SAAM LABU 30
Lungdamnak Thunget
1 Topa aw, kei pan zo ci a,
ka ngal tei thincimmi
ka hih ngawl hangin, nangmah cu
thangphat ing.
2 Maw Topa ka Pathian aw,
na lakah, bopnak ngenin au ing a,
nangmah in damtik hi ci.
3 Topa aw, mithi khua pen
nangmah in kik lehtik ci.
Thihnak khuk sungah caak naveng,
nangmah in thi ngawlin
ka nunnak cu hupsuakleh ci.
4 Maw muantak a mi Thiangthote,
Topa cu lasa in thangphat un.
Thiangthobel Pa i bawlmi cu
phawk unna, a lakah lungdamnak pia un.
5 A thinuknak cu mitphelep sung bek
ngei hi;
Mahnaven a phatnak cu khan phaat hi.
Zanlamin kahnak a um hei in,
zinglamin lungdamnak heng hi.
6 Keimah le keimah ka muanduncop ten
ka lungmu sungno in,
“Nehmi hi tukma toh ing,”
tin ti cop ing.
7 Topa aw, ka humah phazet ci.
Mualhum a, ngal kulhtian sung um
bangin himno in koih ci.
Keimuh nung na hek ten
ka lungmu cu launak tuah dim hi.
8 Topa, nangmah sam ing hi,
na bop tuk kun ing.
9 Ka thi tale na ca in, phatnak
ite um tuk him?
Mithi khanah ka hawh tale
ikaw na nemcuam tuk?
Mi thi ten thangphat haw tuk maw?
A bo awng ngawlmi
na phatnak cu phuang thei haw maw?
10 Topa aw, za inna,
hehpih zalin hi.
Topa, keimah bawmtu
11 Ka thasiatnak cu lungdam lamnak
tuah theksak zo ci.
Ka thasiatnak thangkhau puan cu
duhsakin, lungdamnak puan
silhtik zo ci.
12 Mah hangin umden thei mang,
nangmah thangphatnak lasa tung.
Topa aw, nangmah cu
ka Pathian hi ci.
Na lakah lungdamnak
kumkhua in hilh tung hi.