19
1 Mi ca-ngah cu a hampum mi, misil sangin pha saw hi.
2 Theihnak um ngawlin deihnak bek cu pha ma hi. Thinsaunak um ngawlin haksatnak tawh baihno hi.
3 Mihing ten mai silnak hangin siatnak tawk thei haw hi. Mah hun ten Topa mawhsiat haw hi.
4 Hauhnak cu ngualcam pha tampi neihnak hi, mahnaven mi zawngte cu a ngualcam sa hei in, na zamsan thei hi.
5 Thukhennak zung pen zolthu na son tale dantat tawk tuk ci, na luatnak tuk umma hi.
6 Mi tampi in mi upa mai ah mitmai pha ngah tuk zuam haw hi, Phalnak nei tei ca in, akua abang ngualcam pha na hi thei hi.
7 Mi zawngte cu a suahpih unau ten muhehca haw tuk hi. Meltheih thong ten izah tain zamsan sesem haw tuk him? Izahta a sam li vangin hekkik haw tukma hi.
8 Nangmah le nangmah it inna, cihnak cu na tih theih zahin cungin hi. Na cunmi cing leleng inna, nadehnak hempoh ah lawhting tuk ci.
9 A dik ngawlmi theihpihtu tetti cu bawlsiatnak pen luat tukma hi, zolthu sontu cu siatnak tawk tuk hi.
10 Misil cu nunnopin nung tuk tak ma hi, sila in, a bawi uk tukin tak sesem ma hi.
11 Na cip tale na lungmu uk thei tuk ci, mi sualnak ngaihdap cu thil sunglawibel hi.
12 Kumpi thinuknak cu kiosa thum bang hi. Mahnaven a hehpihnak cu hampa hum a daita bang hi.
13 Capa silin, a pa siatnakah henpih hi. A phuciak leleng cengtu cu nguahcing tuah bangve hi.
14 Inn le sum le pai cu nu le pai lak pen ngahmi lo le lam hi. Mahnaven zi cip cu Topa i lak bek pen ngahmi hi.
15 Thazawngin, na zau leng thong tale na ngilkial tuk hi.
16 Pathian thukham zui inna, na khansau tuk hi. Imah simsial ngawlin na um tale thi tuk ci.
17 Mi zawng tei humah hehpihnak neih cu Topa i lak a thilpiak tuah bangten hi. Topa a man lulleh tuk hi.
18 Na cate a khanno haw laihin thu hilhin, na hilh ma tale amuh le muh siatsuah tukin thapia hi tuk ci.
19 Nase zetin thinuktu cu bawlsiatnak tawk tuk hi. Haksatnak sung pen vei khat na pan hei in, na patleh kul leng tuk hi.
20 Ngaihsutnak pha piakmi ngai in cunnak na nei ahi tale vei khat ni ten micip na hi tuk ci.
21 Mihing ten a lungmu sung hawah tuptahnak tampi nei tuk hi. Mahnaven Topa i tuptahnak bek bawl na hi tuk hi.
22 Hampumnak cu zahcaknak hi. Zawnnak cu zolthu son sangin pha saw hi.
23 Topa kihcaknak nei inna, na khansau tuk hi. Siatnak tawk ngawlin lungmuannak le nopnak ngah tuk ci.
24 Mi khenkhat thazawng leita in, a kam sung hawah an baak tuk hei naap haw ma hi.
25 Mi pualthau cu dantat inna, ngaihsutnak a dawm ten cihnak ngah haw tuk hi. Micip thu hilh inna, cip dedeuh tuk hi.
26 A pa dengin, a nu inn pen a hawlvawktu capa cu zahcak mualphonak suaktiktu hi.
27 Ka capa zilnak na tawp ahi tale na theihsa nangawn phawkngil tuk ci.
28 Mi siatnak bek ngaisungtu theihpihtu lakah thudik le thuman umma hi, mipha ngawl ten sualnak bawl tuk bek nuam haw hi.
29 Mi ultung ten vah le den tawk haw tuk hi. Misil ten vah co haw tuk hi.