21
David In Mipum Sial
(2Sam 24:1-25)
1 Satan in, Israel humah haksatnak hentik a nuam hangin David cu thusia so in, Israel mipum sial nuamnak lungmu neitik hi.
2 Mah hangin David in Joab le a ngalbawi dadang tei lakah, “Israel ngam langkhatlam a mawk a um Beersheba pen langkhatlam mawk, Dan tian hawh unna, mipum sial un. Mihing i zah um him tih thei nuam ing,” tin thupia hi.
3 Joab in, “ Topa in Israel mite cu atu sangin a letza in, pungzaitik zal hen! Itizah a tam haw hei in Bawipa nangmah cu a kumpi haw hi ci a, a venghawng haw in, na sal hi leng haw poh hi. Ita a mipum haw cu sial nuam li cim? A mipum haw na sialceng ngangai ahi tale Israel hinnam cu mi mawhin, suaktik tuk ci!” ti hi.
4 David in, a thu cu ngai nuam kha ma hi. Mah hangin Joab cu Israel ngam bupah hawhin mah nungten Jerusalem ah kik hi.
5 Kumpi David lakah thutheitikin, “Ngalkap dek thei tuk bebek Israel ah million khat le thawng za khat le Judah ah thawng za li le thawng sawm salih um haw hi,” ti hi.
6 Joab in David i thupiakmi a lung a kim ngawl hangin Levi mi le Benjamin mitei mipum cu sialsak nuam ma hi.
7 Mahti bangin a bawlmi humah Topa cu a lungdam ngawlin Israel cu dantat hi.
8 David in, “ Topa aw, thilpha ngawlzet ka bawl hangin sual zo ing. Ngaidam zalin hi. Sil nadeh dek kha ing,” ti hi.
9 Topa in, David i profet Gad lakah,
10 “Hawh inna, David hilhin hi: a ten tuk pa thum pia ing; mah sung pen pa khat teng henna, mahmi cu bawlsuak tung hi,” ti hi.
11 Gad cu David lakah hawhin, Topa i awn cu hilh hi. “Ikaw na ten tuk?
12 Kum thum sung paam maw? Ahimata ngal tei ha thum sung hil le hual niknek kaw? Ahimata ni thum sung Topa i ngalnam cu a vancungmi in mangin Israel ngam sungah natsia le thihnak hentik maw? Pa kha khat teng inna, mahmi cu Topa hilh tung,” ti hi.
13 David in Gad lakah, “Ka aicangzet ing! Mahnaven mihing khutsung hen tuk sangin Pathian khutsung heng nuam saw ing, itahim titale Topa cu hehpihnak neitu hi,” ti hi.
14 Topa in Israel mi humah pulhnat hengtikin, thawng sawm salih thi haw hi.
15 Pathian in Jerusalem siatsuah khawng tukin vancungmi hah hi; mahnaven a lungmu khellehin, vancungmi lakah, “Cawl inna, tawk toh hen,” ti hi. Vancungmi cu Jebus mi Araunah i cangcilnak pual elah ding hi.
16 David in, a zoh ten van le lei laklawhah Jerusalem siatsuah tukin namsaupi cawi in, vancungmi dingleng na mu hi. David le Israel mi hotute cu thangkhau puan silhin, a mai haw lei tawngkha tian kuun haw hi.
17 David in, “Maw Pathian aw, a sualtu cu keimah ing. Mipum sial tukin thu piatu cu keimah ing. Hi ten i bawl sualmi i kaw a neih haw? Topa aw, ka Pathian, keimah le ka innkua hi bawlsia inna, hi na mihing, na tuuhon hi cu suakcatik zalin hi,” tin thungen hi.
18 Topa i vancungmi in Gad lakah, “David cu hawh henna, Topa ca tukin Jebus mi Araunah i cangcilnak munah biaklandawh bawl tukin thupia in hi,” ti hi.
19 Topa i thupiakmi cu Gad i hilh bangin David in zui hi.
20 Araunah le a capa pa lite cu sangvut cil li haw hi. Vancungmi amuh haw ten a capate cu tai in, ngelh haw hi.
21 Araunah in kumpi David ama lamah a hunlih amuh ten manlang zetin tai in, a mai lei tawngkha in David mai ah kuun hi.
22 David in, “Na sangvut cilnak mun hi keimah zuakin hi; Topa i ca in, biaklandawh bawl nuam ing. Mahti ngawlin pulhnat hi cawl tukma hi. Aman cu na nget zah pia tuk poh ing,” ti hi.
23 Araunah in, “Bawipa, la pohin hi, na deih bangin mang pohin hi. Biaklandawh hum a halkang biakpiaknak tukin hilai hah khuicang um haw hi, thing tukin sangvut cilnak dawhmi suatte vang um hi; canghovam biakpiaknak tukin sangvut vang um leng hi. Pia khawng tung,” ti hi.
24 Kumpipa in, “Mah ma hi, a man kimno in pia tung. Nata cu a thawnthongin la tuk mang, a man ka piak ngawlmi cu Topa i lakah pia nuam mang,” ti hi.
25 Araunah cu sui tangka cang za luk pia hi.
26 Mahlai pen Topa i ca tukin biaklandawh bawlin halkang biakpiaknak le pawlkom biakpiaknak bawl hi. Thungenin, a thungetnak Topa in, a theihpih hangin van pen mei khesuk a, biaklandawh humah a piakmi biakpiaknakte cu kang khawng hi.
27 Topa in vancungmi cu a namsau koihleh tukin thupia a, koihleh hi.
28 Mahmi cu David in, amuh ten Topa in ka thungetnak theihpih hi tih thei in Araunah cangcilnak munah a bawlmi biaklandawh humah biakpiaknak bawl hi.
29 Topa i umnak puanbuk, Moses in ngamkhingah a sakmi le biakpiaknak a halnak haw biaklandawh cu mah hun laihin, Pathian a biaknak mun haw Gibeon ah umlaih hi.
30 David cu Topa bia tukin mahlai munah hawh ngam ma hi; itahim titale Topa i vancungmi tei namsaupi cu lau vawk hi.