7
1 Ka capa, ka hilhmi thu hi ciing leleng inna, deh tuk ka hilhmi hi phawkngil pahsun.
2 Ka hilh bangin dek inna, nung tuk ci, ka zilhmi thute khi na mit saizang bangin cingkhawi in,
3 ka hilhmi thu hi ciing leleng inna, na lungmu sungah vongin.
4 Cihnak cu ka celnu tin ti inna, theihcelnak cu ka ngualcam phabel hi ci tin samin hi.
5 Mi zi le mizol mangmi awnkam thiam numei lak pen nangmah luattik tuk hi.
Numei Pha Ngawl
6 Vei khat cu ka inn tukvelh pen pualamah khua ka zo le,
7 thu ngaihsutnak nei ngawl tangval lak pen, tangval silthim pa khat mu ing.
8-9 Amah cu taklam khuathim kuan ten lamkawi el a um numei pha ngawl umnak inn mai ah heng hi.
10 Numei pha ngawl nu in muak hi. Mah numei nu cu numei pha ngawl bangin thuam hi.
11 Amah cu mi ngalpha le zahcak nei ngawlnu hi. Inn ngak awng ngawlin vak leleng hi.
12 A cacan ten lamkawi in, mihon umnak lamzinpi le thil zuaknak mun pen tangval pang mek hi.
13 Tangval pa cu pomin thut a, zakca ngawlin zo ngi nge hi.
14 “Tuni in biakpiaknak bawl zo ka hih hangin biakpiaknak cik vang nei ing,
15 Mah hangin nangmah zei in vak tul ing a, atu-in nangmah tawk ing.
16 Ka zaunak cu Izipt ngam suak pat puan mawizet phah zo ing.
17 Ka zaunak cu mura le aloes pak namtuite theh zo ing.
18 Hung inna, zankhua langkhatin kawidun leng pah nung.
19 Ka pasal cu innah umma hi, ngam khawlapi ah khualzin hi.
20 Tangka dipdim kengin tul a hih hangin ha kiam laihngawlin heng tukma,” ti hi.
21 Deih awhmi awnkam humno tuah a leem ngah hangin, a mi pahthiamnakin pui vawkta hi.
22 Thakhat thu in, khuicangin sa ngawhnak mun a zot bangin le
23 thalcang kap tukin sazukin thang a pal khak bangin, mah numei nu cu zui hi. Vano thang humah a kop bangin a nunnak lauhhuailam thei ma hi.
24 Ka cate ka thu hilhnakte ngai in hi.
25 Mahtibang numei pha ngawllamah na lungmu zuitik kha pahsun, A nung hei zui kha pahsun.
26 Amah in mi tampi siatsuahin thitik zo hi.
27 A innah na hawh tale mithi khua lampi na hi a, thihnak khuk sung a tum tuah bangve hi.