SAAM LABU 105
Pathian le A Mihingte
1 Topa i lakah lungdam thu hilh unna, a min cu au pih un.
A thil bawlmi cu miphun hempoh lakah hilh un!
2 A lakah lasa unna, na lamdang a bawl mite cu phuang un.
3 Amata a hih uh hangin na lungdam un.
Topa i nadektu hempoh na tha uh tui un.
4 Bopnak ngenin Topa i lakah hawh un;
A mitmuhin um leleng un.
5-6 Noh a sila Abraham i canaute,
noh a ten mi Jakob i canaute,
a nase zetmi le thasiahhuai
A thil bawlmi le a thukhennakte cu cing leleng un.
7 Topa amah cu a Pathian uh hi;
A thupiakmi cu leihum pumpi ca in hi.
8 A thutepmi cu kumkhua in zui tuk a,
a thutep cu khang thawng khat tian zui tuk hi.
9 Abraham lak a thutep le Isaak lak a thutepmite cu kimtik tuk hi.Ref 105:9 Pian 12:7; 17:8; 26:3;
10 Topa in Israel lakah, kumkhua phatin thutepnak bawl hi;Ref 105:10-11; Pian 28:13;
Jakob lakah kumkhua ca in thutepnak bawl hi.
11 “Kanaan ngam nohte pia tung; Nangmuta hi tuk,” ti hi.
12 Pathian i mihingte cu mi demno haw hi;
Ngam sungah mi vakvaite haw hi.
13 Ngam khat pen ngamdangah thawn haw;
Miphun khat lak pen phundang tei lakah thawn haw hi.
14 Mahnaven Topa in kuamah bawlsia tukma hi.Ref 105:14-15 Pian 20:3-7;
Amuhte himdam tukin kumpi tampi liat hi.
15 “Ka ten mi ka silate tawngkha pahsuh un;
Ka profette siatsuah pahsuh un,” tin Topa in ti hi.
16 Topa in, a an haw hempoh a laak khawng ten
a ngamsung hawah paam tungtik hi.Ref 105:16 Pian 41:53-57;
17 Sal a zuakmi Josef cu a mai ah hah ham hi.Ref 105:17 Pian 37:28; 45:5;
18 A ke cu thik taicin tuah keenin, a ngawngah thikkual khaih haw;Ref 105:18-19 Pian 39:20-40:23;
19 A thu hilhsa mi a kim laklawh cu;
Topa i thu in midik a hih cu langtik hi.
20 Izipt ngam kumpi pan Josef cu thawng pen hah hi.
Minam tampi tei kumpi Josef cu suakcatik hi.Ref 105:20 Pian 41:14;
21 A ngam uknak hotubelin koih hi;
A ngamsung hempoh uktu bawi in bawl hi.
22 Kumpipa i khutnuai bawi tei humah thuneihnak pia hi.
A thudotmi tei hum hei ah thunei thei hi.Ref 105:22 Pian 41:39-41;
23 Jakob cu Izipt ngamah hawhin, mah ngamah um hi.Ref 105:23 Pian 46:6; 47:11;
24 Topa in, a mihingte pungzaitikin,
Amuh bawlsiatute sangin ngil sawtik hi.Ref 105:24-25 Suah 1:7-14;
25 A mihingte hua tukin le a sila tei humah mipha ngawl hi tukin,
Izipt mitei lungmu cu linglettik hi.
26 A ten mi a sila Moses le Aaron hah hi.Ref 105:26 Suah 3:1-4:17;
27 Pathian i nalamdangte bawl haw in,
Izipt ngamah thil thasiahhuai bawl haw hi.
28 A ngamsung hawah khuathim hengtik hi;
Mahnaven Izipt miten a thupiakmi zui haw ma hi.Ref 105:28 Suah 10:21-23;
29 A ngunpi haw thisanin cangtik khawngin,
a ngasa haw thitik khawng hi.Ref 105:29 Suah 7:17-21;
30 A ngam haw cu simphuk tuah dim khawng hi.
A kumpipa haw i inn tianin dim hi.Ref 105:30 Suah 8:1-6;
31 Pathian in thupia in, a ngam haw cu tho le thosi tuah dim hi.Ref 105:31 Suah 8:16-17, 20-24;
32 A ngamsung hawah nguah ai-in ngialzutikin khuapheleptik hi.Ref 105:32-33 Suah 9:22-25;
33 Sabit kung le thei kungte siatsuahin, thingkungte ektuah khawng hi.
34 Amah in thupia in khaaute cu; sialcelh ngawl hung haw hi.Ref 105:34-35 Suah 10:12-15;
35 Ngam sung a thingceh le hampate ei khawng haw in;
anpo hempoh ei khawng haw hi.
36 Izipt mi innkua hempoh Capa upabel that khawng hi.Ref 105:36 Suah 12:29;
37 Israel mite cu tulpih hi.
Amuh ten a sui le ngun keng haw a,
a venghawng haw in, tha ngil le midammi ngeh haw hi.Ref 105:37-38 Suah 12:33-36;
38 Israel mite a tul haw ten, Izipt mite cu lungdam haw hi;
Itahim titale a lauzet mite hi haw hi.
39 Pathian in, a mihing tei humah meinimtik hi;
Zanin vaknak piatu tukin meivaktik hi.Ref 105:39 Suah 13:21-22;
40 A lakah ngen haw in vaniim pia hi;
Vancung pen an pia in, khamzet ei haw hi.Ref 105:40 Suah 16:2-15;
41 Suangpi hongin tui puttik hi; Phillawnah lui bangin luang hi.Ref 105:41 Suah 17:1-7; Mipum 20:2-13;
42 A sila Abraham nelah a thutep thiangtho cu cing leleng hi.
43 A mihingte cu lungdam zetin tulpih hi.
A tensa mite cu lasa le au thahin puitul hi.
44 Miphun dang tei ngam cu a mihingte pia hi;
A bun sa haw mi lo cu cotik hi.Ref 105:44 Josh 11:16-23;
45 A mihing ten a daante zui in, a thukhamte a zui khawng tukin bawl hi.
Topa cu thangphat un.