15
Thutiam Kuang Thawn Tum Haw
1 David in ama ca in, Jerusalem ah inn tampi sa hi. Pathian Thutiam Kuang koihnak tukin mun pa khat koihin, mahlai ah puanbuk sa hi. Ref 15:2 Daan 10:8;
2 David in, “Levi mite cu Thutiam Kuang puatu tuk le ama nadektu tukin Pathian tenmi a hih haw hangin amuh bekin, Pathian Thutiam Kuang cu pua haw tuk,” ti hi.
3 Puanbuk a sakmi sungah Thutiam Kuang koih tukin Israel mite cu David in Jerusalem ah sam khawng hi.
4 Mah nungten Levi mite le Aaron casuante sam hi.
5 Kohath hinnam pen Uriel hungin, a hinpih mihing za le sawm nih hotu hi.
6 Merari hin pen Asaiah hungin a hinpih mi za nih le sawm nih hotu hi.
7 Gershon hinnam pen Joel hungin a hinpih za le sawm thum hotu hi.
8 Elizafan hinnam pen Shemaiah hungin, a hinpih za nih hotu hi.
9 Hebron hinnam pen Eliel hungin, a hinpih mihing sawm liat hotu hi.
10 Uzziel hinnam pen Amminadab hungin, a hinpih mihing za le sawm le pa nih hotu hi.
11 David in thiampi Zadok, Abiathar le Levi mi; Uriel, Asaiah, Joel, Shemaiah, Eliel le Amminadab cu samin,
12 a lak hawah, “Noh hi Levi hinnamte hotu hi uh ci. Ka saksami inn sungah Topa Israel Pathian i Thutiam Kuang na koih theihnak tukin nangmuh le na Levi hinpihte cu thiangtho un.
13 Hilai a na tel uh hi masabel hi sapma hi; Topa i lungkim bangin a biak uh ngawl hangin, Topa a Pathian uhin ohte cu bawlsia,” ti hi.
14 Topa, Israel Pathian i Thutiam Kuang la tukin thiampite le Levi mite cu thianthohnak bawldun haw hi.
15 Levi miten Thutiam Kuang cu a ko hawah lang tuah zawng haw in, Moses lak a, Topa i thupiaknak bangin bawl haw hi. Ref 15:15 Suah 25:14;
16 David in, Levi mi hotu tei lakah a unaupih haw Levi mite cu lasatu, tingtang tumtu le daakkop tumtu tin, khenkhuai tukin thupia hi.
17-21 Lasatu tei sung pen Joel capa Asaf le Merari hinnam pen Kushaiah capa Ethan cu daakkop khengtu tukin teng haw hi. A bawmtu tukin Levi mite cu tingtang aw tumtu tukin: Zekhariah, Jaaziel, Shemiramoth, Jehiel, Unni, Eliab, Maaseiah, le Benaiah teng haw hi.
Tingtang aw phuun tumtu tukin a nuailam a Levi mite cu teng haw hi. Mattithiah, Elefelehu, Mikneiah, Azaziah le Biakinn cingtu Obed Edom le Jeiel haw hi.
22 Levi mi tumnging tumtute hotu tukin la thiamzet Khenaniah teng haw hi.
23 Thutiam Kuang cingtu tukin Berekhiah le Elkanah teng haw hi.
24 Thutiam Kuang mai a pengkul tumtu tukin thiampi Shebaniah, Joshafat, Nethanel, Amasai, Zekhariah, Benaiah le Eleazar teng haw hi. Obed Edom le Jehiah vang Thutiam Kuang kongka cingtu hi bok haw hi.
Jerusalem Ah Thutiam Kuang Thawn Haw
(2Sam 6:12-22)
25 David, Israel puitute le ngalkap hotu ngalbawite cu Thutiam Kuang la tukin Obed Edom innah hawhin, lungdamnak puai ngengpi bawl haw hi.
26 Thutiam Kuang puatu Levi mite cu Pathian bopnak a conak haw tukin khuicang sa lih le tuu salih biakpiaknak tukin ngo haw hi.
27 David le a la khawngtu Khenaniah le Thutiam Kuang puatu Levi mite cu puan mawi le puan manpha silh tek haw hi. Mah hum pen David in thiampi angki cualpi silh hi,
28 Israel mi hempoh ten Thutiam Kuang cu zui in, lungdam le au thahin, pengkul, sialki, daakkop le tingtangte tumthahin Jerusalem ah hawhpih haw hi.
29 Thutiam Kuang cu khuapi sungah a tumpih haw ten Saul i canu Mikhal in tukvelh pen zo in, kumpi David cu dawk thahin, a lam lih amuh ten a mitkemin nautatzet hi.