20
1 Zukham misil cu mitei zotsak tawhnak hi. Mi kamtamtikin hauhdunnak suaktik hi. Zukham misil cu silnak hi.
2 A thinukmi kumpi cu a hawk khu khummi kiosa na lau bangin lau in hi. Amah a thinuktik tu cu amah le mah thatdun tuah bangten hi.
3 Misil akua hei in hauhdunnak suaktik thei hi. Hauhdunnak pen a pial theitu cu upat tak haw hi.
4 Lo ngih hunin, nadek naap ngawl thazawng cu an cop hun ten cop tuk nei tukma hi.
5 Mihingin, a lungmu sung a neihmi ngaihsutnak cu tuikhuk thuk sung a tui tuah bangten hi. Mahnaven micip pa in, a tui cu cawi thei tuk hi.
6 Mi hempohin mai diknak tek hilh haw hi, mahnaven akua in mifel tatak tawk thei him?
7 Pate midik le mipha ahi tale, a cate mi bawngpha na hi haw hi.
8 Thukhennak khunnak hum a khungtu kumpi in thilpha ngawl hempoh a mitin deidan khawng thei hi.
9 Ka lungmu thiangtik khawng zo ing, Ka sualnak pen thiang zo ing tin, akua in kaw a ti thei?
10 Topa in cuai man ngawl le thil tehnak man ngawlte hua hi.
11 Naupangte vangin amuh tei hihnak a nuncan daan, a thiang le thiang ngawl a dik le dik ngawl a nadehnakin langtik hi.
12 Muhnak mit le theihnak beng cu Topa i bawlmi hi.
13 Na huncan hihbuhnak bekin na botik tale zawng tuk ci. Na dek leleng inna, an tampi nei tuk ci.
14 Van leitu in, “A man tam leita,” tin phu li thei hi. Mahnaven a lei cengta in, “Baihno lei ing,” tin uangkho thei hi.
15 Sui tampi um, suang manpha tampi um, mahnaven cihnak awnkam cu a manpha saw mi hi.
16 Theih awng ngawlmi pa i ca in, amahkhan saktu cu a neihmi amahkhannak in laksak na hi tuk hi.
17 Hampumnak tuah ngahmi an cu uk hi, mahnaven a ngei ngawlin a kam sungah philnel bang na hi tuk hi.
18 Ngaihsutnak pha neite tuah thu na kum un, na nadehnakah lawhting tuk ci. Phano in tuangtimta ngawlin ngal do pahsun.
19 Mi thu sonkuh a mangtu in, thu kuh phuang thei mek hi. Mah hangin mi kamtamte phial pahsun.
20 Na nu le pa na tamsia tale khuathim lak pen mei inn mit bangin na nunnak bo tuk hi.
21 Baihno in, na ngahmi sum le pai cu na ca in nemcuamnak dawm sesem tuk hi.
22 Phat ngawlnak khi phat ngawlnak tuah lul pahsun, Topa muang inna, aman pan tuk hi.
23 A man ngawlmi cuai le thil tehnak a mangtute cu Topa in hua hi.
24 A lampi uhah lampuitu cu Topa hi. Mihing ten a hawhnak tuk uh lampi cu iti bangin kaw a theih zawh tuk uh?
25 Pathian nelah sumpi pia tukin thu na tep laih ngawlin phano in ngaisung masa in hi. Mahma tale tunung ten sikleh kha sual tuk ci.
26 A cip mi kumpi in misualte zei in hehpih ngawlin na bawlsia mek hi.
27 Topa in ngaihsutnak le sia le pha khenkhuai thiamnak lungmu pia hi. A lungmu sung uh pen ilai ah him a ngelh theih tuk uh?
28 Kumpi in thudik, phatnak le dikcangnak tuah ngam a uk sung cu a uknak kho tuk hi.
29 Khangno tei sunloihnak cu a zaangtha haw hi, Putek tei sunloihnak cu a puakpak haw khi hi.
30 I tuk hun can pawpoh ten a ziaza uh a khelh theihnak tukin haksatnak a tawh uh kul can um hi.