18
David Ngalnehnak
(2Sam 8:1-18)
1 Dawm a ngei nungten David in Filistin mite do in neh hi. Gath khuapi la a, elkim khuano vang la khawng hi.
2 Moab mite do in neh hi. A khutnuai mihingah suak haw in, siah pia haw hi.
3 Siria ngamsung Zobah peng kumpi Hadadezer in Eufrates Ngun naaklam ngamte neh tukin a hawh laihin, Hamath ngam elah David in do in neh hi.
4 David in, a cipuhleng thawng khat, cipuh ngalkap thawng salih le ke ngalkap thawng sawm nih man hi. Cipuh leng za khat ca in, cipuh khawihin, adang cu a za haw satcat khawng hi.
5 Damaskas a, um mi Siria miten kumpi Hadadezer bawm tukin ngalkap kuat haw hi. Mahte cu David in nehin, ngalkap thawng sawm nih le thawng nih that hi.
6 A ngamsung hawah a ngalkapte cu koihin, a ukmi in suak haw a, siah pia haw hi. Topa in David cu khua tihkimah nehtu hitik hi.
7 Hadadezer khutnuai bawi tei cawimi sui lumphawte cu David in lonsak a, Jerusalem ah pinpih hi.
8 Hadadezer i ukmi Tibbath le Kun khuapi pen daal tamzet la hi. Mahte tuah Solomon in biakinn sung a, khokhengte, khuamte le maihum ngengpite bawl hi. Ref 18:8 1Kum 7:40-47; 2Khang 4:11-18;
9 Hamath kumpi Toi in, David in Hadadezer i ngalkapte neh khawng tih za hi.
10 Kumpi David pahcawi tukin le lungdampih tukin Toi in, a capa Joram hah hi; itahim titale Toi in, Hadadezer cu vei tampi a do sa mi hi. Joram in David cu sui, ngun le daal tuah bawlmi na tampi laksawngin pia hi.
11 Mah nate cu David in Edom mi, Moab mi, Ammon mi, Filistin mi le Amalek mitei lak pen a lonmi sui le ngunte tuah Topa i biaknakah man tukin pia hi.
12 Zeruiah capa Abishai in Edom mite cu Ci munlawnah thawng sawm le thawng liat that hi. Ref 18:12 Saam 60 Thulu
13 Edom ngam sungah ngalkap koihin, Edom mite cu David i ukmi in suak haw hi. Topa in David cu khua tihkimah nehtu hitik hi.
14 David in Israel ngam cu ukin, a mihing tei humah dikcangnak tuah thulaikhen hi.
15 Abishai i u Joab ngalbawi upabel hi. Ahilud capa Jehoshafat cu ngampi cazin lentu hi.
16 Ahitub capa Zadok le Abiathar capa Ahimelek cu thiampi haw hi. Seraiah cu kumpi zungah laingantu dek hi.
17 Jehoiada capa Benaiah cu kumpi cingkhawitu Kereth mi le Peleth mitei hotu hi. David capate cu nadeh ngengpi dekin a pa i nadektu hi haw hi.