29
1 Na ngamtat ziaza a hilhhawl haw sial ten na lung ngeng ahi tale, ni kha khat ni ten tho thei ngawl tianin sia tum tuk ci.
2 Uktu mipha ahi haw tale ngamsung mite a nun haw nop hi, mahnaven uktu mipha ngawl ahi haw tale a ngam mihingte na cim haw hi.
3 Cihnak a deih capa in, a pa lungdamtik hi, Ti le sa zuak numei lak a sum le pai a botute cu misil hi.
4 Kumpi in diknak tuah ngam a uk ahi tale, a ngam kho hi, mahnaven sum le pai bek a ngaisung ahi tale, a ukmi ngam cu sia tum tuk hi.
5 Na ngualcamte a valin, na pahcawi tale, amu ca in thang na siah tuah bangve hi.
6 Midik mipha tei lungdam le maitai zetin, a um haw laihtakin, mipha ngawlte cu a sualnak thangah na awkcop haw hi.
7 Mipha ten mi zawng tei dinmun na theihpih haw naven mipha ngawl ten theihpih thei haw ma hi.
8 Midang ca ngaisung ngawltu ten khua buainak na hengtik haw in, micip ten thubuai daitik haw hi.
9 Micipin misil taza a cuai ten misilin nuihsanin nase zetin, na tam hi.
10 Mi thisan suah a kinmawh ngawltu in, midik mipha napoh hua hi, mahnaven mi taituangin midik tei nunnak hupsak hi.
11 Misil ten a thinuknak haw langtik paih haw hi, mahnaven ngaihsutnak a neimi cu a thin haw sau in, na suup haw hi.
12 Ngam uktu in, a man ngawlmi thu a sang ahi tale, a nadek upate hempoh cu zolthu son na hi haw tuk hi.
13 Mi ca-ngahte hei hihen, mi nauta a nuainemtute hei hihen, thil bangtenin, a neih haw mi na um hi. Pathian in khua muh theihnak mit pia kawm hi.
14 Kumpipa in mi zawng nauta tei covo a humhim sak tale, kum ngeipi ngamsung mihingte na uk tuk hi.
15 Naupang tei ca in nunzia lempha in, daan phate zuitik hi thilphabel hi. Naupang pa khat ama thuno in, a nung tale a nu zahcak mutiktu na hi tuk hi.
16 Mipha ngawl tei thuneihnakah sualnak pung sesem hi. Mahnaven midik ten mah mipha ngawl tei a caksuklam na mu tuk hi.
17 Na cate daan pha zui tukin hilhhawl inna, Amah hangin mitmai nei hi leleng tuk ci. Amah in i tuk mahten zahcak mualpho tawktik tukma hi.
18 Pathian lampuinak a umma tale mipi cu vakvai haw tuk hi. Pathian i daan zuitu cu mi muicu hi.
19 Umlawh pa kha khat muk le kam a thuson pihnak thongin, a nun ziaza lem thei tukma ci. Na hilh nuammi cu thei tuk naven, a thu cu sang cuang tukma.
20 Ngaisung masa ngawlin a awntu sangin, ngaisung ciamciam a awntu misil ca in muansannak na tam saw hi.
21 Na umlawhpa i deihmi hempoh a naupang laih pepanin, na pia leleng ahi tale, ni kha khat ten na neihmi hempoh na laksakleh khawng tuk hi.
22 Thincom ten hauhdunnak le buainak tampi na tultik haw hi.
23 Pualthaunak le uangkho dunnakin siatnakah na hengtik thei hi. Mahnaven niamkhiatnakno tuah na um tale mitei upatnak co tuk ci.
24 Nguca pai ngualcam cu a ca in, a ngal lauhuaibel na hihi, thukhennak zung pen thuman son tuk a hih hangin dantatnak thuak tuk hi. Thuman a son ma ahi tale Pathian i siatcam na hi tuk hi.
25 Midang tei ngaihsut saknak ngaisang zetin um cu a lauhuaibel hi. Mahnaven Pathian na muansan tale lau tuk umma hi.
26 Mi hempoh ten amuh uktu bawi i mitmaipha co tuk nuam tek haw hi, Mahnaven Pathian lak bek pen a dikmi thukhennak co tuk ci.
27 Mipha, mi taituang ten mipha ngawl hua a, mipha ngawl ten mipha, mi taituang hua bok hi.