13
Abijah le Jeroboam Dodun
(1Kum 15:1-8)
1 Kumpi Jeroboam in Israel ngam a uk sawng kum sawm le kum liat ten Abijah cu Judah kumpi dekin,
2 Jerusalem pen kum thum sung uk hi. A nu cu Gibeah khua Uriel canu Mikaiah hi. Abijah le Jeroboam cu ngaldunin, dodun haw hi.
3 Abijah i mi ngil huaisan tenpengmi ngalkap thawng za li, Jeroboam i mi ngil huaisan tenpengmi ngalkap thawng za liatte cu dodun haw hi.
4 Efraim mualhum ngamah tawngdun haw hi. Kumpi Abijah cu Zemaraim Mualah kai in, “Jeroboam le Israel mite aw, ngai hem un!”
5 Topa, Israel Pathian in David tuah khelhleh theih ngawlmi thutepnak bawlin, David le a casuante cu Israel mi hempoh humah kumpi hi tukin thutiam bawl hi tih thei ma uh cim?
6 Nebat capa Jeroboam in, Pathian i tenmi kumpi Solomon dodalin ngaltho hi.
7 Mah nungten nemcuamnak nei ngawl, mi huatsuakte samkhawmin, Solomon capa Rehoboam cu a bawl nuam ngawlmi na tianin bawltik lo hi. Khangno leita in, ngam uk hei a theihciang ngawl laih hangin a thu cu el thei ma hi.
8 Atu-in, Topa in, David casuan humah a piakmi thuneihnak cu do uh ci. Ngalkap tamzet nei in, Jeroboam i bawlmi sui khui milimte cu na pathian uhin bawlin hunpih uh ci.
9 Topa i thiampi, Aaron i casuante cu hawlvawkin, Levi mite vang hawlvawk khawng uh ci a, hinnam dadang tei bawl bangin na thiampite bawl uh ci. Khuicang pa khat ahimata tuu salih a hunpih thei hempoh cu pathian ahi ngawlmi ka pathian na tih uhmi tei thiampi in suak lelem haw hi.
10 “Mahnaven kohten Topa ka Pathian uh cu nunghek ngawlin ama nadek ung hi. Aaron casuan thiampi ten thiampi nadekin Levi miten bawm haw hi.
11 Zing le tak, Topa i lakah namtui halin, ngan tampi halkang biakpiaknak tukin pia ung hi. Cabuai humah a thiangthomi cangho lui in, taklam sialin sui meivaknak khuam humah meivak ung hi. Topa i thupiaknak bangin kohin zui ung; mahnaven noh ten Topa cu lawl zo uh ci.
12 Atu-in Topa cu keimuh hotubel hi, a thiampite cu pengkul tuah nangmuh do tukin mi samtu tukin ngalling khawng zo haw hi. Israel mite, na pu le pa tei Pathian Topa cu do nuam pahsuh un! Neh cuang tukma uh ci!” tin au haw hi.
13 Jeroboam in, a ngalkap khenkhat cu Judah ngalkapte nunglam pen pang tukin hahin, a khenkhat ten a mailam haw pen do tuk tum haw hi.
14 Judah ngalkap ten khua a zoh haw ten, kil khawng zo haw tih a muh haw hangin Topa i lakah bopnak ngenin au in, thiampi ten a pengkul tum haw hi.
15 Judah ngalkap ten nasezet au in, Abijah ho in, Israel ngalkapte cu do in, zuan tawtok haw; Pathian in Abijah le Judah mitei mai ah Jeroboam le Israel ngalkapte cu neh hi.
16 Israel ngalkapte tai haw a, Pathian in Judah mitei lakah nehnak pia hi.
17 Abijah le a ngalkap ten Israel ngalkapte cu neh dikdek haw in, Israel ngalkap sung pen a phabel thawng za nga that haw hi.
18 Judah miten a pu le pa tei Pathian a muan haw hangin Israel tei humah nehtu hi haw hi.
19 Abijah in Jeroboam i ngalkapte hilin, a khuapi khenkhat; Bethel, Jeshanah, Efron le hi khuapi tei elkim a, um khuanote vang sut hi.
20 Abijah cu kumpi a hih sungin Jeroboam cu tha neileh thei ma toh. Topa in Jeroboam cu a tawpnak ten bawlsia in thi hi.
21 Abijah cu ngil dedeuh hi. Zi sawm le pa li nei in, capa sawm nih le pa nih le canu sawm le pa luk nei hi.
22 Abijah i tangthu, a hilhmi le a bawlmi a dangte cu Profet Iddo Tangthu Laibu sungah ngan haw hi.