2
Cihnak i Nemcuamnak
1 Ka capa, ka hilhmi thu hi cungin, deh tuk ka hilhmi thute na lungmu sungah vongin hi.
2 Cihnak hi i hum tihmi ngai in, theicel thei tukin na lungmu tuah hantiamin hi.
3 Mahzuh hi, muhnak le theihnak cu samin, theihcelnak cu na ngen tale,
4 Ngun tangka bang ngah nuamin, na manpha selmi bangin na zei tale;
5 Mahti bangin na bawl tale Topa kihcaknak cu ihim tihmi thei tuk ci a, Pathian theihnak cu mu suak tuk hi ci.
6 Cihnak piatu cu Topa hi a, ama lak pen cihthiamnak le theihcelnak heng hi.
7 Midik le lungmu taituang cu bawmin hup hi.
8 Midang humah thudik a bawltute hupin amah a ittute cingkhawi hi.
9 Ka thu na ngai tale, a dik mi, a pha mi le ka deh tukmi i him tih cu theithei tuk ci.
10 Cihnak cu na lungmu sungah tumin, na theihcelnakin lungdamtik tuk hi.
11 Na cihnak le na theihcelnakin nangmah hup tuk hi.
12 Thil pha ngawl lak pen nangmah suakcatik tuk hi. Awn pha ngawl mangtu tei lak pen nangmah cingkhawi tuk hi.
13 Amuhte cu a thim mi lampi ah hawhin, a manmi lampi cu zamsan haw hi.
14 Thil pha ngawl deh cu amu deihzawng hi a thil sual dehnak munah lungdamzet haw hi.
15 Muantak ngawl le upat tak ngawl mite na hi haw hi. A lampi haw kawi in, a thinlung haw vang kawi hi.
16 Awnkam naal zuzul tuah a zoltu numei pha ngawl lak pepan suak tuk hi.
17 Mahmi nu cu a pasal humah diknak a nei ngawltu le Pathian nelah thutiam imah simsial ngawltute haw hi.
18 A innah na hawh tale thihnak lampi ah a hawh na hi ci.
19 A lakah a hawhtu hempoh cu kua mah kikleh haw ma hi. Nunnak lampi tawkleh haw ma hi.
20 Mah hangin mipha tei lampi cu tawn inna, midik tei nun bangin nung tuk ci.
21 Midik le mipha mi cangkim cu hi leihum luah haw tuk hi.
22 Mahnaven mipha ngawlte cu mah ngam sung pen Pathian in hawlvawkin mi awklawl cu botin vawk tuk hi.