3
Khangnote Hanthotnak
1 Ka capa aw ka hilhmi thu phawkngil pahsun. Deh tuk ka hilhmite cing lelengin hi.
2 Ka hilhmi thu in, na nun nopnak le na nunsaunak pia tuk hi.
3 Thumannak le muantak hihnak cu ituk mahten hahsuah pahsun. Mah thu pa nihte cu na longah ok inna, na thin sungah nganin hi.
4 Mahti bangin na bawl tale Pathian mai le mihing tei mai ah mitmai pha ngah tuk ci.Ref 3:4 Lk 2:52;
5 Topa cu na thin le lung venghawngin muangin, Na ngaihsut theihnak cu ituk mahten muang pahsun.
6 Nadeh na bawlnak hempoh ah Pathian phawk leleng inna, aman lamdik hilh tuk hi.
7 Cip leng ing tin, ngaisung pahsun; Topa cu kihca inna, sualnak cu zamsanin hi.Ref 3:7 Rom 12:16;
8 Mahti bangin nadek tale na taksa ca in damnak hi tuk a na nguh ca in si pha hi tuk hi.
9 Topa cu na sum le na anthak masabel tuah pahcawi in hi.
10 Mahti bangin, na bawl tale na an beem cu an tuah dim tuk a, na sabit beel cu sabit tuah dimlet tuk hi.
11 Ka capa aw, Topa i nunhilhnak cu imah simsial ngawlin um pahsun, a liat ten na thinna pahsun.Ref 3:11 Job 5:17;Ref 3:11-12 Heb 12:5-6;
12 Itahim titale pan a ihzet mi a cate nun a hilh bangin, Topa in, a ih mite cu nun hilh hi.Ref 3:12 Mang 3:19;
13 Cihnak a mutu cu mi muicu hi haw tuk hi. Theihnak a neitu vang mi muicu hi bok hi.
14 Cihnak cu sui le ngun sangin a manpha saw hi.
15 Cihnak cu suang manpha sangin manpha saw in, thil dangte tuah tehkip theihmi hi ma hi.
16 Cihnakin nunsaunak, hauhnak le upatnakte pia hi.
17 Cihnakin, na nunnoptik thei in, na nunnak lamtuanah himno in hawhpih tuk hi.
18 Cihnak neitute cu a lung haw damin, cihnakin nunnak pia hi.
19 Topa in lei buppi hi
a cihnak tuah bawlin,
a theihnak tuah van cu khotik hi.
20 A cihnak tuah luituite luangtikin,
leihumah nguahzu tukin
meingo umtik hi.
21 Ka capa aw, na cihnak le na ngaihsut thiamnak cu len kho in, na lak pen itik hei ten taitik pahsun.
22 Na hawvang ca in nunnak hi tuk a, na ngawng ca in khi mawizet na hi tuk hi.
23 Na lamtuanah himdamno in hawh thei tuk ci a, lup bahnak tawk tukma ci.
24 Zan na hihbuh ten lau tukma ci a, hihbuh ci zetin zankhua hihbu thei tuk ci.
25 Mipha ngawl tei lakah huihsiapi bangin siatnak a hen ten na ca in lungkhamnak imah um tukma hi.
26 Topa in himdamzetno in cingkhawi tuk a thang sungah caksuktik tukma hi.
27 A kul a sam mitei lakah na bawl theihtawp tianin thilpha bawlin hi.
28 Na innnel pa khi tuni na bop theih mi ahi tale zing tiang ngak pahsun.
29 Nangmah muansanin, na el a ummi na innnel pai humah haksatnak bawl tukin ngaisung pahsun.
30 Na humah siatnak a bawl awng ngawltu pa khi hauhpih li pahsun.
31 Mi pualthaute hawza pahsun, amuh bangin um tuk vang ngaisung pahsun.
32 Itahim titale Topa in phat ngawlnak a bawltute cu hua in, midikte cu hup hi.
33 Topa in mi ngilo tei inn cu tamsia in midik tei inn cu thupha pia hi.
34 Mi imah simsial ngawltute cu imah simsial bokma, mi niamkhiattu tei humah a ihnak langtik hi.Ref 3:34 James 4:6; 1Pet 5:5;
35 Micip ten upatnak le sunloihnak co haw tuk a, misil ten zahcak mualphonak co haw tuk hi.