SAAM LABU 36
Mihing Phatngawlnak
1 Sualnakin mipha ngawl
lungmu sungah thu hilhin,
Pathian cu lawlin, kihcaknak
demno hei nei ma hi.Ref 36:1 Rom 3:18;
2 Amah le mah a uangcop leita hangin,
“Pathian in ka sualnak mu tukma hi,
Mah hangin kei vawk tukma hi,”
tin ngaisung hi.
3 A kam pen a tulmi cu sualnak le
zolthu bebek hi.
Phatnak le cihnak imah bawl ma hi.
4 A zaunak humah zauthahin
thilpha ngawl ngaisung hi.
Thei leng na pi in,
lampi pha ngawl zui hi.
A ningdelhmi sualnak imah umma hi.
Pathian i Phatnak
5 Topa aw, a kho mi na mi ihnak cu
Vancung hengin, muantak
na hihnak cu van khong hi.
6 Na dikcangnak cu mualpi bang khohin;
na thukhennak cu tuipi thuanthum
bangin thuk hi.
Mihing le ngamsate cingkem ci.
7 Maw Pathian aw, a kho mi
na mi ihnak cu sunglawizet si!
Miten na ha nuai ah
himnak ngah haw hi.
8 Na innsung a, eih celh ngawl an cu
ei haw in, na phatnak lui pen tui pia ci.
9 Nang cu nunnak hempoh tei
nunnak ciktui hi ci.
Nangma vaknak hengin vaknak mu ung.
10 Nangmah a theitu tei lakah,
na ihnak cu catngawl um henna,
Lungmu dikcang nei tei lakah,
na phatnak cu catngawlin
bawl zalin hi.
11 Mi uangkho cop ten
do zal pahsuh hen,
mipha ngawl ten taitik zal
haw pahsuh hen.
12 Mipha ngawl tei caksuknak zo hemin!
Mahlai munah lumin,
tholeh thei haw ma hi.