12
Izipt Ten Judah Ngam Do
(1Kum 14:25-28)
1 Rehoboam cu a ngamsung komno uk thei in, kumpi thawmnei a hihbek ten Topa i Daan cu a ukmi mihingte tuah nunghek haw hi.
2 Kumpi a hih sung kum nganakin Izipt kumpi Shishak in Jerusalem do hi.
3 Cipuhleng thawng khat le za nih, cipuh ngalkap thawng sawm luk le ke ngalkap sialcelh ngawl tuah do haw hi. A ngalkap sungah Libia mi, Suk mi le Ethiopia mite tel haw hi.
4 Judah ngam a, kulhtian khuapi hempoh cu Jerusalem khua el tian la hi.
5 Profet Shemaiah cu Shishak lau in, Jerusalem khua pen a tai, Judah mi hotute le kumpi Rehoboam lakah hawhin, “ Topa in Keimah nung na hek uh hangin Shishak khut sungah hengtik bok ing,” ti hi, tin hilh hi.
6 Kumpi le Judah mi hotu ten a sual haw a theih haw ten, “ Topa cu thuman hi,” ti haw hi.
7 Mahti bangin a niamkhiatnak haw thu cu Topa in, amuh ten profet Shemaiah lakah hilh lehin, “Sual ngai ung hi, tih a theihdun haw hangin siatsuah tuk mang. Siatsuahnak pen luat cacang haw tuk a, Shishak in, a do ten Jerusalem in ka thinuknak cu tawk tukma hi.
8 Mahnaven Shishak in neh tuk a, a khutnuai ah a um nung haw ten keima nadeh le leihum kumpi nadeh a dangdun daan theiciang haw tuk,” ti hi.
9 Kumpi Shishak cu Jerusalem khua sung heng ngangai in, Topa i biakinn le kumpi innah a, ummi sum le pai hempoh la khawng hi. A lakmi lak pen kumpi Solomon i bawlmi sui lumphawte vang tel khawng hi.Ref 12:9 1Kum 10:16-17; 2Khang 9:15-16;
10 Mah sui lumphawte ai-in, Rehoboam in daal lumphawte bawlin, kumpi inn kongka cingtu ngalkap hotu bawi tei khutah koih hi.
11 Kumpipa Biakinn ah a hawh sial ten a cingtu ten lumphaw cu cawi leleng haw; mah nungten kongka cingtu tei umnak innah koihleh mek haw hi.
12 Topa i mai ah Rehoboam cu a lungnemmi a hih hangin Topa i thinuknakin siatsuah khawng ngawlin, Judah ngamah nate tuangtungno in umleh thei hi.
Rehoboam Uknak Tawnpi
13 Rehoboam in Judah ngam cu Jerusalem khua pen ukin thawm nei dedeuh hi. Kumpi a deh ten kum sawm li le kum khat kimin, Israel ngam buppi sungah Topa in amah biaknak tukin a tenmi Jerusalem khuapi pen kum sawm le kum salih sung uk. Rehoboam i nu cu Ammon ngammi Naamah hi.
14 Topa i deihnak zui a tum awng ngawl hangin Topa i mai ah thil sual bawl hi.
15 Rehoboam i nadehnak, a pat pepan a bo tian le a innkua tangthute cu Profet Shemaiah Tangthu Laibu le Profet Iddo Tangthu Laibu sungah ngan haw hi. Rehoboam le Jeroboam cu catngawlin dodun leleng haw hi.
16 Rehoboam cu thi in, David khuapi, Jerusalem kumpi khanah vui haw hi. Mahten a capa Abijah in kumpi dek hi.