9
Cihnak le Silnak
1 Cihnakin inn sa a, khuam salih phut hi.
2 Puai bawlnak tukin nganhing vang ngo hi. A sabittui ah namtui helin cabuai vang khun zo hi.
3 Khuasung mun sangbel hum pen au tukin a umlawh numeite hawhtikin,
4 “Thu ngaihsutnak dawm hempoh hi munah hung un,” tin au hi.
5 “Hung un ka bawlmi an ei un, ka bawlsami sabittui vangin un,
6 Silnak cu zamsanin nungca toh un, cihnak lampi cu zui toh un hi,” tin au hi.
7 Mi ngilote nun na hilh tale na zakcatik tuk hi. Mipha ngawlpa sual na nawn tale maliam tuk ci.
8 Mi pualthaute khi ituk mahten nun hilh pahsun. Nun na hilh tale hua haw tuk hi.
9 Micip hilhhawl inna, cip dedeuh tuk hi. Midik thuhilh inna, a thiamnak tam dedeuh tuk hi.
10 Pathian kihcaknak cu cihnak a patnak hi. Mi thiangtho pa na thei tale theihnak cihnak nei hi ci.Ref 9.10 Job 28:28; Saam 111:10; Thup 1:7;
11 Cihnakin, na nun khua sautik tuk hi,
12 Cihnak na nei tale nemcuamnak pia tuk hi. Cihnak na kik tale haksatnak thuaktu hi tuk ci.
13 Silnak cu ngaihsutnak imah nei ma hi, zahcaknak hei nei ma, numei kamtam bang hi.
14 Mah numei nu cu inn kongka ah khungin, ahimata khua sung mun sangbelah khungin,
15 ama nadeh tuk ngaisung thathah a lampi a hawhtute khi,
16 “Ngaihsutnak nei ngawlte hi lamah hung un,” tin au hi. Misil pai lakah
17 “Ngukmi tui cu hum cuangin, ngukmi cangho cu uk deuh,” ti hi.
18 A innah a hawhtute cu thi haw in, a inn sung a tum ngah zo mite cu mithi khua thukpi ah um hung hi tihmi thei haw ma hi.