28
1 Mipha ngawl cu kuamah i hawlvawk ngawlin amahno na tai hi. Mahnaven midik mifel cu kiosa bangin a ngal haw pha hi.
2 Ngam pa kha khat a sual ten uktu pa khat nung pa khat thekdun pepel haw hi. Mahnaven ngam pa kha khatin micip le thu ngaisung thiam hotu a nei bang ahin mah ngam cu cakin ngeipi kho tuk hi.
3 Mi ca-ngah mi nauta bawlsia in haksatnak a piatu ngamuktu cu, Lo ankung a siatsuahtu nguahsia tuah bangve hi.
4 Daan thu imah sial ngawlin na um ahi tale, mipha ngawllam tangtu hi tuk ci. Mahnaven daan thu na zui tale mipha ngawlte a dodaltu hi tuk hi.
5 Mi suaksual ten thudik hi iti bang him tih thei haw ma hi. Mahnaven Pathian a biatu ten a ciangno in thei haw hi.
6 Lungmu taituang ngawlin mihau hih sangin, taituang zetin mi zawng hi pha saw hi.
7 Daan a zuimi tangvalpa cu micip hi. I mah nemcuamnak a nei ngawlmi ngualcam neitu cu a pa i mai nintiktu hi.
8 Midang tei lak pen tangka khang le a met laknak hangin mihau na hi tale, na hauhnak cu mi zawngte a hehpihtu pai lakah hengleh tuk hi.
9 Daan zui ngawl na hi tale na thu ngetnak cu Pathian thinuktiktu saw hi.
10 Mi taituang pa khat nunsual tukin na zol tale sualnak sungah nangmah le nangmah awkdun tuk ci. Sualnak a nei ngawlmi cu laksawng pha co tuk hi.
11 Mihau ten amuh le muh cu micipzet bangin, na ngaisungdun thei mek haw hi. Mahnaven mi zawng pa khat mi lungmu a theitu cu micip na hi saw laih hi.
12 Mipha pa khat uktu bawi a suah ten, mi hempoh lungdam haw hi, mahnaven mipha ngawl uktu a suah ten mipi cu na ngelh khawng haw hi.
13 Na sualnak sel na tum ahi tale na san sungah na bawl nuammi nate bawlsuak thei tukma ci. Na sualnak cu phuang inna, vawkin, mahten Pathian in hehpih tuk hi.
14 Pathian cu a kumkhua in kihca inna, na lungnop tuk hi, Na lunglian tale, na nunnak sia tuk hi.
15 Uktu pha ngawlin a uk ten mi ca-ngah nautate cu pantu nei haw ma hi, Uktu ngilo cu a hawk li mi kiosa, an zei a vai li mi vom bangin lauhuai hi.
16 Lungmu ngaihsutnak ngai nei nge ngawlmi uktu cu mipha ngawl mi sesuak hi. Dikngawlnak le taituang ngawlnak a huatu in can ngeipi ngam na uk tuk hi.
17 Mihing a thattu cu ama khan kua manlang zetin, a co li tuah bangve hi, Kham tuk hi ma hi.
18 Mi taituang hi inna, himdam tuk ci. Na lungmu a taituangma tale khuk sungah caak tuk ci.
19 Lobung milol zetin eih tuk tampi nei tuk hi. Huncan bo thongtiktu cu kumkhua in zawng tuk hi.
20 Midik le mifel in, a nop le a cangkim mi nun na nei hi. Mahnaven a manlangin hau na nuam tale bawlsiatnak thuak tuk ci.
21 Mi deidatnak neih cu pha ma hi, Mahnaven thukhentu khenkhatin, nawhthuh neuno deih manin thukhen sual thei mek haw hi.
22 Hampumnak a neimi ten manlangin hausa tuk a nuamnak haw hangin, Zawnnak a lakah heng awndiak toh tih thei kha haw ma hi.
23 Mi pa khat cu hilhhawl inna, na pah lih sangin a lungdam saw tuk hi.
24 Nu le pa tei na nguk cu sual ma hi tin, a ngaisungtu cu nguca tuah a dangdunnak umma hi.
25 Hampumnakin haksatnak bek na suahpih thei hi, Pathian muansan inna, nemcuam saw tuk ci.
26 Mai ngaihsutnak bek tuah sihsan khual lo cu sil hi. Nangmah sang a cip saw tei hilhnak zui inna, himdam tuk ci.
27 Mi ca-ngahte bawm inna, ituk mahten tingsam tukma ci, mizawngte na nungheksan tain mi tampi in nangmah tam haw tuk hi.
28 Mipha ngawl bawi a suah haw ten mipi cu na ngelh khawng haw hi, Mahnaven mipha ngawl tei caksuk hun ten midik le mi taituang ten ngam ukleh haw tuk hi.