25
Lasatu le Awnmawi Tumtute
1 David le Levi mi lak pen hotu ten a nuailam a hinnamte cu Pathian biaknakah hotu tukin teng haw hi. Asaf, Heman le Jeduthun. Amuhte cu tingtang le daakkop tuah Pathian i thuthantu haw hi. Pathian biak ten amu nadehnak ten pen a nuailamte cu hotu a tenmi haw hi.
2 Asaf i capa pa lite cu: Zakkur, Josef, Nethaniah le Asarelah haw hi. A hotu haw cu Asaf hi in, kumpipa in thu a piak ten Pathian i thu cu phuang mek hi.
3 Jeduthun i capa pa luk: Gedaliah, Zeri, Jeshaiah, Shimei, Hashabiah le Mattithiah. A pa haw in pui a, tingtang tumthahin, Pathian thu cu phuangin, Pathian thangphatnak lasa haw hi.
4 Heman capa sawm le pa lite cu: Bukkiah, Mattaniah, Uzziel, Shebuel, Jerimoth, Hanani, Eliathah, Giddalti, Romamti, Ezer, Joshbekashah, Mallothi, Hothir le Mahazioth haw hi.
5 Heman cu Pathian profet hi, a tepsa bangin Heman lak a sunloihnak huham pia tukin Pathian in Heman cu capa sawm le pa li le canu pa thum pia hi.
6 Biakinn a, Pathian biak hun ten a pa haw i hoha in, tingtang le daakkopte le phaidaakte a venghawng haw in tum haw hi. Asaf, Jeduthun le Heman cu kumpi thupiakmi ngai in, a umte haw hi.
7 Hi pano sawm nih le pa lite cu a bawl haw hempoh pen a thiam theizet haw hi. A nadehpih haw Levi mite vang lasa thiam le awnmawi tum thiam ngeh haw hi. A venghawng haw in, za nih le sawm liat le liat haw hi.
8 A nadeh haw tukmi ten tuk ten khangno hihen, upa hihen, la thiamsate hihen, a cungsemte hei hihen a venghawng haw in aisan tek haw hi.
9-31 Hi mihing za nih le sawm liat le liatte cu amuh le a innkuapih tek haw zo in hon sawm nih le hon li khenin, khenkhatah mihing sawm le pa nih ten hi haw hi. Hon khatin, hotu pa khat ten nei haw in, a nuai lam bangin a hun tekmi tekah nadek haw hi.
Pa khatnak cu Josef, Asaf hinnam hotu hi.
Pa nihnak cu Gedaliah.
Pa thumnak cu Zakkur.
Pa linak cu Izri.
Pa nganak cu Nethaniah. Pa luknak cu Bukkiah.
Pa salihnak cu Jesharelah.
Pa liatnak cu Isaiah.
Pa kuahnak cu Mattaniah.
Sawmnak cu Shimei.
Sawm le pa khatnak cu Uziel.
Sawm le pa nihnak cu Hashabiah.
Sawm le pa thumnak cu Shubael.
Sawm le pa linak cu Mattithiah.
Sawm le pa nganak cu Jeremoth.
Sawm le pa luknak cu Hananiah.
Sawm le pa salihnak cu Joshbekashah.
Sawm le pa liatnak cu Hanani.
Sawm le pa kuahnak cu mallothi.
Sawm nihnak cu Eliathah.
Sawm nih le pa khatnak cu Hothir.
Sawm nih le pa nihnak cu Giddalti.
Sawm nih le pa thumnak cu Mahazioth.
Sawm nih le pa linak cu Romamti Ezer.