SAAM LABU 73
Bu Thumnak
Pathian Diknak
1 Pathian cu Israel tei lakah le
lungthiang mitei lakah pha hi.
2 Kei cu lum awndiak toh ing,
ka kete tawlvawk li zo.
3 Itahim titale mi ultungte
iksik ing,
mipha ngawlte mihau
a hih haw mu thei mang.
4 Amuhte cu natnak thuak haw ma;
tidam zetin ngil vang
ngil sih haw hi.
5 Midang tei thuak zahin
thuak haw ma hi;
Haksatnak vang midang zahin
tawk haw ma hi.
6 Mah hangin a ultunnak cu
khi-ngui bangin ok haw in;
mi nehsiahnak cu
puan bangin silh haw hi.
7 A lungmu haw in thilpha ngawl
tultikin a ngaihsutnak haw cu
a siasuak tuptahnak tuah dim hi.
8 Midang cu cekpan bawlnakin
mang haw a
thil mawi ngawl thu son haw hi.
Ultungzet haw in
midang zotsaknak
thu vaisiam haw hi.
9 Vancung a Pathian sonsia in,
leihum mihing tei lakah
ultunnak tuah thupia haw hi.
10 Mah hangin Pathian mihingte cawmin,
a lam hawah hekin
a sonmi hempoh cu thatho zetin
sang haw hi.
11 Amuh ten, “Itin kaw Pathian in,
a theihtheih tuk?
Cungnungbel aman thei hihim tukma,”
ti haw hi.
12 Mipha ngawlte cu hiti bang
hi thong haw hi.
Thil tamzet nei haw naven
tam dedeuh nei nuam haw hi.
13 Thiangtho zetin umin
ka khutte vangin sualnak
bawl ngawlin ka um hi
thawnthongin maw a hih khawng tuk?
14 Maw Pathian aw,
sun thaleng thuaktik zo ci;
zingsialin dantat ci.
15 Mahti bangin kei in ka hilh a hin,
na mihingte simsial ngawltu in
suak tung hi.
16 Mah hangin hi thu cu
thu haksazet ahi hei in,
thei tum tukin nase zetin
zuam ing.
17 Na biakinn thiang sungah hawh ing.
Mahbek ten mipha ngawl tei humah,
iti bang haw tuk him tih cu thei ing.
18 Lam nalnakah amuhte cu koih ci.
Siatnak sungah caksuktik ci.
19 Thakhatin lalthong haw hi;
A tawpnak haw cu mulling hah hi.
20 Topa aw, amuh cu
zinglamin, a pai thongmi
zanmang bang hi.
Na khatlawh ten iti bang him tih hei
21 Ka thasia in ka thin a natzet ten,
22 Misil bang ing, imah ngaisung
thei mang.
Na lakah ngamsa bangin nung ing.
23 Mahnaven catngawlin,
na lakah um ing.
Ka khut pen len ci.
24 Na ngaihsut phatnak tuah
kei pui ci.
A tawpnakah upat minthannak tuah
nangmah in kei pom ci.
25 Vancungah nangmah sial ngawl
nei ing kaw?
Nangmah sial ngawl leihumah
akua um tuk kaw?
26 Ka lungmu le ka taksa hi
a kiamsuk dedeuh vangin
Pathian cu ka ngilnak hi.
Amah bek kumkhua in ka kinmi hi.
27 Nangmah nung a hektute cu
thi tatak haw tuk hi.
Na lak pen a taisantute cu
nangmah in siatsuah khawng tuk ci.
28 Mahnaven kei cu
Pathian elah um ing,
itih zahin nop him?
A thil bawlmi hempoh hilh le
son tukin, Topa Pathian cu
ka himnak hi.