SAAM LABU 74
A Miphun Luatnak Tuk Thunget
1 Pathian aw, ita kohte nunghek cim?
Na tuu kohtei humah
kumkhua in maw na thinuk tuk?
2 Nata hi tukin tanglaihin,
na ten mi na mihingte
phawkngil pahsun.
Na miphun hi tukin na ten mite cu!
Na umnak Zion mual cu
cing leleng zalin hi.
3 Hung inna, hi a sia khawngmi
humah hawh hemin,
Ka ngal ten biakinn sung nate
siatsuah khawng haw hi.
4 Na mihingte na tawh meknak
na biakinn ah, na ngal ten
au haw hi.
Biakinn sungah nehnak
alan tak haw hi.
5 Thing phuktu tei heipi tuah
thing a phuh haw bangin,
6 A heipi le Sobul tuah
thing a bawlmi kongka le a
dangte cu cek keh khawng haw hi.
7 Na biakinn cu pheletin mei ah
haal haw hi.
Na mun thiangtho nintik haw in,
ihempoh phialet khawng haw hi.
8 Cimittik khawng tum haw in,
a ngamsung uh a mun thiangtho
hempoh cu mei in
haal khawng haw hi.
9 Sialsiahnak a neih uhmite
umleh ma zo.
Profet pa khat hei umleh
haw ma toh;
Hitih bangin ituk tian um tuk tih cu
kuamah in thei ma hi.
10 Maw Pathian aw, nangmah cu
ituk tian kaw ka ngal uhten
cekpan bawlnakin,
a man haw tuk?
Na min cu kumkhua in maw
11 Ita kei bawm nuam ma cim?
ita na khut nunglamah koih cim?
12 Mahnaven Topa,
a pattungin nang cu
ka kumpi uh hi zo ci.
Leihumah ngalte nehtu hi ci.
13 Na tha ngilnakin tuipi cu khen ci.
Tuipi sung a ngulpi tei lu cu
sepkeh khawng ci.Ref 74:13 Suah 14:21;
14 Leviathan ngulpi lute
ngawikehin,
a cik cu phillawn a ngamsa tei
eih tukin pia ci.Ref 74:14 Job 41:1; Saam 104:26; Isa 27:1;
15 Nangmah in ciktui le luitui luangtikin,
Nguntuite cu kangtik ci.
16 Nangmah in sun le zan bawl ci a,
Ni le hade a umnak ten
hawah koih ci.
17 Nangmah in lei pi i ngituah bawl ci,
khua khal hun le phalbi
hunte vang bawl ci.
18 Mahnaven maw Topa,
na ngal ten, cekpan bawlnakin,
a man haw cu phawkngil pahsun,
Pathian thei ngawl misil a hih haw
hangin nangmah nautat haw hi.
19 Belh tuk nei ngawlin
na mihingte cu hehpihnak nei ngawl a
ngal tei khut sungah
hengtik zal pahsun.
Bawlsiatnak a thuak na mihingte
hi thei lelengin hi.
20 Kohte tuah thutepnak
na bawlmi cu thei leleng inna,
leihum thimnak ngamah
siatlalnak dim hi.
21 Zotsaknak le bawlsiatnak
a thuaktute cu zakca in umtik pahsun.
Mahnaven mi ca-ngah le
mi tingsam ten nangmah
thangphat haw hen.
22 Maw Pathian aw, tho inna,
na thu cu dinpihin hi.
Pathian thei ngawl tu ten
sun nilui cekpan bawlnakin,
a man haw cu cing lelengin hi.
23 Na ngal tei thinukin,
a sunnak haw le a dodaltu tei
cawl ngawlin thawm a neihmi haw cu
phawkngil pahsun.