31
Kumpi Lakah Ngaihsutnak Pha Piakmi
1 Hite hi kumpi Lemuel lakah a nui cahmi cih awnkamte hi.
2 Nangmah cu ka ih zetmi ka capa, ka thu ngetnak hangin ka ngahmi capa ka sungsuak hi ci. I thu kaw ka hilh tuk?
3 Taksa hazawlnak lamah na zaangtha hempoh mang khawng pahsun; Na sum le pai hempoh vang numei humah mang khawng pahsun. Mah miten kumpi tampi siatsuah haw hi.
4 Ngai hemin, Lemuel, Kumpite cu misilte bangin zu in tukmi le thusia pawi nuamin zu duhnahnak vang neih tukmi kha haw ma hi.
5 Itahim titale zu a in haw ten daante cu phawkngil haw hi, mi nunhak tei covo vang theileh haw ma toh hi.
6 Mithi kuante cu zu pia inna, lungkham tei ca in sabittui pia in hi.
7 a in haw ahin, a lungnop haw ngawlnak le a zawnnak haw phawkngil haw tahen.
8 “Mah le mah a hilh thei ngawl tei ca in hilh sakin hi, Bawmtu nei ngawl tei covo khi humhim sakin hi.
9 Amuh tei ca in hilhsak inna, thukhentu dik na hi in hi. Mi ca-ngah le mi nunhak tei covo hupsakin hi.
Ngamtat Pha A Neimi Zi
10 Zi pha cu izahin ngah hak him? Suang manpha sangin man nei saw hi!
11 A pasal cu ituk mahten cim le khamin um tukma hi.
12 A nunsung hempoh a pasal humah thilpha bawl lelengin siatnak bawl awng ma hi.
13 Umthong tih nei ngawlin tuumul le pat puan tak mek hi.
14 Sumbawlmi timbaw bangin, Ngammawk deng pen a innkua ca in an na puak mek hi.
15 A innkua ca an zei tukin le, a umlawhte a nadeh haw sem sak tukin, zingtungno in, na tho mek hi.
16 Lei ngam zei in lei hi, A lawhmi sum le pai in sabit huan bawl hi.
17 Nadek tei zetin, a tha nei in, lol vang lol sih hi.
18 A thil bawlmi hempoh i man a neih daante thei in, taklam khuanuzet tianin, na dek hi.
19 Amahno in pat kai in ama puansilh vang tak hi.
20 Mi ca-ngah le mi nun haksa tei lakah lawithiamzet hi.
21 A innkua hawng haw in angki lum nei khawng haw in, phalbi khawsik hun a hen hei ten lau hihim ma hi.
22 Zauphah takin sandup mawizet tuah tahmi puan na silh hi.
23 A pasal cu mipi tei theihmi khua sungah hotu pa khat hi.
24 Silhpuan le taikhapte bawlin sumbawl tei lakah zuak hi.
25 A tha ngilin upatzet haw, mailam ca in lauthawngnak nei ma hi.
26 Cingcai zetin le nemno in awn hi.
27 Umthong tih um ngawlin a innkua tei kul le sapnak hempoh vaihawm leleng hi.
28 A cano ten pahcawizet haw in, a pasal vangin pakzet hi.
29 A pasalin, “Numei tampi hi zi pha hi khawng haw naven, nang hi a phabel hi ci,” ti hi.
30 Iang neih hi mizol thei in mawinak vang paileh thei hi. Mahnaven Topa a kihcatu numei cu pahcawi le thangphat tak hi.
31 A bawlmi thil hempoh hangin amah cu thangphat un, mi hempoh tei upat tak numei hi.