29
Biakinn Saknak Laksawng
1 David Kumpi in, a hengkhawm hempoh tei lakah, “Ka capa Solomon cu Pathian i tenmi hi, mahnaven khangno a hih hangin thil bawl awngmi kha ma laih hi. A nadeh tukmi hi mihing umnak kumpi inn thong hi ngawlin Topa Pathian umnak tuk Biakinn a hih hangin thupi zetmi hi.Ref 29.1-2 1Khang 22:5;
2 Ka tih theih tawkin innsaknak nate cu cum zo ing, sui, ngun, daal, thik, thing, suang manpha le mawitiknak tukin suang phun dadang le suangte cum khawng zo ing.
3 Hi ka khawlsami sialngawl Pathian Biakinn ca in ka ngaihsut leita hangin, keimah hihimin sui le ngun tampi pia ing.
4 Biakinn pangte mawitiknak tukin le khutzung thiam tei deh tukin sui phabelte cuai thawng sawm nga le thawng nih, ngun phabelte cuai thawng za khat val pia zo ing.
5 Nangmu lak pen akua kaw Topa i lakah phalnak tuah a pia tuk?” ti hi.
6 Mahten hinnam sung a lubelte, a hinnam haw pen hotu le upate, ngalkap hotu ngalbawite le kumpi na a cingkhawitu le keemtu hempoh ten,
7 Biakinn saknak tukin pia susuih haw hi. A piak haw mi cu a venghawngin sui cuai thawng sawm liat le thawng liat, ngun cuai za le thawng sawm salih le thawng luk, daal puak thawng sawm le thawng salih, thik puak thawng sawm kuah le thawng nih val hi.
8 Suang manpha a neitu ten biakinn sum kemtu Gershom hinnam Levi mi Jehiel lakah suang manpha pia haw hi.
9 Mipi ten lungtho zetin pia haw in, mah zazah a piak theih haw cu lungdamzet haw hi. David Kumpi vang a lungdamzet hi.
David In Pathian Thangphat
10 David in mipi mai ah Topa thangphat hi, a pu le pa uh Jakob i Pathian Topa, na min cu thangphatin um leleng hen.
11 Topa aw, nang cu Cungnungbel huham neitu, sunloih takbel le a sangbel kumpi hi ci. Lei le van a, na a, ummi hempoh nata hi khawng hi, ihempoh i humah kumpi le uktu bawibel hi ci.Ref 29.11 Mt 6:13;
12 Neihnak le hauhnak hempoh na lak pen hungmi hi, na ngilnak le na huham tuah ihempoh uk khawng ci, na nuam tale, a koi lak hei ah thil tihtheihnak le ngilnak pia theitu ci.
13 Atu-in ka Pathian uh, ka lungdamnak hilh ung a, na min thiangtho thangphat ung hi.
14 “Ka mihingte le keimah in, na lakah ka piak tatak uhmi imah umma hi; itahim titale ka neihmi hempoh uh cu nangma piakmi laksawng ngeh hi, nangmata ahi sami ka piakleh uhmi bek poh hi.
15 Topa aw, na theih bangin, ka pu le pa uhte bangin nunnak lampi ah ngalmatmi le mikhual bangin a vakvai mite ung hi. Ka damsung uh hun hi a paileh theimi nilim bang hi, thihnak pen suakca tukin muansannak nei ma ung.
16 Topa aw, ka Pathian uh, na min thiangtho pahcoihnak tukin hi na hempoh hi cum zo ung. Mahnaven nangma lak pen a hengmi ngeh hi haw hi, a venghawngin nangmata hi khawng hi.
17 Mitei lungmute khingkhai in, lungmu tuang neitu humah na lungdam hi, tih thei ing. Lungmu tuangzet le lungmu tak tuah hi na hempoh pia ing hi, hilai ah a hung mite vangin lungdam thatuino in, na lakah pia haw hi, tih mu zo ing.
18 Topa, ka pu le pa uh Abraham, Isaak le Jakob Pathian, mahtibang piaknuamnak lungmu cu na mihing tei lungmu sungah piaknuamnak neitik inna, na ca in muantak mihing hi tukin hu cingkhawi in hi.
19 Na daan le na thupiakmi hempoh zui theihnak tukin le a nate ka cum khawng sa mi Biakinn cu a sak suak theihnak tukin ka capa Solomon cu ngaihsutnak pha le lungmu cangkim hu pia zalin,” ti hi.
20 David in mipi cu, “ Topa na Pathian uh cu thangphat un,” ti in, mipi ten Topa, a pu le pa tei Pathian cu thangphat haw hi. A lu haw kunin, Topa Pathian le a kumpi haw lakah upatnak pia haw hi.
21 A zingten ngan ngo in, Topa i lakah biakpiaknak le halkang biakpiaknakte bawl haw hi. Khuicang thawng khat, tuucang thawng khat le tuu thawng khat ngo haw in, Israel mipi ten eih tukin, sabit le ngan tampi pia haw hi.
22 Topa i mai ah, in le ei in, mah ni cu lungdam zetin mang haw hi.
David capa Solomon cu kumpi in bawl haw hi. Topa i minin, a kumpi haw tukin sathau thih haw a, Zadok cu thiampi in bawl haw hi.
23 Topa i khotikmi kumpi khunnakah a pa David ai-in Solomon cu khungtik haw hi. Kumpi na cu lawhting zetin dekin Israel mipi ten a thu ngai haw hi.Ref 29.23 1Kum 2:12;
24 Bawi le upa hempoh le ngalkapte le David capa dangte vangin Solomon cu a kumpi haw tukin upatnak thutiam haw hi.
25 Solomon cu a ngam buppi haw in, kihca in Israel ngamuktu kumpi hempoh lak pen sunloihbelmi kumpi in Topa in bawl hi.
David Uknak A Comnak
26 Jesse capa David in Israel ngam buppi cu,
27 kum sawm li sung uk hi. Hebron khua pen kum salih sung ukin Jerusalem khua pen kum sawm thum le kum thum sung uk hi.Ref 29.27 2Sam 5:4-5; 1Khang 3:4;
28 Mihauzet le mitei upat zetmi hi in, tek zetin thi in, a capa Solomon in thek hi.
29 David Kumpi i tangthu cu a bul pen a bo tian profet pa thum, Samuel, Nathan le Gad tei tangthu khumnak sungah kimno in ngan haw hi.
30 Ngam a uk daan, huham a neih daan, a hum a hengmi thu le late le Israel le a elkim ngamte ah a piangmi thu le late vang kimno in ngan haw hi.