17
Jehoshafat Kumpi Dek
1 Asa a thih nungten a capa Jehoshafat in Judah kumpi dek a, Israel do tukin a tha ngiltik dedeuh hi.
2 A ngalkapte cu Judah khuapi tampi ah hampa lakah le Asa in Efraim ngam a lakmi khuapi sungte ah koih pepel hi.
3 A pa i khangno a hih laih nun daan zui in, Baal a biak ngawl hangin Topa in Jehoshafat cu muicu pia hi.
4 Jehoshafat in, a pa i biakmi Pathian nadekin, a thupiakmi bangin zui in, Israel kumpi dangte bangin a pha ngawl imah bawl ma hi.
5 Topa amah in Judah ngam komzet uktikin, mi hempohin, a humah lungdamin laksawng a piak susuih haw hangin mihauzet le upat kihcak zetmi in suak hi.
6 Topa i nadeh sunsak zetin Judah ngamsung a, dawi biaknak munsangte le Asher ah milim vang siatsuah khawng hi.
7 Judah kumpi kum thumnak a deh kumin, a nuailam a bawite: Benhail, Obadiah, Zekhariah, Nethanel le Mikaiah cu Judah ngamsung um khua hempoh ah thuzilhtu tukin hah hi.
8 A hum a bawite cu Levi mi kuah; Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah le Tobadonijah le thiampi pa nih Elishama le Jehoram ten zui haw hi.
9 Topa i Daan laibu cawi in, Judah ngam khua hempoh ah hawh a, mipite zilh pepel haw hi.
Jehoshafat i Hauhnak
10 Topa i bawlmi hempoh hangin Judah ngam elkim a, um ngam hempoh ten Jehoshafat do tuk cu ngam haw ma.
11 Filistin mi khenkhat ten Jehoshafat cu laksawng tampi pia in, ngun tampi siahin pia haw hi. Arab mite vangin tuu thawng salih le za salih, keel thawng salih le za salih pia haw hi.
12 Jehoshafat cu khangto dedeuhin, a tha ngil dedeuh hi. Judah ngam sungah an le na khawlnak khua bawlin kulh tiang hi.
13 Kulhtian a bawlmi khua ah thil tamzet koih hi. Jerusalem khua ah ngalbawi le ngalkap phabelte,
14 a namkak kimin koih hi. Judah hinnam sung pen Adnah cu ngalkap hotu bawi hi in, a khutnuai ah ngalkap thawng za thum um haw hi.
15 Pa nihnak cu Jehohanan hi in, a khutnuai ah ngalkap thawng za nih le thawng sawm liat um haw hi.
16 Pa thumnak cu Zikhri capa Amasiah hi a, ngalkap thawng za nih nei hi. Amasiah cu pumpia in, Topa i nadektu hi.
17 Benjamin hinnam sung pen ngalkap hotu bawi cu ngalkap minthangzet Eliada hi a, lumphaw le thalcang hiamnam cawitu ngalkap thawng za nih hotu hi.
18 Eliada sangtu bawi cu Jehozabad hi a, hiamnam kimzet tuah ngalkap thawng za khat le thawng sawm liat nei hi.
19 Hih ngalkapte hi Judah ngam khuapi ah a koihmi ngalkap sial ngawlin Jerusalem a, kumpi nadektu haw hi.