15-17 Daan 20:1-4;
16 zingten do un. Ziz mual kawn pen hung haw tuk a, Jeruel el munlawn tawpnak pen tawk tuk uh ci.
17 Nohtei do kul tukma hi. Panmun la unna, mansa in um un; Topa in nehnak a piak cu mu tuk uh ci. Judah le Jerusalem mite; lau hihim pahsuh un; lungmu aicangin um pahsuh un. Ngaldo tukin hawh unna, Topa in, na lak uhah umpih tung ti hi,” tin hilh hi.Ref 20:17 Suah 14:13-14;
18 Kumpi Jehoshafat cu a mai lei tawngkha tian kunin, mipite vang kun bok haw in, Topa cu bia haw hi.
19 Levi phun Kohath le Korah hinnamte dingin nging zetin Israel Pathian Topa cu thangphat haw hi.
20 A zingten zingtungno in tho haw a, Tekoa el ngam lamah hawh haw hi. A tul haw ten Jehoshafat in, a lak hawah, “Judah le Jerusalem mite, Topa na Pathian uh cu muang unna, khoh zetin ding thei tuk uh ci. A profet tei thuhilhmi um unna, lawhting tuk uh ci,” tin cah hi.
21 Mipite thu a siampih nungten lasatu khenkhatte cu puai hun ten a silh mek haw mi angki cualpi silhin, ngalkap tei mai pen;
“ Topacu thangphat un.
Ohte a ihnak cu
kumkhua in
kho hi,” tin
lasa thah tukin thupia hi.
22 Lasatu ten, Topa thangphatnak la a sak bek haw ten Topa in Judah ngam dotu ngalte cu nase zetin, a thinsutik hi.
23 Ammon mi le Moab mi tang langkhatin, Edom ngalkapte cu do tawtok haw a, Edom ngalkapte cu that khawng haw hi. Mah nungten amuh le amuh nase zetin dodun leleu haw hi.
24 Judah ngalkapte cu mualbo a hen haw ten zoleh haw in, a ngalte cu leihumah lum teptupin mu haw hi. Pa khat hei luat ngawlin thi khawng haw hi.
25 Jehoshafat le a ngalkapte cu a ngal tei nate la tukin hawh haw hi. Khui, an, puan le na manpha a phunkim tampi mu haw hi. Mah nate cu ni thum sung thiak haw naven thiak ceng haw ma hi.
26 Ni linakin Berakah munlawnah khawmdunin, Pathian thangphat haw hi. Mah munlawn cu tu tianin, “Berakah”note 20:26 Berakah tih cu Hebru awnin Thangphat tihnak hi. tin sam haw hi.
27 Topa in, a ngalte a nehtik nungten Jehoshafat le a ngalkapte cu Jerusalem ah nehnak lungdamnak tuah kikleh haw hi.
28 Jerusalem a hen haw ten tingtang, pheveu le pengkul tumthahin, Biakinn ah hawh haw hi.
29 Topa in Israel tei ngalte neh khawng hi tih a zatu ngam hempoh cu a thinsu khawng haw hi.
30 Topa in, a ngamsung khua tihkimah lemdaihnak pia in, Jehoshafat in lemdaihnak tuah a ngam uk hi.
Jehoshafat Uknak Bo
(1Kum 22:41-50)
31 Jehoshafat cu kum sawm thum le kum nga a kim ten Judah kumpi dekin Jerusalem pen kum sawm nih le kum nga sung uk hi. A nu cu Shilhi canu Azubah hi.
32 A pa Asa bangin Topa i mai ah thilpha bawl hi;
33 mahnaven dawi a biaknak munte cu siatsuah ma hi. Mipi in, a pu le pa tei Pathian cu a lungmu hempoh tuah bia haw ma hi.
34 Jehoshafat i bawlmi dadang cu, a pat pepan a tawp tian, Israel Kumpi Tei Tangthu Laibu tihmi sung a telmi Hanani Capa Jehu Tangthu Laibu tihmi sungah sialsiah haw hi.
35 Vei khat laihin, Judah kumpi Jehoshafat in thilpha ngawl tampi a bawltu Israel kumpi Ahaziah tuah ngualcam matdunnak bawl haw hi.
36 Eziongeber a tih haw mi tinbaw colhnak munah Tarshish lam a hawhtu tuk tinbawte bawl haw hi.
37 Mareshah khua mi Dodavahu i capa Eliezer in, Jehoshafat cu, “Ahaziah tuah ngualcam matdunnak na bawl hangin na bawlmite cu Topa in siatsuah khawng tuk hi,” tin ngallinnak pia hi. A hilh bangin a tinbawte cu siatsuah khawngin, Tarshish ah hawh thei ma hi.