18
Profet Mikaiah In Ahab Ngallinnak Pia
(1Kum 22:1-28)
1 Judah kumpi Jehoshafat cu mihauzet le mi minthangzet a hih nungten ama sangngam khenkhatte le Israel kumpi Ahab i sangngamte tuah huaidunin, pehtuahnak tuk vaihawm hi.
2 Kum ngeipi nungten Jehoshafat cu Ahab lakah zin tukin Samaria khua ah hawh hi. Jehoshafat a zuitute upat piaknakin, Ahab in puai ngengzet bawl a, khui le tuu tampi ngo hi. Ahab in Gilead ngam a, Ramoth khua do tukin Jehoshafat cu zawm hi.
3 Ahab in, “Ramoth do tung a, tel thei bok ni cim?” tin ti hi. Jehoshafat in, “Panpih tung. Na man ten hilh inna, keimah le ka ngalkapte tul tuk ung hi.
4 Topa siampih masabel hih nung,” ti hi.
5 Mah hangin Ahab in profet za li samin, “Ramoth do tung maw do tukma ing kaw?” tin dong hi. Profet ten, “Do in hi. Pathian in nehnak pia tuk hi,” ti haw hi.
6 Jehoshafat in, “ Topa ka siampih theihnak tukin profet dang pa khat beek um haw ma maw?” tin dong hi.
7 Ahab in, “Adang pa khat umlaih hi. Imlah capa Mikaiah hi. Mahnaven Mikaiah cu hua ing; itahim titale ituk mahten ka ca in thupha phuang awng ma hi, thupha ngawl bebek hilh,” ti hi. Jehoshafat in, “Mahti bang awn cu na kam pen tultik zal pahsun,” ti hi.
8 Mah hangin kumpi Ahab in, a khutnuai bawi pa khat samin, Mikaiah manlangin samtik hi.
9 Ahab le Jehoshafat cu a kumpi thuam tuah thuamdunin, Samaria khuapi kongka pualam cangngawinak mun kumpi khunnak veve ah khungin, a mai ah profet cu thu hilh li haw hi.
10 Profet tei lak pen pa khat Khenaanah capa Zedekiah in thik tuah tuukite bawlin, Ahab lakah, “ Topa in, ‘Hiti bang kite tuah Siria cu do in neh tuk uh ci,’ ti hi,” tin hilh hi.
11 “Profet dangte vangin mahtibang in hilh tek haw hi. Ramoth do tuk hawh inna, neh tuk ci,” tin ti haw hi. “ Topa in nehnak pia tuk hi,” ti haw hi.
12 Mah sungin Mikaiah a samtik haw mi pa in Mikaiah lakah, “Profet dang hempoh ten kumpi pa in neh tukin hilh tek haw hi. Nang vang a hilh haw bangin na hilh ahin pha tuk hi,” ti hi.
13 Mikaiah in, “ Topa i min salin hilh ing. Ka Topa i hilhtikmi bebek hilh tung hi,” tin don hi.
14 Mikaiah cu Ahab kumpi mai a hen ten kumpipa in, “Mikaiah! Kumpi Jehoshafat le keimah in Ramoth do tuk maw, do tukma kam ung kaw? hu hilh hemin?” tin ti hi.
Makaiah in, “Do unna, nehkha tuk uh ci, Topa in nehnak pia tuk hi,” tin don hi.
15 Ahab in, “ Topa i min tuah ka lakah na ot ten thuman awnin hi, tin vei izong kaw ka hilh tuk?” tin ti hi.
16 Mikaiah in, “Israel ngalkapte cu mual le luam ngam lakah cingtu nei ngawl, tuu hon bangin sak le hangah vakvai in mu ing. Topa in, ‘Hite cu hotu nei haw ma, mengdenin, a innah pin haw hen,’ tin hilh hi.”Ref 18:16 Mipum 27:17; Ezk 34:5; Mt 9:36; Mk 6:34;
17 Ahab in, Jehoshafat lakah, “Hi pa in ka humah thupha hilh awng ma ti zuh sing mei? Itik laih hei in thusia bebek hilh,” ti hi.
18 Mikaiah in, “ Topa i awn cu ngai hih un. Topa cu a vancungmi ten a kimkotin cing haw a, vancung a bawi khunnak humah a khun laih mu ing.”
19 Topa in, “Ahab cu Ramoth ah hawhin, thihnak tawk tukin akua in zol tuk kaw? tin, a dot ten vancungmi khenkhat ten thu pa khat hilh haw;” a dang ten phundang hilh haw hi.
20 Hawvang pa khat cu mailamah tulin, Topa cu nek a, “Keimah in zol tung,” ti hi. Topa in, “Itin kaw na zol tuk?” tin, a dot ten,
21 mah hawvangin, “Hawh tung a, Ahab i profet hempoh zolthu sontik khawng tung,” tin don hi. Topa in, “Hawh inna, zolin, zol ngah tuk ci,” ti hi.
22 Mikaiah in, “Na tih bangin hi ngangai haw hi. Topa in profet hempoh cu na lakah zolthu sontik khawng hi. Topa amah in bawngsiatnak na tawhnak tukin a ciangtan zo mi,” ti hi.
23 Mahten profet Zedekiah cu Mikaiah lakah hawhin, Mikaiah biang pen bengvawkin, “ Topa i hawvangin ituk ten kaw kei taisanin, na lakah hungin thu a hilh,” tin dong hi.
24 Mikaiah in, “A thukbel khansungah na ngelh ten theileh tuk poh ci,” tin don hi.
25 Kumpi Ahab in, a khutnuai a bawi pa khat lakah, “Mikaiah hi man inna, khuapi uktu bawi Amon le kumpi i capa Joash lakah hawhpihin hi.
26 Himdamno in ka henleh laklawh thawngah khia henna, thawngta tei an, tui le cangho pia bok hen hi,” tin ti hi.
27 Mikaiah in, “ Topa in himdamno in, na kikleh thei tale,” ka lakah a awn ngawl hi tuk hi. “Ka hilhmi hi mi hempoh ten ngai haw hen,” tin nging zetin au hi.
Ahab Thi
(1Kum 22:29-35)
28 Israel kumpi Ahab le Judah kumpi Jehoshafat cu Gilead ngam a, Ramoth khuapi do tukin hawh haw hi.
29 Ahab in, Jehoshafat lakah, “Ngal a do uhten nang cu na kumpi thuam silh inna, kei cu mi thawthong bangin thuam tung,” ti hi. Israel kumpi cu a melselin ngal cu do hi.
30 Siria kumpi in, a cipuh leng ngalkap hotu bawite cu Israel kumpipa sialngawl midang kuamah liamsuah tuk ngawlin thupia hi.
31 Kumpi Jehoshafat amuh haw ten Israel kumpi heng sa in, hil dudut haw hi. Topa Pathian in, a pat hangin Jehoshafat hiltute kikleh haw hi.
32 Cipuh ngalkap hotu bawi ten Israel kumpi kha ma tih a theih haw ten hil ngawlin cawl haw hi.
33 Siria ngalkap pa khatin, muibatmi nei cuam ngawlin, a thalcang cu kap thawthong a, kumpi Ahab cu a awm lumphaw le ngalthuam pehdunnak kek pen kha hi. “Ahab cu kha haw ei!” tin au in, a cipuh leng mawngtu pa cu ngaldonak mun pen taipih tukin thupia hi.
34 Mah ni a dodun haw cu nasezet a, Ahab cu a cipuhleng hum pen dom copin, Siria ngalkap tei lam hekin zau in nitum ten thi hi.