SAAM LABU 97
Uktu Ngengbel Pathian
1 Topa cu kumpi hi!
Maw Leipi, lungdam thatui in!
Maw tuipi a ummi tuikulhte
na thatui un!
2 Meinim le khuathim cu
a elkimah um haw hi.
A ngam uknak cu thudik humah
a bul phut hi.
3 Mei-alh cu a mai ah hawhin;
A elkim a ummi a ngalte
kang khawng hi.
4 A khuaphelepin lei buppi vaktik hi;
Mahmi cu leipi in mu in,
can tawtok hi.
5 Lei buppi uktu Topa i mai ah
mualte cu khuainun bangin
zung khawng thong haw hi.
6 Van ten a dikcangnak thu
phuang haw in,
mi hempoh ten a sunloihnak huham
mu haw hi.
7 Milim a biatu cu zakca in um haw hi;
pathian dang hempoh vangin,
Topa i mai ah kun haw hi.
8 Topa aw, na thukhennak hangin
Zion miten a lungdam haw in,
Judah khuapite vangin
a thinnop haw hi.
9 Maw Cungnungbel Topa,
nang cu lei buppi uktu hi ci,
pathian dangte hempoh sangin
ngeng saw ci.
10 Topa in thilpha ngawl
a huatute cu it hi;
A mihing tei nunnak cu hupin,
mi siasuak tei khut sung pen
luan hi.
11 Midikcang tei humah vaknak hengin;
Mipha tei humah lungdamnak
heng hi.
12 Topa i na bawlmi i hangin,
mi dikcangte, lungdamin
thangphat un;
Thiangthobel ama bawlmi
hempoh cu phawk leleng un;
A lakah lungdamnak pia un.