5
Nupa Sualnak Ngallinnak Tuk Thu
1 Ka capa, ka cihnak le ka theihnak cu phano in ngai inna, ciang zetin ngaisungin hi.
2 Itin nuncan pha nei tung him tihmi thei suak tuk ci a, na awnkamin, na thutheihnak langtik tuk hi.
3 Numei hawkdak i awnkam cu khuaihum bangin hum tuk a, a awnkam cu olif sathau bangin naal tuk hi.
4 Mahnaven a tawpnakah a kha mi le haksatnak sialngawl a dang imah zam tukma hi.
5 Amah in mithi khua ah doksuk tuk a, a zuimi lampi in thihnak munah hen tuk hi.
6 Nunnak lampi ah um ngawl a vakvai in, i cang ing him tih hei theicop tukma hi.
7 Ka capa, ka thu ngai inna, ituk mahten ka hilhmi thu hi phawkngil pahsun.
8 Mahtibang numei cu pialin, a kongka elah hei hawh pahsun.
9 Na pialsan ma tale upatnak na co sami lonsak tuk a, mi hehpih thei ngawl tei khutah na khanno laihin thi tuk hi ci.
10 Miphun dang ten na hauhnak lonsak haw tuk a, nadehmante cu midang ten co haw tuk hi
11 Na thihsuk tuk ten na hacang ngawi tuk ci a, na taksate cu kiam khawng tuk hi.
12 Mahten, “Ita heng ka theih awng ngawl? Ita heng thuhilhnak thupi ka sak ngawl?
13 Thu hilhtu tei thu ngai mang; thu zilhtute imah simsial mang.
14 Mah hangin ngaihsut ngawlpi in midang tei mai ah zahcak mualpho tawk ing hi,” tin tileh tuk ci.
15 Na zi i humah muantak zetin umin, amah pa khat bek it in hi.
16 Midang numei tuah na neihmi ca ten na humah phatnak imah bawl haw tukma hi.
17 Na cate cu nangmah bawmtu tukin khangto haw tuk a, midangin nang bawm haw tukma hi.
18 Mah hangin na khanno laih a na zi humah lungdam inna, a humah lungdam thatuinak nei in hi.
19 Amah cu sazuk bangin a mawi mi le iangnei mi hi. Iang a neihmi in, na lungdamtik tuk a, a ihnakin nangmah awk tuk hi.
20 Ka capa, ita numei dangte ngai cim? Mitei zite hazawl li pah sun.
21 Topa in, na bawlmi hempoh mu khawng hi. Na hawhnak hempoh ah zo kawkawi hi.
22 Mi ngilo tei sualnakte cu thangsiahmi tuah bangve hi. Amu sualnak suukthang sungah awkcop haw hi.
23 Amah le amah a cinkhawi cop theih ngawl hangin thi hi. A silnakin amah cu a khankhuuk sungah henpih hi.