11
Shemaiah i Thuphuanmi
(1Kum 12:21-24)
1 Kumpi Rehoboam cu Jerusalem khua ah hengin, Benjamin le Judah hinnam sung pen ngalkap phabelte thawng za khat le thawng sawm liat sam khawm hi. Saklam Israel hinnamte do in, ama ukmi in koihleh tum hi.
2 Topa in profet Shemaiah lakah,
3 kumpi Rehoboam le Judah le Benjamin hinnamte hilh tukin profet Shemaiah hahin, amah in,
4 “ Topa i awnkam cu hi tih bangin hi: ‘Na unau uh Israel cu do pahsuh un. Na venghawng uhin, na inn uhah pin khawng unna, hi bangin na a piangmi hi keima piantikmi hi,’ tin,” ti hi. Topa i thupiakmi cu zui in, Jeroboam cu do ngawlin cawlleh haw hi.
Rehoboam In Khuakulh Tiang
5 Rehoboam cu Jerusalem khuapi sungah umin, Judah le Benjamin ngamsung a um khuapi hempoh:
6 Bethlehem, Etam, Tekoa,
7 Bethzar, Soko, Adullam,
8 Gath, Mareshah, Zif,
9 Adoraim, Lakhish, Azekah,
10 Zorah, Aijalon le Hebron cu kulhtian tiangtik hi.
11 Hi khuapi hempoh cu kho zetin kulh tiangtik a, khua tekah hotu bawi koih a, an, olif, situi, sabittui,
12 lumphaw le ceipite koihin, Judah ngam le Benjamin ngam cu uk hi.
Thiampi le Levi Mite Hung Haw
13 Israel ngam khua tihkim pen thiampite le Levi mite cu hanglam a, Judah ngamah hawhsuk haw hi.
14 Israel kumpi Jeroboam le a capa ten thiampite cu Topa i na a dehtik nuam haw ngawl hangin Levi miten a umnak le a lei ngamte cu zamsanin, Judah ngam le Jerusalem khua ah vai haw hi.
15 Jeroboam in dawi biaknak koihin, mahmi ten dawi biaknak le milim biaknak munah thiampi nadek haw hi.Ref 11:15 1Kum 12:31;
16 Topa, Israel i Pathian biak tukin lungmu khencatnak a nei ten a pu le pa tei Pathian Topa lakah biakpiaknak bawl nuamin Israel hinnam dadang tei sung pen le Levi mite tuah Jerusalem ah hawh haw hi.
17 Amuh ten Judah ngam cu khohtik sesemin, kum thum sung cu Solomon i capa Rehoboam phano bawm haw a, kumpi David le kumpi Solomon khanah a nun haw bangin nung haw hi.
Rehoboam Innkua
18 Rehoboam in Mahalath huai in, Mahalath i pa cu David capa Jerimoth le a nu cu Eliab canu le Jesse i tunu Abihail hi.
19 Capa pa thum nei in: Jeush, Shemariah le Zaham na hi haw hi.
20 Mah nungten Absalom i canu Maakah huai in, capa pa li: Abijah, Attai, Ziza le Shelomith nei haw hi.
21 Rehoboam in, a venghawngin zi sawm le liat le zineu sawm luk nei in, capa sawm nih le liat le canu sawm luk hing hi. A zi le zineu hempoh lak pen Maakah deihbelin,
22 a capa hempoh lak pen Maakah i hinnam Abijah a deihbel hangin amah dawntu tukin teng hi.
23 Rehoboam in, a capate cu dehvo komzet semin, Judah le Benjamin ngamsung khuapi kulhtianah koih hi, an a eih haw tukte vang a deihzah haw pia in, zi vang huaisak hi.