SAAM LABU 106
Topa i Phatnak
1 Topa cu thangphat un!
Topa i lakah lungdam thu hilh un,
Itahim titale amah cu pha hi.
A ihnak cu kumkhua in kho hi.Ref 106:1 1Khang 16:34; 2Khang 5:13; 7:3; Ezr 3:11; Saam 100:5; 107:1; 118:1; 136:1; Jer 33:11;
2 Thasiahhuai a bawl mite hi,
Cangkimin, akua in hilh thei tuk him?
Amah thangphatnak cu
akua kaw a son ceng tuk hi.
3 A thupiakmi a zuitu le
thudik a bawl lelengtu cu
mi muicute haw hi.
4 Na mihingte na bop ten,
Topa aw, kei hei
phawk zalin,
amuhte na pat ten kei vang
telhcih zalin hi.
5 Na ten mite mi neinung
a hih haw tuk hun cu
kei mutik zal bokin hi;
Na miphun i lungdamnakah
kei telhtik bok inna,
nangmata a hih haw hangin
a nunnopnak haw cu
kei cotik bok zalin hi.
6 A pu le a pa uhte bangin
ohte vang sual zo hung;
thilpha ngawlte bawlin
misual ngangai hung hi.
7 A pu le pa tei Izipt ngam
a um haw lai in,
Pathian i nalamdang bawl mite
theithei haw ma hi
A itnak langtik leleng naven cin,
phawkngil lelem haw.
Tuipi san a hen haw ten,
Cungnungbel Topa cu
langpang haw hi.Ref 106:7 Suah 14:10-12;
8 Mahnaven a tepsa bangin
hup leleng laih hi;
A ngil mi a huham langtik nuamin,
9 Tuipisan cu thu a piak ten kangin;
Leiko hum a hawhpih bangin
a mihingte hawhpih hi.Ref 106:9-12 Suah 14:21-31;
10 A huatu tei lak pepanin,
a ngal tei khut pen hup hi.
11 Tui in, a ngal haw cu khuh khawngin,
a suakca pa khat hei um haw ma hi.
12 Mahnung bek ten a thutepmi umin,
a lakah thangphatnak lasa haw hi.Ref 106:12 Suah 15:1-21;
13 Mahnaven ngeican um ngawlin,
a bawlmi hempoh phawkngil lehin,
Topa dong masa ngawlin
na bawl haw hi.
14 Phillawnah tisa nopnak tuah
dim haw in,
Pathian khingkhai haw hi.Ref 106:14-15 Mipum 11:4-34;
15 Mah hangin a nget haw mi cu
na pia hi;
Mah a piaknakah tha bo nat vang
16 Mah munlawnah Moses le
Topa i mi thiangtho Aaron cu
iksik haw hi.Ref 106:16-18 Mipum 16:1-35;
17 Mah hangin lei khi in,
Dathan cu thon hi.
Abiram le a innkuate vui khawng haw hi.
18 Amuh zuitu tei lakah mei alh caksukin,
Mah mipha ngawlte cu
kang khawng haw hi.
19 Horeb ah sui tuah
khuizuk bawl haw in,
mah khui zuk cu bia haw hi.Ref 106:19-23 Suah 32:1-14;
20 Pathian sunloihnak huham cu,
hampa eitu nganhing tuah
ai-awhtik haw hi.
21 Amuh pantu cu phawkngil haw in;
Izipt ngam a nalamdang bawltu
Pathian cu!
22 Izipt ngam a nalamdang bawltu le
Tuipisan a thil thasiah huai bawltu cu!
23 Mah hangin Pathian,
ama mihingte cu siatsuah tum hi;
Mahnaven a tenmi a sila Moses cu
Pathian mai ah dingin,
amuhte siatik tuk ngawlin
Pathian thinuknak cu nemtik hi.
24 Ngampha le ngamnop cu
imah simsial haw ma hi;
Pathian i thutepnak cu
sang haw ma hi.Ref 106:24-26 Mipum 14:1-35;
25 Amuhte cu a puanbuk sung haw pen
phun li haw hi.
Topa i thu cu ngai nuam
haw ma hi.
26 Mah hangin tamsiatnak tuah
ngallinnak pia hi.
Phillawn ngamkhingah thi tuk uh ci.
27 Na cano uhte cu umngawltu tei lakah
khenkhek tung a,
Miphun dang tei ngamah
thi haw tuk ti hi.Ref 106:27 Thiam 26:33;
28 Pathian i mihing ten
Peor i Baal biaknakah
tel bok haw in hi.
Nunnak nei ngawl,
pathian dang lakah a piak haw mi,
biakpiaknak tui le an ei bok haw hi.Ref 106:28-31 Mipum 25:1-13;
29 Mah hangin Pathian thinuktikin,
A taksa hawah natsia heng hi.
A cimkhamnak haw pen luattik hi.
30 Mahnaven Finehas dingin
misualte dantat hi;
pulhnat cu cawl hi.
31 Mahti bangin Finehas i dehnak cu
tuni tian phawk leleng haw hi.
Kumkhua in ngaisung leleng haw tuk hi.
32 Meribah ciktui ah
Topa a thinuktik haw;
Amuh tei hangin Moses cu
haksatnak tawk hi.Ref 106:32-33 Mipum 20:2-13;
33 Moses a thin a uktik leita haw hangin
A ot tuk ngawl cawmin awn hi.
34 Pathian thei ngawlte
that khawng tukin
Topa in thupia naven
that haw ma hi.Ref 106:34-36 Thuk 2:1-3; 3:5-6;
35 Pathian thei ngawlte tuah huaidunin
A leihum daan haw cu zui haw hi.
36 Pathian i mihing ten milim bia in,
Amuhte awktu thangin suak hi.
37 A canu le a capate cu pathian dang
biaknak tukin pia haw hi.Ref 106:37 2Kum 17:17;
38 Sual nei ngawl thisan,
Kanaan ngam pathian dang
zuk biaknak tukin canu a capa tei
thisan luangtik haw in hi.
Mah thisan hangin mah ngam cu
niintik haw hi.Ref 106:38 Mipum 35:33;
39 Mahti bangin a bawl haw hangin,
Amuhte cu mi nawngkai hi haw in,
Pathian mai ah
mi suaksual na hi haw hi.
40 Mah hangin Topa cu
a mihing tei humah a thinuk hi.
A tensa mitei humah
a thin nop ma hi.Ref 106:40-46 Thuk 2:14-18;
41 Leihum tei khut sungah zamin,
a ngal haw ten uk haw hi.
42 Amuh huatu ten bawlsia haw in,
a khutnuai ah thuak li haw hi.
43 Vei izong lawlawm kaw
Topa in, a pat tuk?
Mahti thathahin sualnak sungah
tum dedeuh haw hi.
44 Mahnaven a aunak haw cu
Topa in ngai hi.
A haksatnak haw cu thei hi.
45 Amuh tei ca ngaisungin,
a thutep khotik hi.
A ihnak a ngeng hangin
a lungmu niamkhiat hi.
46 A mihing thawngkhiatu tei
lungmu sungah hehpihnak umtik hi.
47 Topa, kohtei Pathian aw,
pan zalin, miphun dadang tei
lak pepan suah zalin hi.
Na min thiangtho thangphat
tuk ung a, lungdamin
pahcawi tuk ung hi.Ref 106:47-48 1Khang 16:35-36;
48 Topa cu thangphat nung;
Israel i Pathian cu!
Tu le kumkhua in thangphat un!
Mi hempohin
“Amen” ti khawng haw hen.
Topa cu thangphat un.