16
1 David i Sakmi puanbukah Thutiam Kuang cu hawhtum pihin, a sungah koih haw hi. Halkang biakpiaknak le pawlkom biakpiaknak cu Topa i lakah pia haw hi.
2 David in mah biakpiaknakte cu a celh ten mipite cu Topa i minin muicu pia in,
3 an sem hi. Israel mi venghawngin numei hihen, pano hihen, mihing pa khatah cangho phil khat ten, cik kio tel khat ten le sabitko dawmlaih ten pia hi.
4 David in, Levi mi khenkhatte cu Thutiam Kuang mai a, nadektu tukin le thangphatnak le lasaknak tuah Topa Israel Pathian a biatute hotu tukin koih hi.
5 Mah tei lak pen a hotu haw cu, Asaf hi in, a bawmtu cu Zekhariah hi. Jeiel, Shemiramoth, Jehiel, Mattithiah, Eliab, Benaiah, Obed Edom le Jeiel hei in bawm haw hi. Amuh cu tingtang tumtu hi haw a, Asaf cu daakkop khengtu hi.
6 Thiampi pa nih Benaiah le Jahaziel cu Thutiam Kuang mai ah a hun kim sial ten pengkul tum lelengtu haw hi.
7 David in Asaf le a unau Levi mite cu Pathian thangphat tuk dehvo a piak masabelte haw hi.
Topa Thangphatnak La
(Saam 105:1-15; 96:1-13; 106:1, 47-48)
8 Topa cu thangphatnak pia un;
A thawm ngengnak cu
phuang un.
A bawlmi nate cu
mi hempoh lakah than un.
9 Topa i lakah
thangphatnak la sa un,
Na lamdang a bawl zo hangin hi.
10 Amata a hih uh hangin
na lung uh dam un,
Amah biatu hempoh ten
na lung uh dam un.
11 Topa i lakah bopnak
ngenin hung un,
Cawlngawlin amah bia un.
12 Thasiahhuai a bawl mite
phawk unna,
a lamdang thukhennak vang
phawk un.
13 Pathian salpa Jakob i casuante,
Pathian tenmi Israel casuante,
ngaisung hem un.
14 Topa cu a Pathian uh hi,
A thupiakmi cu
leihum buppi ah dim hi;
15 Pathian i thutepmi cu
phawkngil hihim pahsuh un,
Kumkhua phatin, a bawlmi hi;
16 Abraham lakah a thutepnak le
Isaak lakah a thutiamnak. Ref 16:16 Pian 12:7; 26:3;
17 Topa in Jakob lakah
thutepnak bawl hi,
Kumkhua phaat tukin bawl hi. Ref 16:17-18 Pian 28:13;
18 “Kanaan ngam pia tung,”
“Nata hi leleng tuk hi,” ti hi.
19 Pathian i mihingte cu
demno haw hi,
Kanaan ngamah mikhualin
suak haw hi.
20 Ngam khat pen ngam khatah
vak haw hi,
Uknak mun khat pen
mun dangah thawn haw hi.
21 Hi naven kuamah nuainem ma hi.
Pathian in humhimin,
amuh a pat hangin kumpite cu
vonek hi. Ref 16:21-22 Pian 20:3-7;
22 “Ka tenmi ka mihingte cu
tawngkha pahsuh un;
Ka profet zen kha pahsuh un,”
ti hi.
23 Leihumpi in Topa cu thangphat un;
Nisialin ohte a patnak
thuthangpha cu phuang un.
24 Minam hempoh lakah
a sunloihnak than un;
Miphun hempoh tei lakah
a huham neihdan hilh un.
25 Topa cu a thawmngengzet hi,
pathian dangte sangin
nase zetin upat tukmi hi.
26 Miphun dang tei pathian cu
a milim bek hi;
Mahnaven van a ummi
na hempoh cu
Topa i semsuah mi haw hi.
27 Amah cu huham le sunloihnak tuah
kil khawng hi;
A biakinn cu huham le
lungdamnak tuah dim hi.
28 Leihum mi hempoh ten
Topa cu thangphat un;
A huham le a sunloihnak cu
pahcawi un.
29 A min sunglawi pahcawi ten un;
Biakpiaknak tuah
a biakinn ah hung un,
Thiangthobel a lang ten
a mai ah kun un;
30 Leihum mi hempoh a mai ah
cantawtokin um haw hen,
Leihumpi a dinmun kho zia hi,
thawn theih tuk hi ma toh hi.
31 Maw lei le van, na lungdam un;
Topa cu kumpi hi tin
mi hempoh lakah than un.
32 Au un, tuipi le a sung a ummite,
Lungdam un, leingam le
a hum a ummite.
33 Leihum uk tukin Topa a hun ten,
Tupi sung thingkungte
lungdamin au haw tuk hi,
34 Topa i lakah
na lung uh dam un;
Amah cu pha hi, a ihnak cu
kumkhua in kho hi. Ref 16:34 2Khang 5:13; 7:3; Ezr 3:11; Saam 100:5; 106:1; 107:1; 118:1; 136:1; Jer 33:11;
35 A lakah, “Maw Pathian aw,
hu pan zalin;
Munkhatah khawmdun khawm unna,
minam tampi tei khut sung pen
hupin; mahten na humah
ka lung uh dam tuk a,
na min thiangtho cu
thangphat tuk ung,”
ti un hi.
36 Topa, Israel Pathian cu
thangphat un;
Amah cu kumkhua pen
kumkhua tianin thangphat un,
Mahten mipi ten, “Amen” ti haw in, Topa cu thangphat haw hi.
Jerusalem le Gibeon Ah Pathian Biaknak
37 David in Asaf le a unau Levi mite cu Thutiam Kuang koihnak munah nadek lelengtu tukin koih hi. Nisialin, a dehvo haw cu bawlsuak haw tuk hi.
38 Amuh bawmtu tukin Jeduthun capa Obed Edom le a hinpih mihing sawm luk le liat um haw hi. Hosah le Obed Edom cu kongkhah cing tuk vangin dehvo nei haw hi.
39 Thiampi Zadok le a unau thiampite cu Gibeon a um, Topa i biaknak munah nadektu haw hi.
40 Topa in Israel tei lakah a piakmi Daan sung a um bangin thiampi ten zing le taksialin halkang biakpiaknak bawl leleng haw hi.
41 Amuh tuah munkhatin, Heman le Jeduthun le a cuang a ten mite cu Topa i itnak kumkhua a kho mi thangphat tukin um haw hi.
42 Thangphatnak la a sak haw ten a tum haw mi pengkul, daak, daakkop le tum theihmi nate cu Heman le Jeduthun ten zo thah bok haw hi. Jeduthun i unaupih ten kongkhah cing haw hi.
43 Mipi cu innah pin haw a, David vang a innah pin bok hi. Ref 16:43 2Sam 6:19-20;