SAAM LABU 90
Bu Linak
Pathian le Mihingnote 90 Thulu 2Pet 3:8;
1 Topa aw, nang cu
kumkhua in ka inn hi ci.
2 Mualte na bawl lai ngawlin le
lei buppi na semsuah laih ngawlin
nang cu patnak le tawpnak nei ngawl,
a kumkhua in Pathian hi leleng ci.
3 Mihing cu lei ah kikleh tuk thupia in,
lei ah cang lehtik ci.
4 Kum thawng khat cu nang lak pen
ni khat bang hi.
A bosa mi zansun bang hi in,
zanlam hun comno sung bang
na hi thong hi.
5 Tuilun bangin mihingte taivawktik ci.
Zanmang sangin
ngei phat saw cuang haw ma hi.
6 Zinglamin po a, khangto in
taklam ten thimin,
a ko mi hampa bangin
7 Na thinuknakin siatsuah khawng ci.
Na thinuk pulhangnak cu
lau in can tawtok ung.
8 Ka sualnak uhte cu
na mitmuhah koih ci;
A kuhno in ka bawl sual uhmite hei,
9 Na thinuknak hangin
ka khan uh comtik hi.
Ka nunnak uh cu
thusiam aw bangin tham hi.
10 A nuncak sung uh cu
kum sawm salih hi in;
A dam cak uh tale kum sawm liat vang
hi thei hi.
Mahnaven a nunsung uh
kum i selhmi cu nuncimnak le
thasiatnak ngeh hi.
A nun uh cu a ngei ngawl bo in,
paithongta hi.
11 Na thinuknak a huham cu
akua in thei zo tuk him?
Na thin pulhangnak izahtak
lauhuai him tihmi akua in
thei zo tuk him?
12 Cihnak ka ngah theihnak tukin,
ka nun a com dan zilhin hi.
13 Topa aw, iti can
thinukin um tuk cim?
Kikleh inna, na silate
hehpih zalin hi.
14 Zingsialin, na itnak tuah dimtikin;
ka damsung uh nunnop le
lasa in um tuk ung.
15 Haksat nuncimnak
ka thuak sung uh hempoh,
thasiatnak ka co uh zatin,
lungdamnak co lehtik bokin hi.
16 Kohtei na sila hi
na bawlmi nasezet mutikin hi.
Thasiahhuai na bawl mite mutikin hi.
Ka casuan uhte vang
na sunloihnak cu mutik bokin hi.
17 Topa kohtei Pathian,
na muicu thupha cu
kohtei lakah um tahen!
Ka bawl uhmi hempoh ah
lawhtinnak pia in!