17
David Lak A Nathan Otmi
(2Sam 7:1-17)
1 David Kumpi cu atu-in, a kumpi innah um hi. Ni khat cu David in profet Nathan samin, a lakah, “Kei cu Sidar thing tuah sakmi innah um ing, mahnaven Topa i Thutiam Kuang cu puanbuk sungah koih hung,” ti hi.
2 Nathan in, “Pathian cu na lakah a um hangin na lungmu sung a ummi cu bawl pohin hi,” tin ti hi.
3 Mah zanin, Pathian in Nathan lakah,
4 “Hawh inna, ka salpa David lakah, Ka umnak tukin biakinn a satu tuk cu nang hi tukma ci.
5 Israel mite Izipt ngam pen ka puitul pepan tuni tiangin biakinn sungah um awng mang; ka umnak cu puanbuk hi a, mun khat pen munkhatah thawn pepel ing.
6 Israel mite tuah ka khualzinnak hempoh pen ka tenmi a hotu haw kuamah in ka umnak tukin biakinn a sahsak haw ngawl, tin ti awng mang,” tin hilhin hi.
7 “Ka salpa David lakah hilh inna, Keimah Cungnungbel Topa in amah ka hilh nuam mi cu, ‘Hampalak tuu na khalhnak pen la ing a, ka mihing Israel uktu in bawl ing.
8 Na hawhnak mun tihkimah na lakah um ing, ka lampi a, na ngal hempoh cu nehsak khawng ing. Leihumah mi ngengbel bangin na min cu thangtik ing.
9-10 Kuamah in nang a bawlsiat theih haw ngawlnak tukin amu ca in mun teng ing a, ka hinnam Israel mite cu umtik ing. Hi ngam a hen haw bek ten mi siatsuah bek a nuamtu ten do leleng haw, mahnaven tunung mailam ten mahtibang cu umleh tukma toh. Na ngal hempoh neh tukin le casuan tampi nei tukin thutiam ing.
11 Na thih ni kimin, na pu le pa tei lakah vui na hih nungten na capa tei sung pen pa khat cu kumpi in bawl tung a, a uknak cu caktik tung hi.
12 Ka ca in amah in biakinn sa tuk a, a uknak cu kumkhua in khotik tung hi.
13 Keimah cu a pa hi tung a, amah cu ka capa hi tuk hi. Nangmah kumpi suaktik nuamin ka hawlvawkmi Saul ka taisan bangin amah cu taisan tuk mang hi. Ref 17:13 2Kor 6:18; Heb 1:5;
14 Ka hinnam le ka uknak zotu tukin le kumkhua cing lelengtu tukin bawl tung hi. Ama uknak cu bo awng tukma,’ ” ti hi.
15 Pathian i phuanmi hempoh cu Nathan in David hilh khawng hi.
David Lungdam Thungetnak
(2Sam 7:18-29)
16 David Kumpi cu Topa i umnak puanbukah hawhin, a khun nungten thungen hi: Maw, Topa Pathian, keimah le ka innkua humah na bawl mite hi ka ngaihsut ten tak hihim mang.
17 Hi sangin thupi deuh ka ca in tumtah ci a, ka casuan tei mailam kum tampi ca tianin thutepnak bawl zo ci, Topa Pathian, kei hi mi ngengzet bangin zo ci.
18 Hi tei humah ikaw kei in ka hilh theih tuk toh? Na salpa kei hi thei khawng zo navecin, hi bang lawlawm na cawisan leita hi!
19 Hi tibang ka ca in bawl le mailam ka sunloihnak muh hi na deih mi le na tuptahmi hihim na hi!
20 Maw, Topa, nang bang kuamah um haw ma, nangmah bek Pathian hi ci.
21 Saltannak suahtulin, na hinnamin, na bawlmi Israel mi bang leihumah um haw ma hi. A lak haw a, nalamdang thasiahhuai na bawl hangin, leihumpi ah na min cu thang khawng hi. Izipt ngam pen na mihing cu suaktikin, mailam a nawk haw ten hinnam dangte cu hawlvawk khawng ci.
22 Kumkhua in Israel cu na mihingin bawl zo ci, maw, Topa nang cu a Pathian haw hi zo ci.
23 “ Topa, aw, atu-in keimah le ka casuan tei humah thutepnak na bawlmi cu kimtik inna, bawl tung na tihmi cu bawlsuak zalin hi.
24 Na min cu thang tuk a, mi hempohin, ‘Cungnungbel Topa cu Israel humah Pathian hi,’ tin kumkhua in ti haw tuk hi. Ka uknak cu a kumkhua in khotik tuk hi.
25 Na salpa ka lakah, na tuptahmi phuang ci, ‘Na casuante cu kumpi hi haw tuk hi,’ tih tianin, na hilh zo toh hangin hi thungetnak haw hi na lakah ka het ngamnak hi.
26 Maw, Topa, nang cu Pathian hi ci, hiti bang thasiahhuai thutepnak hi ka lakah bawl zo ci.
27 Na mitmai pha mutu a hih lelengnak haw tukin ka casuante cu muicu pia zalin, tin hehpih kun ing. Topa nangmah in muicu pia zo ci, na muicu cu a hum hawah kumkhua in um zal hen,” ti hi.