27
Ngalkap le Mipi Hodun Daan
1 Israel mi a innkua tek haw a, lubel le a hinnam haw pen hotu tek le a ngamsung haw pen thu vaihawmtu bawite cu a nuailamte hi. Kum khat sungin ha sial hon dadang thekdunin, nadeh nei tek haw a, hon khatah mihing thawng sawm nih le thawng li tenin, ha khat sung hotu tei khutnuai tekah dek haw hi.
2-15 A nuailamte hi, ha khat sung ngalkap hotu hi tek haw hi.
Ha khatnakin: Zabdiel capa Jashobeam. (Amah cu Judah phun, Perez hinnam hi.)
Ha nihnakin: Ahohi casuan Dodai. (Amah bawmtu cu Mikloth hi.)
Ha thumnakin: Thiampi Jehoiada capa Benaiah. Amah cu “Sawm thum” tei hotu hi. (A capa Amizzabad in hotu dek hi.)
Ha linakin: Joab nau Asahel (A capa Zebadiah in hotu dek hi.)
Ha nganakin: Izhar casuan Shamhuth.
Ha luknakin: Tekoa khua mi Ikkesh capa Ira
Ha salihnakin: Pelon pen Efraim mi Helez.
Ha liatnakin: Hushah khua pen Sibbekai. (Amah cu Judah nam, Zerah hinnam sungmi hi.)
Ha kuahnakin: Benjamin hinnam Anathoth khua pen Abiezer.
Ha sawmnakin: Netofah hinnam pen Maharai (Amah cu Zerah casuan hi.)
Ha sawm le ha khatnakin: Efraim hinnam, Pirathon casuan Benaiah.
Ha sawm le ha nihnakin: Netofah hinnam pen Heldai (Amah cu Othniel casuan hi.)
Israel Minam Tei Ukdun Daan
16-22 A nuailamte hi Israel hinnam tei uktu hi haw hi.
Reuben hinnam pen Zikhri capa Eliezer.
Simeon hinnam pen Maakah capa Shefatiah.
Levi hinnam pen Kemuel capa Hashabiah.
Aaron hinnam pen Zadok.
Judah hinnam pen kumpi David i u Elihu.
Issakhar hinnam pen Mikhael i capa Omri.
Zebulun hinnam pen Obadiah capa Ishmaiah.
Naftali hinnam pen Azriel i capa Jeremoth.
Efraim hinnam pen Azaziah capa Hoshea.
Nitumnak lam Manasseh hinnam pen Pedaiah i capa Joel.
Nisuahnak lam Manasseh hinnam pen Zekhariah capa Iddo.
Benjamin hinnam pen Abner capa Jaasiel.
Dan hinnam pen Jeroham capa Azarel.
23 Topa in Israel mite cu van a, aksi zahin tam haw tuk hi tin thutepnak a bawl zo toh hangin, David in Israel mi kum sawm nih nuailamte cu mipumsial ma hi.Ref 27:23 Pian 15:5; 22:17; 26:4;
24 Zeruiah capa Joab in, mipumsial cu pan naven ceng ma hi. Hi mipum sialnak hangin Topa in Israel cu dantat a piak ten kumpi David i cazin sungah a mipum zah ngangai haw cu ngan awng haw ma hi.Ref 27:24 2Sam 24:15; 1Khang 21:1-14;
Kumpi Na Cingkhawitute
25-31 A nuailamte hi kumpi na cingkhawitute haw hi.
Kumpi na koihnak inn cingkhawitu: Adiel capa Azmaveth.
Khuano na koihnak innte cingkhawitu: Uzziah capa Jonathan.
Lo nadektute cingkhawitu: Khelub capa Ezri.
Sabit huan cingkhawitu: Ramah khua pen Shimei.
Sabit ngawinak cingkhawitu: Shefam khua pen Zabdi.
Olif le theipi kungte (nitumnak lam mualbul a umte) cingkhawitu Geder pen Baal Hanan.
Olif situi koihnak inn cingkhawitu: Joash.
Sharon Munlawn khui cingkhawitu: Sharon pen Shitrai.
Mual luam a khuite cingkhawitu: Adiel capa Shafat.
Kalaukte cingkhawitu: Ishmael mi Obil.
Laakte cingkhawitu: Meronoth pen Jehdeiah.
Tuu le keelte cingkhawitu: Hagrite mi Jaziz na hi haw hi.
David i Ngaihsutnak Piatute
32 David i pasel Jonathan cu laithiam sangzet hi a, ngaihsutnak piatu phazet vang hi. Jonathan le Hakmoni capa Jehiel cu kumpi capate lai hilhtu hi haw hi.
33 Ahithofel cu kumpi ngaihsutnak piatu hi, Arkhi khua mi Hushai cu kumpi ngualcam pha le thusiampihtu hi.
34 Ahithofel a thih nungten Abiathar le Benaiah capa Jehoiada ten a ai-awh haw hi. Joab cu kumpi ngalkapte uktu bawi hi.