24
Cih Awnkam Sawm le Kuah
1 Mipha ngawlte hawza pahsun; A muhte tuah phialdun pahsun.
2 Amuhte cu mi siatsuah tuk thu bebek ngaisung haw in, mi siatsuahnak tuk thu bebek hilh haw hi.
Cih Awnkam Sawm Nih
3 Cihnak tuah inn cu sak hi a, Theihnak tuah khohtik mi hi.
4 Theihnak tuah inn khan hempoh cu, A sunglawimi le a mawi mi thilte tuah thuam hi.
5 Tha ngilnak sangin cihnak pha saw hi, thangilnak sangin theihnak thupi saw hi.
Cih Awnkam Sawm Nih le Pa Khat
6 Ngal na do laihngawlin ngalling zetin tuangtipnak nei in, Ngaihsutnak pha piatu tam na neih tale ngal neh tuk ci.
Cih Awnkam Sawm Nih le Pa Nih
7 Cihnak cu misil tei ca in sang leita in thei zo haw ma hi, Thil thupi son ten imah son tuk thei haw ma hi.
Cih Awnkam Sawm Nih le Pa Thum
8 Thil pha ngawl bawl tuk bebek a vaikumtu cu a min, “Haksatnak bawltu,” tih hi tuk hi.
9 Misil i tuptahmi pawpoh cu sualnak hi, mi zawnsak theitu cu akua a bangin hua haw hi.
Cih Awnkam Sawm Nih le Pa Li
10 Haksat hun ten na lung a bing thong ahi tale, mi nemcuam ngawl ngangai hi tuk ci.
Cih Awnkam Sawm Nih le Pa Nga
11 Thah tukin a pui haw mi na mu tale, manlangin panin hi.
12 Hi cu ka nadeh hi ma tin umthong pahsun, Itahim titale Pathian in, na thu cu thei in, na lungmu zo hi. Nangmah cu zawldawt lelengin, na bawlmi bangin lulleh tuk hi.
Cih Awnkam Sawm Nih le Pa Lk
13 Ka capa, khuaihum cu ei in, ukzet hi; A phaang sung pen a cakmi khuaitui a hum bangin hi.
14 Cihnak cu na nunnak ca in, a pha mi hi, cihnak na nei ahi tale na mailam khuavak tuk a, na muansannak pai tukma hi.
Cih Awnkam Sawm Nih le Salih
15 Mipha pa pangin, a inn phelet tuk a tumtu, mipha ngawl pa bangin nung pahsun.
16 Itahim titale mifel cu vei salih tiang a lum vangin tholeh tuk hi. Mahnaven mipha ngawl cu siatnakin siatsuah tuk hi.
Cih Awnkam Sawm Nih le Liat
17 Na ngal tei bawngsiatnak a tawh haw ten na lungdam pahsun. A lupbah ten na thincim pahsun hi.
18 Na lung a dam ahi tale Topa in mu tuk a lungdam tukma hi, mahten dantat ngawlin hahleh sual tuk hi.
Cih Awnkam Sawm Nih le Kuah
19 Mipha ngawl tei hangin thin nop ngawlin um pahsun, mipha ngawlte hawza pahsun.
20 Itahim titale mipha ngawlin muansan tuk nei ma hi, mipha ngawl tei mei inn cu mit tuk hi.
Cih Awnkam Sawm Thum
21 Ka capa, Topa le kumpi cu upatin kihca in, amuh a langpangtute phial pahsun.
22 Itahim titale a haksatnak haw cu thakhatin heng tuk hi; Topa le kumpi lak pen iti bang siatnak heng tuk him tih cu akua in kaw a thei?
A Dang Cih Awnkamte
23 Hite vang hi micip tei hilhmi thu hi, Thukhen ten mi pat bul neih cu pha ma hi.
24 Mipha ngawl midik hi tin thu a khentu bawi cu, miten tamsia haw tuk a mi namkim ten hua haw tuk hi.
25 Mahnaven misual a dantattu cu khangto tuk a, mitei upatnak co tuk hi.
26 Cel zetin thu donlehtu cu ngualcam tatak langtiktu hi.
27 Lo ngam phano in, na neihnung ten le pumcawmnak tukin na bul a kho nungten inn sa in hi.
28 Thu le la ciangno in thei masa ngawlin mi sual nawn pahsun, midang tei ngaihsut sualnak tuk thute hilh pahsun.
29 Ka hum a bawl bang bokin a humah bawlbok tung, a bawlmi bangin lulleh tung tin ti pahsun.
30 Misil thazawngpa i lo le sabit huan sungah hawh ing.
31 Zo in, lingcam tuah dimin lei cu hampa in khuh khawng hi, mahten a upnak suangtian vang cim khawng hi.
32 Phano in ka zo ten thu ngaisung ing, Hi bangin cihnak ngah ing.
33 Dawmlaihno zap hih tung, dawmno zau hih tung, Dawmlaihno cawl hih tung, na tih sungin,Ref 24:33-34 Thup 6:10-11;
34 zawn le ngaunak cu nguca bangin le tingsapnak cu hiamnam tuah mi simtu nguca bangin heng tuk hi.