19
David In Ammon le Siria Mi Neh
(2Sam 10:1-19)
1 Hun a ngei deuh ten Ammon kumpi Nahash thi in, a capa Hanun cu kumpi dek hi.
2 David in, “A pa Nahash cu ka humah a phat bangin Hanun humah ngualcam pha ka hihnak langtik bok tung hi,” ti hi. Mah hangin Hanun tohpih tukin David in ama ai-awhin palai hah hi.
Ammon ngam heng haw in, kumpi Hanun lakah a hawhleh ten,
3 Ammon ngam hotu upa ten a kumpi lak hawah, “Na pa upatnakin David in hi palai a hahte cu nangmah tohpih tukin hah hi, tin ngaisung cim? Mahti bangin na ngaisung ahi tale khial tatak tuk ci! A ngamah neh nuamin hite hi zawldawttu in, a hahmi hi saw ven,” ti haw hi.
4 Hanun in David palai hahte cu manin, a khamul haw met khawngin, a angki cualpite cu a tai haw tuah cankimin, a tansak khawng nungten hah hi.
5 A zakca haw a, inn hei ah pin ngam haw ma hi. Mah thu cu David in, a zak ten a khamul haw a sau laklawh Jerikho ah um tukin thucah hi.
6 Kumpi Hanun le Ammon miten David cu ngalin a cantik haw cu a theihleh haw ten ngun tangka cuai thawng sawm le thawng liat le za liat pia in humlam Mesopotamia le Siria khuapi Maakah le Zobah pen a pua tukin ngalkap cial haw hi.
7 A cial haw mi cipuhleng thawng sawm thum le thawng nih le Maakah kumpi ngalkapte cu hung haw in, Medeba elah sihsan khualnak bawl haw hi. Ammon mite cu a khua tek haw pen tul haw in, ngaldo tukin mansa in um haw hi.
8 Mah thute cu David in, a zak ten ngalbawi Joab le Israel ngalkap venghawngin mahte do tukin hawhtik hi.
9 Ammon mite cu tul haw in, Rabbah khuapi khuahialah sihsankhual haw hi. Amah bawm tukin a hung kumpite cu hampa lakah sihsankhual haw hi.
10 Ngal ten mailam le nunglam pen do haw tuk tih cu Joab in, a theih ten Israel ngalkap lak pen ngalkap a phabelte tengin Siria ngalkapte do tukin pangtik hi.
11 Adang Israel ngalkap hempoh cu a unau Abishai hotikin, Ammon ngalkapte do tukin pangtik bok hi.
12 Joab in Abishai lakah, “Siria ngalkap ten kei a neh haw tale hu bawmin hi. Ammon ngalkap ten nang a neh haw tale bawm tung hi.
13 Ngilzet le ngalpha zetin, na umin! A hinnam uh le a Pathian uh i khuapi hup tukin nase zetin do tuk hung hi. Topa i deihnak bangin hi tahen,” ti hi.
14 Joab le a ngalkap ten do tawtok haw a, Siria ngalkapte cu tai khawng haw hi.
15 Siria ngalkapte tai haw tih Ammon ngalkap ten a zak haw ten Abishai do ngam ngawlin taikeh khawng haw in, khuapi sungah kik khawng haw hi. Mah nungten Joab cu Jerusalem khua ah pin hi.
16 Israel miten neh niknek haw tih Siria miten a zak haw ten Eufrates ngun nisuahnak lam a um Siria ngamsung mihingte cu ngalkap tuk la in, Zobah peng kumpi Hadadezer i ngalkap hotu upabel Shobak uktik haw hi.
17 Mah thu cu David in, a zak ten Israel ngalkapte cu samkhawm leleu in, Jordan ngun a kaltan nungten Siria ngalkap do tukin sihsan khual hi. Dodun haw a,
18 Israel miten neh leleu haw hi. David le a ngalkap ten Siria cipuh ngalkap thawng salih le ke ngalkap thawng sawm li that haw hi. Siria ngalbawi upabel Shobak vang that haw hi.
19 Kumpi Hadadezer khutnuai kumpi ten Israel ngalkap ten neh khawng haw tih a zak haw ten David tuah lemdaihnak bawlin, a ukmi in suak haw hi. Mahnung siah cu Siria miten Ammon mite cu bawm nuam haw ma toh hi.