25
Solomon i Cih Awnkam Dangte
1 A nuailam thute vang hi; Solomon i cih awnkamte hi in, Judah kumpi Hezekia mihing tei ngat sa lawnmi hi.
2 Pathian sunloihnak cu a thu-ip theih khi hi. Mahnaven kumpi tei sunloihnak cu thu-ip um ngawlin a hilhcian haw khi hi.
3 Kumpi in i ngaisung him tih cu thei zo ma hung, a sang zetmi van le a thukmi tuipi thuanthum bangin, a theih bat uh ngawlmi hi.
4 Ngun khi a ek thiangtik inna, pumsu thiam ten thil mawi zetin seek haw tuk hi.
5 Kumpi lak a ngaihsutnak pha ngawl a hilhtu cu hawlvawk unna, a uknak cu diknak tuah kho tuk hi.
6 Kumpi mai ah upat cuh pahsun. Mi upa tei umnak munah vang ding pahsun.Ref 25:6-7 Lk 14:8-10;
7 Itahim titale hilai ah khungin tih cu, nangmah sangin a upa saw mi khunnak kianin tih sangin pha saw hi.
8 Thil na muhmi cu manlang leita in thu khennak zungah hilh pahsun. Itahim titale theihpihtu dang ten na khelhnak a langtikleh ahi tale itin kaw na bawl tuk?
9 Na innnel tuah na ngaihsutnak uh abang ten thei ma tale nangmuhno in lemnak bawl un, mahten thu-ip cu phuang pahsun.
10 Na son khasual tale miten na thu-ip theih ngawllam thei haw tuk a, na zahcaknak bo thei tukma hi.
11 A hun laihno in otmi awnkam cu ngun kuang sung a sui ngah bang hi.
12 Micipzet tei hilhmi thu cu a ngaitu ca in sui khutbut le sui manpha bang hi.
13 Kamtai fel cu atiktu ca in lungdaitiktu hi. Ankung cop hun nisa laihtakin nial nguah bang hi.
14 Thil pia tung tin thu tiam khawngta in, a pia nuam ngawltu cu nguahtui pai ngawl meinim le huih bang hi.
15 Thinsaunakin uktu bawite nangawn lem theih hi. Awnkam nemin, lungmu khohte hei nemtik thei hi.
16 Na kulmi sangin tam saw khuaihum ei pahsun. Tam leita na ei tale law tulleh tuk ci.
17 Na inn nelah dangleng lelem pahsun. Na leng tam ahi tale ciat tuk a nangmah hua tuk hi.
18 A man ngawlmi mi sual nawn cu mi a that theitu tembeek, ngalnam le thalcang hiam bang hi.
19 Haksat hun a mi muantak ngawl muan cu, ha hing thahin, an thai le kebai thahin lamciah bangkek hi.
20 Khawngai lungsia mitei lakah lasak cu, khawsik hun a puanlum duhsak le meima hum a, ci noih tuah bangten hi.
21 Na ngal a ngilkial tale eih tuk an pia in, Adangdum tale intuk tui pia in hi.Ref 25:21-22 Rom 12:20;
22 Mahti bangin na bawl ahi tale, a lu humah meiling koih hi tuk ci. Topa in laksawng na pia tuk hi.
23 Saklam huihin nguahtui a puak bangin, mi sonsiatnakin thinuknak suaktik hi.
24 A phun leleng thei zi tuah inn khat sung umlangkhat leng sangin innkuul ningnawi ah mahno um an pha saw hi.
25 Ngam khawlapi pen thuthangpha zak cu dangdum laihtak a, tuidap intuah bangve hi.
26 Midikin mipha ngawl pa a nehtik tale, thihsi loihmi tuikhuk, ahimata ciktui nin bang hi.
27 Khuaihum tam leita eih cu pha ma hi, mah bangin mi lak pen pahcoihnak tampi ngah nuam cu pha ma hi.
28 Thinuknak a supdun zo ngawltu cu kulhtian cimin, a sia mi khua tuah bangve hi. Ngal ten baihno in simtum thei haw tuk hi.