SAAM LABU 96
Kumpi Hempoh Tei Kumpi Pathian
1 Topa i lakah la thak sa un!
Lei buppi in Topa i nelah lasa un!
2 Topa i lakah lasa unna,
a min thangphat pahcawi un!
Nisialin nunpatnak
thuthangpha hilh un!
3 Miphun hempoh tei nelah
a sunloihnak hihen,
nalamdang thil a tih thei zia le
phuangin than un!
4 Topa cu a thawmngeng hangin,
a sangbelah thangphat tak hihim hi;
pathian dang hempoh sangin
maizah upat tuk hi saw hi.
5 Miphun dang tei pathian cu milim hi;
Mahnaven Topa cu
van a ummi hempoh a bawltu hi.
6 Sunloihnak le minthannak ten
a el pen kiim haw hi;
Huham le mawinakte cu
a biakinn sungah um haw hi,
7 Leihum mi hempohin,
Topa thangphat pahcawi un!
A sunloihnak le a tha ngilnakte
thangphat pahcawi un!Ref 96:7-9 Saam 29:1-2;
8 Topa i min sunglawi cu
thangphat pahcawi un!
Biakpiaknak kengin,
a biakinn ah tum un!
9 Thiangtho in, a lang ten
a mai ah kun un!
Lei buppi in, a mai ah
can tawtok hen.
10 Miphun hinnam hempoh tei nelah,
“Topa cu kumpi hi;
Leipi cu a umnakah khoh zetin
um zo in, a thawn theih
hi lehma toh hi.
Mi hempoh tei thu cu
dikcangnak tuah
khensak tuk hi,” tin hilh un.
11 Maw lei le van, na lungdam un!
Maw tuipi le a sung a,
ummite vangin au un!
12 Lo le a sung a ummite vang
na thatui un!
Tupi sung a thingte vangin
lungdamin au haw tuk hi.
13 Itahim titale leipi uktu tukin
Topa cu hung hi.
Leihum mihing hempoh cu
dikcangnak le thuman tuah
uk tuk hi.