6
A Dang Ngallinnak Tuk Thu
1 Ka capa, midang tei leiba lohsak tukin thutiamnak bawl awng cim?
2 Nangma awnkamin nangmah awkin, nangma thutiamnakin nangmah ken awng maw?
3 Mahtibang ahi tale ka capa, ama khut sungah heng zo ci a, na luat theihnak tukin ama nelah hawh inna, na leibat zah theihnak tukin kuunin hi.
4 Hihbu in cawlum thong pahsun.
5 Sakap pa i khut sung pen vano le sazukte a tai suak haw bangin, thang sung pen suakca tukin tumin hi.
6 Mi thazawng ten miksi zo haw tahen, miksi tei nuncan khuasak dan cung haw tahen.
7 Amuhte cu lampuitu upabel, bawi le uktu nei haw ma hi.
8 Mahnaven khuakhal hun sungin an khawlin phalbi ca tukin ngalling ham haw hi.
9 Mi thazawngpa cu i tuk tian hihbu leng tuk him? Ituk ten tho tuk him?
10 Amah cu, “Dawmno zap hih tung, hun comno sung khutzakawi in cawl hih tung,” ti hi.Ref 6:10-11 Thup 24:33-34;
11 Mahnaven a hihbuh laih takin zawn le ngaunak cu hiamnam cawi damiah bangin heng tuk hi.
12 Mi ngilo le mi sesuak cu zolthu tuah ngamta haw hi.
13 Amuh ten mitphelep zawzokin le khut le ke piahin zol thei haw hi.
14 A lungmu haw siasuakin phat ngawlnak ngeh bawlin, mun hempoh ah haksatnak piangtik haw hi.
15 Mah hangin amu lakah haksatnak cu upmawh ngawlpi hengin lalthong khawng haw tuk hi.
16-19 Topa i huat zetmi thil pa luk um hi. A ningdelhhuai mi thil salih um hi. A pualthaumi mitmai, zolthu sontu lei, misual ngawlte thattu khut, siatnak bek a ngaisungtu lungmu, sualnak bawl tukin a manlang zetmi ke, zolthusonin, thu theihpihtu hihnak, unau tei lakah haksatnak a henpihtu pa, Hite hi Topa i ningdelhmi hi.
Nupa Sualnak Ngallin Tuk Thu
20 Ka capa, na pai hilhmi bangin bawl inna, na nu i zilhmi thu cu ituk mahten phawkngil pahsun.
21 A hilh haw mi thu khi ciing lelengin, Na lungmu sungah vongin hi.
22 Khual na zin ten a hilhmi thu in nangmah lamhuai tuk hi, zanlamin cingkhawi tuk a, sunlam ten ngaihsutnak pha pia tuk hi.
23 A thu zilhmi haw cu vak leleng tuk a, a nun hilhnak haw in ngamtat ziaza hilh tuk hi.
24 Numei siasuak le ngamtat pha ngawl numei tei zolnak pen hup tuk hi.
25 Mahtibang numei tei mawinak deih pahsun, a mit hah haw sungah awk kha pahsun.
26 Mi pa khatin numei pha ngawl pa khat cu moh pa khat man tuah zawng thei hi, mahnaven nupa sualnak a bawltu cu a neih hempoh bo tuk hi.
27 Na puan kang ngawlin mei cu na angah pom thei ni cim?
28 Na ke kang ngawlin meiling humah hawh thei ni cim?
29 Mah bangin midang zi tuah zaukawm cu a lauhuaimi hi.
30 Ngialkialin, an a ngutu cu nautat haw ma hi.
31 Mahnaven a man ngah haw tale, a let salihin kuanin, a neihmi hempoh tuah a lohleh kul tuk hi.
32 Mahnaven midang zi tuah a sualtu cu ngaihsutnak nei ngawl misilpa hi. Amah le mah siatsuah cop hi.
33 Amah cu a min sia in vahdem co tuk hi. Zakca mualpho lelengin um tuk hi.
34 Pasalin, a zi a muangmawh tale nase zetin cingin, a lulhlehnak cu dai thei ma hi.
35 Itih zahin sum le pai pia vangin sang nuam ngawlin izah tain lemleh li vangin a lungmu dai thei ma hi.