26
Biakinn Cingtute
1 Biakinn cingtu tei nadeh cu a nuailam bangin khen haw hi. Korah hinnam Asaf casuan sung pen Korah capa Meshelemiah in,
2 capa salih nei in, a kum haw zui in, a sasangin a nuailam bangin hi. Zekhariah, Jediael, Zebadiah, Jathniel,
3 Elam, Jehohanan le Eliehoenai haw hi.
4 Obed Edom vang Pathian muicu dongin capa liat nei in, a kum haw zui in, Shemaiah, Jehozabad, Joah, Sakhar, Nethanel,Ref 26:4 2Sam 6:11; 1Khang 13:14;
5 Ammiel, Issakhar le Peullethai haw hi.
6 Obed Edom i capa upabel Shemaiah in capa pa luk nei in: a hinnam haw sung pen minthang haw hi.
7 A min haw cu, Othni, Refael, Obed, Elzabad, Elihu le Semakhiah haw hi. Nautabel pa nihte cu thil titheizet haw hi.
8 Hi nadehnakah Obed Edom innkua pen thil tihtheihnak a tuam tek nei mihing sawm luk le pa nih um haw hi.
9 Meshelemiah innkua sung pen thil titheizet mihing sawm le liat um haw hi.
10 Merari cikhaih pen Hosah umin, capa pa li nei hi: Shimri (amah cu upabel kha ma naven a pa in hotu in bawl hi.)
11 Hilkiah, Tebaliah le Zekhariah haw hi. Hosah innkua sung pen a venghawngin biakinn cingtu sawm le pa thum um haw hi.
12 Levi mi bangin biakinn cingtute cu a innkua tek haw khenin, biakinn nadeh cu pia haw hi.
13 Kongka cing tukin innkua sang tek pen mihing a tam, a dem ti ngawlin, aisannak bawl ten haw hi.
14 Shelemiah in nisuahnak lam kongka cing tuk ngahin, a capa midang lakah ngaihsutnak pha a pia thei lelengtu Zekhariah in Saklam kongka cing tuk ngah hi.
15 Obed Edom in hanglam kongka cing tuk ngahin, a capate cu na koihnak inncingtu tuk hi haw hi.
16 Shuppim le Hosah in nitumnak lam kongka cing tuk ngahin, saklam hawhnak Shalleketh kongka cingthahtu hi haw tuk hi.
17 Nisuahnak lam kongka cu nisialin mi pa lukin, cing haw hi; saklam cu pa li in, cing haw a, hanglam vang pa li in cing haw hi. Na koihnak inn pa nih cu mihing pa li in, inn khat pa nih veve in cing haw hi.
18 Ni tumnak lam a um na manpha koihnak inn lampi ah pa li um haw in, a inncingtu pa nih um haw hi.
19 Hi cu Korah le Merari innkua tei biakinn a cinnak nadeh dan hi.
A Dang Biakinn Nadehte
20 Adang Levi mite cu biakinn sumpai le Pathian lak a, piakmi na koihnak inn cingtute haw hi.
21 Gershon hinnam sung pen Ladan cu innkua tampi tei pu hi, Jehiel innkua tei pu vang hi bok hi.
22 Hi innkua sung pen Zetham le a unau Joel cu biakinn sumpai le na koihnak inncingtute hi.
23 Amram, Izhar, Hebron le Uzziel casuante vang nadeh piak hi haw hi.
24 Moses capa Gershom hinnam sung pen Shebuel cu biakinn sumpai a cingtu tei hotubel hi.
25 Gershom i unau cu Eliezer hi, mah hangin Shebuel le Shelomith cu innkua in suak haw hi. Eliezer cu Rehabiah pa hi, Rehabiah cu Jeshiah pa hi; Jeshiah cu Joram pa hi; Joram cu Zikhri pa hi; Zikhri cu Shelomith pa hi.
26 Shelomith le a innkuate cu Pathian nelah kumpi David, innkua lubelte, hinkhat sung pen hotute le ngalbawi tei piakmi laksawngte cingtu haw hi.
27 Ngaldonakah a lak haw mi na khenkhatte cu la haw in, Biakinn sung a, manmi na in bawl haw hi.
28 Shelomith le a innkua pihte cu Biakinn sung man tuk na, a piakmi hempoh, profet Samuel, kumpi Saul, Ner capa Abner le Zeruiah capa Joab tei piakmi tianin, a cingtu haw hi.
Levi Mi Adang Tei Dehvo
29 Izhar casuan sung pen khenaniah le a capate cu zung nadektu, cazin lentu le mipi tei thukhentu haw hi.
30 Hebron casuan sung pen Hashabiah le a innkuapihte minthangzet, mihing thawng khat le za salih cu Jordan Ngun pen nitumnak lamah biaknak lam thu hihen, nisial mipi tei a nunnak haw i thu le la hihen, vaihawmtu le ngaisungtute haw hi.
31 Hebron casuan lak pen Jeriah cu a hotubel hi. David kumpi a dehnak kum sawm li kumin, Hebron i casuan tei thu le la a dotkan haw ten ngalkap minthangzet Gilead ngam Jazer khua ah a umlam thei haw hi.
32 Mah hangin David in Jeriah i innkuate, a hinnam sung haw pen minthang le lubelte, mihing thawng nih le za salih tengin Reuben ngam, Gad ngam le nisuahnak lam Manasseh ngamsung a biaknak lam thu le nisial a nunnak haw cungcang vaihawmtu le vaisiamtu tukin koih haw hi.