21
1 Kumpi lungmu cu Topa i khut sungah um hi, Lui tui bangin ama deihnak hempoh ah melh hi.
2 Kua hei in mai nun daan tek hi a dik a manin ngaisung hung hi, mahnaven Topa in, a lungmu uh zo hi.
3 Thudik le dikcangnak bawl cu biakpiaknak sangin Topa in deih saw hi.
4 Mipha ngawlte cu tuangkhawnnak le pualthaunakin uk hi, mahmi cu sualnak hi.
5 Phano in khuakhannak tuah na nadek ahi tale lawhting tuk ci, mahnaven manlangin, na dek ahi tale khamkhop hei nei thei tukma ci.
6 Zolthu sonnak tuah ngahmi sum le pai cu a ngei umngawl pa in, thihnakah henpih tuk hi.
7 Mipha ngawlte cu a bawlmi haw phat ngawlnakin amuh siatik hi, Itahim titale a dikmi bawl tuk cu nuam haw ma hi.
8 Mipha ngawl tei lampi cu kawi hi, mahnaven mithiang ten thilpha bawl haw hi.
9 Phuciak lelengmi zi tuah innpi sungah um kawm leng sangin, Innkuul ningnawi ah mah nguakcang um pha saw hi.
10 Mipha ngawlte cu thilpha ngawl bek bawl tuk nuam leleng haw hi, a koi humah hei hihen hehpihnak lungmu nei haw ma hi.
11 Mi pualthaute a dantat haw ten misil ten cihnak ngah haw hi, mahnaven micip cu a hilh haw ten a cihnak khang hi.
12 A dikmi Pathian in mipha ngawl tei innah icang kaw tih thei khawng hi. Mipha ngawlte siatnakah hengtik tuk hi.
13 Mi zawng tei aunak aw a ngai nuam ngawltu cu ama au ten vang kuamah in theihpih bok tukma hi.
14 A kuhno a piakmi laksawngin mi thinuknak daptik thei hi, Puan tuamin piakmi nawhthuhin thinsonak nemtik hi.
15 Thu pa kha khat manzetno in son a hih ten, midik tei ca in lungdamnak hi. Mahnaven mipha ngawl tei ca in thasiatnak hi.
16 Cihnak lampi pen a pial mite cu thihnakin pang hi.
17 Nopnak bek a deihtu cu zawng tuk a, zu le sa bek a duhtu cu hau awng tukma hi.
18 Mipha ngawl ten mipha tei humah heng tuk a ngaihsut haw mi haksatnak cu amu hum lala ah heng tuk hi.
19 A phuciakmi le mi hauhpih mangmi numei tuah um kawm sangin, Phillawnah mahno umden pha saw hi.
20 Micip umnakah letnak le nopnak um hi. Mahnaven misilin tangka a ngah bek ten bo khawng tukin mang paih hi.
21 Diknak le hehpihnak nei in, na khan sau tuk hi. Midangte vangin upat haw tuk a phano in tuamlawm haw tuk hi.
22 A cipmi ngalbawi in mi ngil tei cinmi khuapi cu la thei in, A muansan haw mi khua upnak kulhtianpi vang siatik thei hi.
23 A lei le a muk a kem theitu cu haksatnak pen luat tuk hi.
24 Pualthau le tuangkhawng zetin, a nungmi pa cu a min, “Mi zawnsaktu,” tih hi.
25 Nadek naap ngawl mi thazawng cu, amah le mah a thatdun li hi.
26 Thalengin, a ngaihsutmi cu i ngah kam nang tih bek na hihi, Mahnaven midikte in it ngawlin phal zetin pia haw hi.
27 Mipha ngawl i biakpiaknak cu Topa in ningdelh hi. Lungmu pha ngawlnak tuah a bawlmi cu ningdelh sesem hi.
28 A dik ngawlmi theihpihtu cu sia tuk hi. Mahnaven thudik a sontu i thu cu cosan hi tuk hi.
29 Midik cu amah le mah muangdun hi, Mahnaven mipha ngawlin tihem cop haw hi.
30 Topa cu na langpang ahi tale mihing i cih le thiamnak le, theihciannak ten bawm thei tukma hi.
31 Ngaldonak ni ca in cipuhte aman sa hi zo hi, Mahnaven nehnak cu Topa lak pen a hung mi hi.