8
Cihnak Pahcoihnak
1 Ngai in! cihnakin samin,
theih theihnakin mitei
zak tukin au li hi.Ref 8:1-3 Thup 1:20-21;
2 Lampi el muallek humah
hei in hihen,
lamkak hempoh ah hihen
cihnak cu ding hi.
3 Khuapi tumnakah hei hihen,
tumnak kongkapi el
hei pen hihen, dingin cihnakin,
4 Leihum mihing hempoh
nohtei lakah hehpih kun ing,
leihum a ummi hempoh sam ing.
5 Ngaihsutnak piting ngawlte,
ngaihsutnak piting tukin cung un.
Misilte ngaihsutnak pha cung un.
6 A manpha mi ka thu ngai un,
ka hilhmi thu hi dikzet hi.
7 Ka hilhmi hi thudik hi.
Zolthu cu hua ing.
8 Ka muk pen a tulmi
thu hempoh cu thuman hi.
Pui sualnak le thudik ngawl
umma hi.
9 A theiciantu tei ca in
ciang khawngin,
cihnak a mutu tei ca in
man khawng hi.
10 Tangka sangin ngaihsutnak
ka piakmi hi teng saw in,
sui phabel sangin cihthiamnak
teng saw in hi.
11 Keimah cu cihnak ing a,
suang manpha sangin pha saw ing.
Na deihmi thildang tuah hei in
tehkip theih tukma hi.
12 Keimah cu cihnak hi ing a,
theihciannak vang hi ing.
Theihnak le thu khenkhuai thiamnak
nei ing.
13 Topa kihcaknak cu
sual huatnak khi hi.
Uangkhonak le pualthaunak
sualnak lampi le
awnkam pha ngawl hua ing.
14 Tuptah hamnak nei ing a,
deksuak khawng ing.
Theih theihnak nei ing a,
ka tha vang ngil hi.
15 Ngam uknakah kumpite bawm ing a,
uktute uknak daan pha
bawl tukin bawm ing.
16 Leihum ngam uktute,
ngampi nadektute,
uknak lam upa cu
keima bopnak tuah
ngam uk haw hi.
17 Keimah a ittu cu it bok ing a,
keimah a zeitu in mu tuk hi.
18 Hauhsaknak le minthannak hei hihen
khantohnak le
nehnak hei hihen kata hi.
19 Ka lak pen na ngah mite cu,
a phabelmi sui le ngun sangin
pha saw hi.
20 Diknak lampi ah hawh ing a,
lamdik zui ing.
21 Keimah a ittu tei lakah
hauhnak pia ing a,
a inn haw cu thil manpha tuah
dimtik ing.
22 Topa in tanglaihin,
a bawlmi sung pen,
kei cu a bawl masakbel mi ing.Ref 8:22 Mang 3:14;
23 Leipi a pian laih ngawlin
kei cu a masabelin,
a bawlmi ing.
24 Tuipi thuanthum le luituite
a um laihngawlin
kei cu um zo ing.
25 Mual le luamte a um laihngawlin
kei um zo ing a,
26 Leipi le lo ngamte a masabel a,
bawlmi leivulno
hei Pathian in, a bawl laihngawlin
kei cu bawl zo hi.
27 Van a bawl laihtak le
tuipi thuanthum mawk kim
a bawl laih takin kei um zo ing.
28 Meingote vanah a koih laihin le
tuipi thuanthum tei tuinak
a bawl laihin le,
29 Tuipite a putnak haw sangin
a sangsawah kai tuk ngawlin
thu a piak laihin
keimah um bok ing.
Leipi a bul a phut ten
keimah um bok ing.
30 Inn luangzingtu thil thiampa bangin
a elah um ing.
Nisial a lungdamnakbel cu
keimah hi ing a,
a mai ah ka lungdam leleng ing.
31 Leipi le a hum um mihing tei humah,
ka lungkim ing.
32 Ka cate aw, ka hilhmi thu hi ngai un,
ka hilhmi bangin dek unna,
na lung uh dam tuk hi.
33 Ka zilhmi ngai unna,
cih cung un, hi thu hi
thupi sa ngawlin um pahsun.
34 Ka thu ngai in, nisial
ka kongbiangah umin
ka inn sung tum tukin a ngaktu cu
a lungdam tuk hi.
35 Keimah a mutu cu nunnak
co haw tuk a, amu humah
Topa a lungdam tuk hi.
36 Keimah a zei ngawltu cu
amu nunnak
a siatsuahtu na hi haw hi.
Kei a huatu cu thihnak deih sawte
na hi haw hi.