28
Biakinn Cungcang David Thucahmi
1 David in Israel ngamsung a, upa le bawi hempoh cu Jerusalem ah hung tukin sam khawm hi. Mah hangin Israel hinnam hempoh a, bawi upate, Israel ngamuktu bawite, a hinnam haw pen hotu khang masate, kumpi le a capate na le ngante cingkhawitu upate hempoh, kumpi inn a bawite, ngalbawite le khuasung upa hempoh Jerusalem khua ah tawkdun khawm haw hi.
2 Kumpi David cu a venghawng haw i mai ah dingin, a lak hawah, ka ngam sungmi u le naute aw, ngai hem un! Thutiam Kuang a kumkhua koihnak tukin le Topa a Pathian uh i umnak tukin inn pa khat sa tum ing. Pathian minthannak tukin biakinn saknak tuk nate vaihawm khawng zo ing.Ref 28:2 2Sam 7:1-16; 1Khang 17:1-14;
3 Mahnaven ngaldotu ka hih hangin thisan tampi luangtik zo ing. Mah hangin Topa in mahmi inn sak tuk cu keimah kham hi.
4 Topa Israel Pathian in keimah le ka casuante cu kumkhua in Israel uktu hi tukin teng zo hi. Judah hinnam cu mi hotu tukin tengin, Judah hinnam sung pen ka pa i innkua cu teng hi. Ka pa i innkua lak pen Israel ngam hempoh uktu lupi hi tukin keimah cu Topa in teng hi.
5 Amah cu capa tampi pia in, mah sung pen Topa i ukmi Israel ngam kumpi hi tukin Solomon teng hi.
6 “ Topa in ka lakah, “Ka Biakinn a satu cu na capa Solomon hi tuk hi. Amah cu ka capa hi tukin teng zo ing a, keimah cu a pa hi tung.
7 Ka daan le ka thupiakmi atu bangin ngalling zetin, a zui leleng tale, a uknak cu kumkhua in khotik tung hi,” ti hi.
8 “Mah hangin ka ngamsung mite, atu-in, na luah uhmi ngampha hi na co theih lelengnak tukin le na casuan tei lakah khangkhat nung khangkhat na sat theih lelengnak tukin Topa a Pathian uh i thupiakte cu komzetno in zui un, tin Topa i mitmuhah le Topa i mihing, hih Israel tei theih cilcelin thucah ing hi.”
9 Mahten nang, “Ka capa Solomon, na pai Pathian cu kihca inna, lungmu khenkhek ngawlin le a thuzui nuamnak lungmu tuah a na cu dek zalin hi. Amah a ngaihsutnak uh le a lungmu uh cu a venghawngin thei khawng hi. A lakah na hawh tale amah in pom tuk hi; mahnaven na nunghek tale kumkhua in nang cu zamsan tuk hi.
10 Topa in, a Biakinn thiangtho satu tukin nang a ten zo hi cing lelengin hi. Mah nadeh cu pan inna, zuam zetin dekin,” ti hi.
11 David in Solomon lakah biakinn sak tukmi pungsan: na koihnak khan, inn khan dadang le sual ngaihdamnak tuk tihmi Mun Thiangthobel i pungsante cu pia hi.
12 A lungmu i tuptahmi Biakinn sung a, khante le a kimkot a, khan tei pungsan, biakinn na koihnak khan le Topa i lakah a piakmi laksawng koihnak khan pungsante vang pia hi.
13 David in thiampi le Levi mitei dehvo biakpiaknak le Biakinn ah a nadeh haw tukte pia khawng hi.
14 Biakinn kho kheng tukin sui le ngun a bo tuk zah,
15 meivaknak tuk le meivaknak khuam tukin sui le ngun a bo tuk zah,
16 Pathian lakah a piakmi canghote koihnak sui cabuai le ngun cabuaite ca tukin sui le ngun a bo tuk zahte kimno in cah khawng hi.
17 Mah humah tungtulte, maihumte le khuat tukin sui ngek izah bo tuk tih le, pakante bawlnak tukin sui le ngun izah bo tuk tihte,
18 namtui halnak biaklandawh le Topa i Thutiam Kuang humah a ha haw phalhin, a ummi Cherubim tihmi a khunnak tuk leng bawlnak tukin sui ngek izah bo tuk tih cu komno in cah cikcek khawng hi.
19 David Kumpi in, “Hi hempoh cu Topa amah hihimin, a khut tuah nganin, ka lakah bawlsuak tukin a cahmite haw hi,” ti hi.
20 Kumpi David in, a capa Solomon lakah, “Khozet le ngalpha zetin um inna, zuam zetin dekin hi, imah in, na thin nautik pahsuh hen. Topa Pathian, ka biakmi Pathian cu na lakah um tuk hi. Nang cu nunghek tukma hi, a zam vang zamthong tukma hi; a Biakinn sak na celh laih ngawl sung cu na lakah um leleng tuk hi.
21 Thiampi le Levi mite cu Biakinn na a deh haw tukin dehvo pia khawng zo ing. Nadektu le khutzung thiamnak a phunkim tuah nangmah bawmtu tukin um haw a, mipi le a hotute cu nangma thu bangin dek tukin mansa khawng haw,” ti hi.