23
Cih Awnkam Pa Lk
1 Uktu bawi tuah an na eih ten na mai ah akua um kaw tih phano in zo in hi.
2 An longmi na hi tale sup deuhin hi.
3 A piakmi an ukte duhnap pahsun, Itahim titale nangmah a zolnak haw an hi kha thei hi.
Cih Awnkam Salih
4 Na nunnak siatsuahdun tuk tianin hauhnak zei pahsun, a colhdan thiamin cipin hi.
5 Itahim titale na sum le pai cu mitphelep sungin a pai thei mi hi, Ha bulh vutin, mupi bangin leng vawk tuk hi.
Cih Awnkam Liat
6 Mi lawiciil tei an ei pahsun, An uk a do mi vang duhnap pahsun.
7 Itahim titale amah cu a lungmu ngaihsutnak bangin a bawl thei mi hi, In inna, ei in tituk hi; Mahnaven mah a tihmi cu a lungmu ngai tuah a tihmi hi ma hi.
8 Na eihmi hempoh cu law tulleh khawng tuk ci, Na pahcoihnak hempoh vang thawnthong suak khawng tuk hi.
Cih Awnkam Kuah
9 Misil tei theihin thu hilh pahsun, Itahim titale cihnak thu na hilhmi cu nautat tuk hi.
Cih Awnkam Sawm
10 Ngamngi bawlsa mite khin pahsun, Nu le pa nei ngawl tei lo vang sut pahsun.
11 Itahim titale Topa cu a ngilmi amuhte pantu hi a, taza a cuai haw ten amu lamah tangin, a thu haw sonsak tuk hi.
Cih Awnkam Sawm le Pa khat
12 Nangmah a zilhtu tei thu khi phano in ngai inna,
cihnak cu na cun theih zahin cungin hi.
Cih Awnkam Sawm le Pa Nih
13 Naupang hilhhawl ngawlin um pahsun, ngolhin, na vah hangin thi tukma hi.
14 A nunnak cu thihnak pen luan ngah saw tuk ci.
Cih Awnkam Sawm le Pa Thum
15 Ka capa, na cip ahi tale ka lungdamzet tung.
16 Cihnak thu na hilh ka theih ten ka lungnopzet tuk hi.
Cih Awnkam Sawm le Pa Li
17 Mipha ngawlte hawza pahsun, Na nun sung Topa kihca in um saw in hi.
18 Mahti bangin na um ahi tale na mailam vak tuk a, Na muansannak pai tukma hi.
Cih Awnkam Sawm le Pa Nga
19 Ka capa, ngai in, cip inna, lamdik cu zui lelengin hi.
20 Zukham misil lelengte le sa ngawpte phial pahsun.
21 Itahim titale zukham misil le sa ngawpte cu zawng haw tuk hi, Na hun le cante ei le hihbuh bekin, na botik ahi tale, A ngei um ngawlin puansia silh tuk ci.
Cih Awnkam Sawm le Pa Luk
22 A hingtu na pa i thu ngai in, Amah a um ngawl ahin, piang tukma ci. Na nu a tek ten zawnsak pahsun.
23 Thudik cu lei inna, zuak toh pahsun, Cihnak, nunhilhnak le theihnakte cu lei inna, zuak toh pahsun.
24 Midik i pa cu a lungdamzet tuk hi, Capa cip hingtu cu a capa humah a lungdam tuk hi.
25 Na nu le na pa lungdamtikin, Nangmah a hingtu na nu cu lungdamin um hen.
Cih Awnkam Sawm le Salih
26 Ka capa, na lungmu ngangai tuah hu ngai in, Ka nundan hi zohtehin hi.
27 Numei pha ngawl le numei sual cu thihnak thang bang hi.
28 Nguca bangin mi pang haw in, mi tampi siatsuahin, mi hawkdakin suaktik haw hi.
Cih Awnkam Sawm le Liat
29 Akua kaw lungbing le
vancaukapin, a um mek?
Akua kaw a lungsia mektu?
Akua kaw mi tuah
a haudun mek?
Akua kaw a phuciak mek?
Akua kaw a thu um ngawlpi in,
meima a thuak mek?
Akua kaw mit san ngengu in,
a um mek?
30 Zu in lelengtu misilte haw hi.
31 Khuat sungah san kilkelno in le
de linglengin,
intum ten dang sungah
nal mahtak luttum zuazuahin,
a ukzet bangmi zu cu zo pahsun.
32 A tawpnak ten ngul bangin mi cikin,
ngul ngu nei bangin mi cik mek hi.
33 Na mitin thil phundang mu tuk ci a,
phano in thu ngaisung thei
tuk tohin,
ciangno in awn thei tukma ci.
34 Tuipi thuanthum laizangah
a zau mipa bang le
timbaw puanzaknak khuam lek a,
zaumi pa bang hi tuk ci.
35 “Sawhnek haw naven liam mang.”
“Vaat haw naven imah thei mang.
Ituk ten tho in, a dang intuk
zei hih tung,” tin tituk ci.