30
Agur i Awnkam
1 Hite hi Jakeh capa Agur i awnkam hi.
“Maw Pathian aw,
ka lungmu cawlin
ka zaangtha vang cawlzet zo hi,
I mah bawl thei ma toh ing.
2 Kei cu ngamsa bang na hi zo ing,
Mihing hei bangma toh ing a,
mihing lungmu hei nei ma toh ing.
3 Cih le thiamnak vang
cung awng mang,
Pathian thu hei imah thei mang.
4 Vancung thu le la a thei khawngtu
akua um tuk kaw?
A khut tuah huih a man theitu
akua um haw tuk kaw?
Ahimata puansia tuah tui
a cun theitu akua um tuk kaw?
Lei le van ngamngi a khen theitu
kua um tuk hum?
Mahpa cu akua kaw?
Thei cim maw?
A capa akua him?
5 “Pathian cu a thu tiammi hempoh pelh awng ma hi, Amah cu humhimnak a zeitu hempoh tei ca in lumphaw bang hi.
6 Pathian i awnkam cu bet pahsun, nangmah liat tuk a zolthu son na hihlam lang tuk hi.”
Cihnak Awnkam A Dangte
7 Maw Pathian aw, na lakah thil pa nih ngen ing, ka thih laih ngawlin na cotik zalin hi.
8 Zolthu sontu hi tuk ngawlin na cingin: zawng leita in le hausa leita tukin vang na bawl pahsun, ka khamkhop tuk bek an na pia zalin hi.
9 Thil tampi ka nei tale, “ Topa nang kul mang,” ti sual tung, ka zawng leita tale nguca kha sual tung a, ka Pathian minsiatik kha sual tung hi.
10 Umlawhte khi a bawipa i mai pen sonsia pahsun. Na sonsia tale umlawh ten nangmah tamsia tuk a, mualpho saw tuk ci.
11 Pate tamsia in nu tei lungkim ngawl a ngamta tu um haw hi.
12 Nawngkaizet thah lengin, mah le mah thiangtho ing tin, a ngaisungtu na um haw hi.
13 Miphazet ing tin, a ngaisungtu na um haw hi, Amuh le muh mi phabel tin ngaisung cop haw!
14 Mi ca-ngah le nun haksate nemsukin, a nungtu na um haw hi. Mahtin pum na cawm haw hi.
15 Votin canu pa nih nei a min haw cu, “Kei pia in,” tih na hi kawm hi. Itukmah ten lungkim ni nei ngawl thil pa thum le deihnak a kim tih ni nei ngawlmi thil pa li um hi.
16 Mah mite cu mithi khua,
Ca nei ngawl numei cing,
Nguah a kin zetmi leiko le
Cuh theih ngawlmi meikangte hi.
17 Akua hei hihen a pa khi cekpan bawlnak a mangtu le nu a tek ten a zawnsaktu cu, mihing cik ei mupi in, a cik ei tuk a, va-akin, a mit pholhsak tuk hi.
18 Ka ca in nalamdang thuthuk pa thum um hi; Ka theihtheih ngawl mi thil pa li um hi.
19 Van a leng limi muvanlai,
Suangpi hum a vakmi ngul,
Tuipi thuanthum hum a hawhnak lampi a zei lihmi tinbaw tei hawhnak lampi le
Tangval le khanglai a ihdun dante khi hi.
20 Nupi lungmu ngai nei ngawl tei umdan cu hi bangin hi. Uire in suaksual a tui a bual ceng tain, sualnak imah bawl mang na ti laih hi.
21 Leihum pi a hingtiktu thil pa thum um hi. Leihum pen thuakzawh ngawlmi thil pa li um hi.
22 Mah mite cu kumpi a suakmi sila,
an deihzah eih tuk nei, misil,
23 mi i mitkemzetmi, mahnaven pasal a nei thei lelengmi numei le
A bawinu khunnak a longtu umlawh nute haw hi.
24 Leihumah a neubel mahnaven a cip zetmi ngamsa pa li na um hi.
25 Tha nei haw ma naven, khaal hun ten an a khawlham thiamtu miksi;
26 Ngil ma naven suang lakah kua a bawl theitu meican,
27 Kumpi nei haw ma naven ahon ahonin, a thawn duaduam mi khaau.
28 Na khut vangin suum theih, Kumpi inn sungah vang na muh theihmi daidepte haw hi.
29 A vah haw laihtak muhnop zetmi thil pa thum um hi; Thupi zetin, a vakmi thil pa li um hi.
30 Mah cu ngamsa lak pen a ngilbel le, launak a nei ngawlmi kiosa,
31 Keelcang,
Akcang a hangsanmi le
A khutnuai mihing tei mai a vak ngawngoktu kumpite haw hi.
32 Silhahzet le pualthau zetin,
na pha ngawlte bawl na tum tale,
cawl inna, ngaisung pha in hi.
33 Khuinawi na cawh lih,
cawh lih ten thawphat ngah ci.
Mi pa khat i naal na vat tale
thi tul hi,
na thinuknak na pulhangtik tale
buai le haksatnak tawk hi ci.