26
1 Khuakhal hun a vukta, ankung cop hun nguahzu bangin, thangphat upatnak cu misil tei ca in, khawthu ma hi.
2 Sullam nei ngawl, mi tamsiatnak cu panmun ngai nei ngawl, a leng li thongmi vanote bang thong haw hi.
3 Ngolh cu cipuh vahnak tuk hi, kam khalh cu laak kam khalhnak tuk hi, ngolhkang cu misil vahnak tuk hi.
4 Misil tei thudotnak na sang lelem tale nangmah vang amuhte bangin a sil hi bok tuk ci.
5 Misilte khi amu silnak zawnin na otpih bok ma tale cip ing tin ngaisung sual kha tuk hi.
6 Misil kamtai in, a hahtu cu amah le mah a ke a talhdun bang hi a, haksatnak tawk tuk hi.
7 Cihnak cu misil tei kamah a khai thawthongmi kebai pa i ke tuah bangve hi. Imah nemcuamnak umma hi.
8 Misil upatnak piak cu saili ah tunghual kencih tuah bangve hi. Nemcuamnak umma hi.
9 Misil tei thupaucapnakin, a man haw mi cu zukham misil pa in, a khut a suntu ling a khei tukin a ngaihsut bangkek hi.
10 Nadeh piatu bawi in, a vakthongmi zukham misilte le a tawhmi pawpoh nadeh a pia tale, thal le thalcang tuah mi a liamsuah li tuah bangve hi.
11 A silnak lang lehtik leleng misil cu amah i luaksa eileh uico tuah bangten hi.Ref 26:11 2Pet 2:22;
12 Mah le mah cip ing tin, a titu sangin, misilbel ca in muansannak um saw laih hi.
13 Mi thazawng ita inn pualam tul nuam ngawl him? I lau him? Kiosa maw a lau?
14 Kongkhah cu patta in, a hel kawkawi bangin mi thazawngte cu a zaunak hum pen hel kawkawi li thong hi.
15 Mi khenkhat cu a thazawng leita in, kam sungah an baktum tuk hei nap haw ma hi.
16 Mi thazawngpa in thubulbat nei cingcai zetin thu a son thiammi micip salih sangin, cip saw ing tin ngaisung hi.
17 Mah tuah a zom kha ngawl haudun tei lakah a telkhatu cu uico beng lentu tuah bangten hi.
18-19 Mi a zol ceng ten, “Ka cekpan hi,” a titu cu, Mei-alh lom le thih theihnak ngu nei, thalcang tuah. mi a liamsuahtu misil tuah bangve hi.
20 Thing a umma tale mei na mit hi, a kuhno in mi sonsia thei a umma tale hauhdunnak na dai hi.
21 Meiholin mei lingtik a, thingin mei a alhtik bangin, mi hauhpih a mangtu ten, hauhdunnak na suaktik thei mek hi.
22 A kuhno in mi sonsia thei awnkam cu an uk tuah bangve hi. Pum sung tianin tum pepel hi.
23 Awnkam humno nei napi in, lungmu pha ngawlmi cu si mawizet noihmi lei beel tuah bangve hi.
24 Mi a huatu ten awnkam humno tuah mi otpih mek hi. Mahnaven a lungmu cu mizolnak tuah dim hi.
25 Mi hehpihzet bangin a sontute na sang pahsun. Itahim titale a lungmu sungah a nawngkaimi na bek tuah dim hi.
26 A lungmu sung a ummi huatnak cu zolnak tuah a sel li hei in, a phat ngawlnak cu mi zapi in, na mu leleng tuk hi.
27 Mitei caksuknak tuk khuk a cotu cu a khuk sungah amah cak tuk hi. Midangte delh tukin lei a kaihtiktu cu amah na delh tuk hi.
28 Zolthu son a mangtu i lei in thudik na hua hi. Mi hampumnak a nei mitei kam pen siatnak na suahpih mek hi.