22
1 Letnak sangin minphatnak cu ten tuk na hi saw hi, Hehpihnak cu sui le ngun sangin pha saw hi.
2 Mi ca-ngah le mihau a bangvenak hawno um hi, Mahmi cu Topa i semsuah veve a hihnak haw khi hi.
3 Micip cu haksatnak amuh ten pial hi. Mahnaven misilin nawkcih lualuamin, a nungten sikleh hi.
4 Niamkhiatin Topa kihca inna, hauhnak, upatnak le nunsaunak ngah tuk ci.
5 Mipha ngawl tei lampi cu ling le thang tuah dim hi, mai nunnak a huptu in khawlapi pen pial tuk hi.
6 Naupang cu a nundan tuk zilhin, a nunsung mah lampi pen pial tukma hi.
7 Mi ca-ngah cu mihau i sila hi, Na cawitu cu a coihtu i sila hi.
8 Dikngawlnak anci na ciing ahi tale haksatnak at tuk ci, mahten midangte na bawlsiatnak vang bo tuk hi.
9 Lawithiam inna, na an cu mi ca-ngahte kawmin, muicu ngah tuk ci.
10 Mi pualthau cu hawlvawk inna, buainak pai tuk hi, Hauhdunnak le nuainep dunnak vang pai tuk hi.
11 Lungmu thiang nei in awnkam hum a neitu in, Kumpi cu a ngualcamin bawl thei tuk hi.
12 Topa in zolthu a son theite cu hawlvawkin, Thudik a sontute cu himno in cingkhawi hi.
13 Mi thazawng cu innah umthong hi, Pualeu lam ka tul tale kiosa in pet hum tuk ti hi.
14 Numei pha ngawl i mukkam cu a thukmi khuk hi, Topa i thinuknak a bawltute cu mah khuk sungah caak haw tuk hi.
15 Naupang lungmu sungah huatsuahnak um leleng hi. Hilhhawlnak ngolh tuah na vat tale, nuncan pha zilh thei tuk ci.
16 Mai hauhsak nuamnak hangin mi ca-ngah a nuainemtu le mihausa a maizahtu cu ca-ngahleh tuk hi.
Micip Tei Awnkam Sawm Thum
17 Na beng hu hekin, micip tei thu hilhmi zilh nang. Ka cihnak hi na lungmu sungah ciing lelengin hi.
18 Na lungmu sungah na koih ahi tale na lungdam tuk hi, Na mukkamin ngalling sa in um tuk hi.
19 Topa cu muangin, tin deihsak ing, mah hangin hi thute tuni in ka zilhnak hi.
20 Nangma ca in cihnak awnkam sawm thum ngat sak ing. Hi cihnak awnkamte cu cihnak le ngaihsutnak pha tuah a dim mi haw hi.
21 Hih cihnak awnkamte hin thudik theitik tuk hi. Nangmah natiktu khi thuman hilh thei tuk ci.
Cih Awnkam Pa Khatnak
22 Mi ca-ngahte khi imah thu neileh zo haw tukma poh tin, a thil lonsak pahsun. Thu khennak zung sung hei pen bawlsia pahsun.
23 Itahim titale Topa in, a thu haw panpih tuk a, Amuhte a siatsuahtu tei nunnak cu siatik tuk hi.
Cih Awnkam Pa Nihnak
24 A thinuk thei mi le mi thincomte phial pahsun.
25 Itahim titale a nundan haw na cung ngah pang tale khinleh thei tukma ci.
Cih Awnkam Pa Thumnak
26 Midang tei leibat cungcangah dehvo la in thutiam pahsun.
27 Na loh thei ma ahi tale na zaunak tianin laksak haw tuk hi.
Cih Awnkam Pa Liak
28 Na pu le pa tei bawlsa ngamngi cu thawn pahsun.
Cih Awnkam Pa Nganak
29 Nadeh pha a dektu lak hemin, mitam saw sangin a pha saw mi, kumpipa tuah ngualcam tuk a takmi pa lak tung hi.