20
David In Rabbah Khua La
(2Sam 12:26-31)
1 Khuakhal sungin kumpite a ngaldo hun haw a heng ten, Joab le a ngalkapte cu hawh haw a, Ammon ngam do haw hi. A khuapi haw Rabbah cu kil khawng haw hi. David cu Jerusalem ah umlaihin, Joab in Rabbah cu do in siatsuah khawng hi. Ref 20:1 2Sam 11:1;
2 Ammon miten Molek milim nei haw in, a sui lukhuh cu cuai sawm nih ngit hi. A sungah suang manpha um a, mahmi cu David in, a kumpi lukhuh tukin bawl hi. Khuapi sung a sum le pai tampi vang la hi.
3 Khuasung mite pui in, hluah, phailai le heipi tuah nadektik hi. Ammon ngam khua dangte vang mahtibang lelengin bawl hi. Mah nungten ngalkapte tuah Jerusalem ah kik haw hi.
Filistin Mi Ngengzet Do Haw
(2Sam 21:15-22)
4 Mah nungten, Filistin mite tuah Gezer ah dodun haw a, Israel miten neh haw hi. Hushah mi Sibbekai in tawmi tia Sippai a tih haw cu that hi.
5 Filistin mite tuah dodun leleu haw a, Jair capa Elhanan in Gath mi Goliath i unau Lahmi cu that hi, a ceilu cu thiampheng tia hi. Ref 20:5 1Sam 17:4-7;
6 Gath pen dodun lehleu haw a, mah khua ah a khut langkhat lamah khutzung pa luk veve le kezung pa luk veve neimi um hi. Amah cu tanglaih a, mi ngengzet tei casuan hi.
7 Israel mite cu langpangin, David i unau Shammah capa Jonathan in amah cu that hi.
8 Hi mihing pa thumte hi David le a ngalkap ten that haw in, Gath khua a, mi ngengzet tei casuan haw hi.